ଆଗାମୀ ୧୫ ଦିନରୁ ମାସେ ଅଧିକ ଚାଲେଂଜ ହେବ: ମୁଖ୍ୟମନ୍ତ୍ରୀ

ଭୁବନେଶ୍ୱର: କରୋନା ପରିପ୍ରେକ୍ଷୀରେ ଆଗାମୀ ୧୫ ଦିନରୁ ମାସେ ଆମ ପାଇଁ ଅଧିକ ଚାଲେଂଜ ହେବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି । ବିମାନ ଓ ରେଳ ଚଳାଚଳ ଆରମ୍ଭ ହୋଇଥିବାରୁ ଅଧିକ ଲୋକଙ୍କ ଯିବା ଆସିବା ଦୃଷ୍ଟିରୁ ଆମକୁ ଅଧିକ ସତର୍କ ରହିବାକୁ ହେବ । ତେବେ ଏହାକୁ ମୁକାବିଲା କରିବାରେ ଆମେ ସଫଳ ହେବୁ ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ରାଜ୍ୟରେ କରୋନା ଓ ବାତ୍ୟା ପରବର୍ତ୍ତୀ ସ୍ଥିତି ଉପରେ ମୁଖ୍ୟମନ୍ତ୍ରୀ ଆଜି ଏକ ସମୀକ୍ଷା ବୈଠକ କରିଥିଲେ । ମୁଖ୍ୟମନ୍ତ୍ରୀ କହିଛନ୍ତି, ଦୁଇ ମାସ ଲକ୍ ଡାଉନ୍ ରେ ଆମେ ଅନେକ କଥା ଶିକ୍ଷାଲାଭ କରିପାରିଛୁ । ବୈଜ୍ଞାନିକ, ସାମାଜିକ ଏବଂ ପ୍ରଶାସନିକ ଉପଲବ୍ଧି ହାସଲ କରିଛୁ । ଏହି ଉପଲବ୍ଧିକୁ ଭିତ୍ତି କରି ଆମକୁ ଭବିଷ୍ୟତ ପାଇଁ ଷ୍ଟ୍ରାଟେଜି ପୁନଃ ନିର୍ଦ୍ଧାରଣ କରିବାକୁ ହେବ । ଯାହାଦ୍ୱାରା ଆମେ କରୋନା ସଂକ୍ରମଣକୁ ସମ୍ପୂର୍ଣ୍ଣ ନିୟନ୍ତ୍ରଣ କରିବା ସହ ଅର୍ଥନୈତିକ ଓ ଜୀବନଜୀବିକା କାର୍ଯ୍ୟକ୍ରମରେ ସ୍ୱାଭାବିକ ଅବସ୍ଥା ଫେରାଇ ଆଣିପାରିବା ।

ଭାରତବର୍ଷ ବିଶେଷକରି ଓଡ଼ିଶାରେ କରୋନା ଭୂତାଣୁ ଆଚରଣ ନେଇ ଆମେ ଯେଉଁ ଶିକ୍ଷା ପାଇଛୁ ତାହା ଆମକୁ ଆଶା ଦେଇଛି । ସାମାଜିକ ଦୂରତ୍ୱର କଡ଼ାକଡ଼ି ପାଳନ, ମୁହଁରେ ମାସ୍କ ପିନ୍ଧିବା ଏବଂ ବାରମ୍ବାର ହାତ ସଫା କରିବା ଦ୍ୱାରା ମହାମାରୀ ବିସ୍ତାରକୁ ରୋକାଯାଇପାରିବ । ଏଥିସହ ବିପଦଶଙ୍କୁଳ ଜନସାଧାରଣ, ବୟସ୍କ ତଥା ଗୁରୁତର ରୋଗଦ୍ୱାରା ପୀଡ଼ିତ ବ୍ୟକ୍ତିଙ୍କର ଅଧିକ ଯତ୍ନ ଆବଶ୍ୟକ । ଏହିସବୁ ବିଷୟକୁ ପ୍ରାଧାନ୍ୟ ନେଇ ୧୫ ଦିନ ବ୍ୟାପୀ ବ୍ୟାପକ ଜନସଚେତନତା ସଚେତନତା କାର୍ଯ୍ୟକ୍ରମ କରାଯିବ ।

ମୁଖ୍ୟମନ୍ତ୍ରୀ କହିଛନ୍ତି, ସାମାଜିକ ଦୂରତା ସାମାଜିକ ବୟକଟ୍ ନୁହେଁ । ଏଥିପାଇଁ ସଚେତନତା ସୃଷ୍ଟି ସହ କଡ଼ା କାର୍ଯ୍ୟାନୁଷ୍ଠାନ ଆବଶ୍ୟକ । ଏହାକୁ ଲକ୍ଷ୍ୟ ରଖି ଚଳିତ ସପ୍ତାହର କାର୍ଯ୍ୟକ୍ରମ କରାଯିବ ।

ଆଗ ଧାଡ଼ିରେ ଲଢ଼ୁଥିବା ଯୋଦ୍ଧା ଏବଂ ବିପଦ ସଙ୍କୁଳ ଲୋକଙ୍କର ସଠିକ ସମୟରେ ପରୀକ୍ଷା କରାଯିବା ଦରକାର । କରୋନା ଟେଷ୍ଟିଂରେ ସାରା ଦେଶର ଅଗ୍ରଣୀ ରାଜ୍ୟଗୁଡ଼ିକ ମଧ୍ୟରେ ଓଡ଼ିଶା ରହିଛି । ଏହାକୁ ଅଧିକ ବିକେନ୍ଦ୍ରୀକରଣ କରାଯାଇ ସାରା ରାଜ୍ୟର କୋଣ ଅନୁକୋଣରେ ଟେଷ୍ଟିଂ ସୁବିଧା କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ଆଇସିଏମଆର ଅନୁମୋଦକ୍ରମେ କ୍ୱାରେଣ୍ଟାଇନ୍ ଅବଧି ନିୟମରେ ପରିବର୍ତ୍ତନ କରାଯାଇଥିବା ମୁଖ୍ୟମନ୍ତ୍ରୀ ସ୍ପଷ୍ଟ କରିବା ସହ ଆବଶ୍ୟକତା ଦେଖି ସରକାରୀ କ୍ୱାରେଣ୍ଟାଇନ୍ ସୁବିଧାର ସମୟସୀମା ବୃଦ୍ଧି କରିବାକୁ ଜିଲ୍ଲାପାଳମାନଙ୍କୁ କ୍ଷମତା ଦିଆଯାଇଥିବା କହିଛନ୍ତି ।

ସଂକ୍ରମଣ ରୋକିବା କ୍ଷେତ୍ରରେ ଗ୍ରାମ ପଞ୍ଚାୟତସ୍ତରରେ କାର୍ଯ୍ୟକାରୀ ହେଉଥିବା ଟିଏମସି ଗୁଡ଼ିକର ମୁଖ୍ୟମନ୍ତ୍ରୀ ଉଚ୍ଚ ପ୍ରଶଂସା କରିଥିଲେ । ୯୫% ପଜିଟିଭ୍ କେସ୍ ଏହି ସବୁ କ୍ୱାରେଣ୍ଟାଇନ୍ କେନ୍ଦ୍ରରୁ ଆସୁଛି । ସରପଞ୍ଚ, ସ୍ଥାନୀୟ ପ୍ରତିନିଧିଙ୍କଠାରୁ ଆରମ୍ଭ କରି ତଳୁ ଉପର ପର୍ଯ୍ୟନ୍ତ ସରକାରୀ କଳ ଓ ବ୍ୟବସ୍ଥା ଯୋଗୁଁ ଏହା ସମ୍ଭବ ହୋଇପାରିଛି । କୋଭିଡ୍ ବିରୋଧରେ ଦିନ ରାତି ଅକ୍ଲାନ୍ତ ପରିଶ୍ରମ କରୁଥିବାରୁ ମୁଖ୍ୟମନ୍ତ୍ରୀ ସମସ୍ତଙ୍କୁ ପ୍ରଶଂସା କରିଥିଲେ ।

ପ୍ରବାସୀମାନଙ୍କୁ ସାହାଯ୍ୟ କରିବା ପାଇଁ ସରକାର ଜିରୋ ୱାକିଂ ଇନସାଇଡ୍ ଓଡ଼ିଶା ନୀତି କାର୍ଯ୍ୟକାରୀ କରୁଛନ୍ତି । ଏହାକୁ ସଫଳତାର ସହ କାର୍ଯ୍ୟକାରୀ କରିବାରେ ରାଜ୍ୟ ପୁଲିସର କାର୍ଯ୍ୟଦକ୍ଷତାକୁ ମଧ୍ୟ ମୁଖ୍ୟମନ୍ତ୍ରୀ ଉଚ୍ଚ ପ୍ରଶଂସା କରିଥିଲେ ।

ଗୋଟିଏ ପକ୍ଷରେ କୋଭିଡ ୧୯ ର ମୁକାବିଲା ଏବଂ ଅନ୍ୟପକ୍ଷରେ ମହାବାତ୍ୟାର ସଫଳ ମୁକାବିଲାରେ ସରକାରୀ କଳକୁ ରାଜ୍ୟବାସୀଙ୍କ ଅକୁଣ୍ଠ ସମର୍ଥନ ପାଇଁ ମୁଖ୍ୟମନ୍ତ୍ରୀ ସମସ୍ତଙ୍କୁ ପ୍ରଶଂସା ଓ ଧନ୍ୟବାଦ ଜଣାଇଥିଲେ । ସମସ୍ତଙ୍କ ତ୍ୟାଗ ଆମକୁ ଆଗକୁ ବଢ଼ିବାରେ ପ୍ରେରଣା ବୋଲି ମୁଖ୍ୟମନ୍ତ୍ରୀ କହିଥିଲେ ।

ପ୍ରବାସୀଙ୍କ ପାଇଁ କ୍ୱାରେଣ୍ଟାଇନ୍ ସମସ୍ୟା ନାହିଁ

ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ କହିଛନ୍ତି, ଓଡ଼ିଶାରେ କ୍ୱାରେଣ୍ଟାଇନ୍ ପାଇଁ ଯେତିକି ସୁବିଧା ଅଛି ତାହାର ମାତ୍ର ୩୦ ପ୍ରତିଶତ ବ୍ୟବହୃତ ହୋଇଛି । ତେଣୁ ଅଧିକ ପ୍ରବାସୀଙ୍କ ପାଇଁ କୌଣସି ସମସ୍ୟା ନାହିଁ । ବର୍ତ୍ତମାନ ସୁଦ୍ଧା ୮୦ ହଜାର ପ୍ରବାସୀ ହୋମ୍ କ୍ୱାରେଣ୍ଟାଇନ୍ କୁ ଯାଇସାରିଛନ୍ତି ।

କୋଭିଡ ରୋଗରେ ଓଡ଼ିଶାରେ ସୁସ୍ଥତା ହାର ୪୨.୭୮ ପ୍ରତିଶତ ଯାହାକି ଜାତୀୟ ହାରଠାରୁ ଭଲ । ସେହିଭଳି ମୃତୁ୍ୟହାର ହେଉଛି ୦.୪୬% । ରାଜ୍ୟରେ ବର୍ତ୍ତମାନ ୧୪ଟି ପରୀକ୍ଷାଗାରରେ ଟେଷ୍ଟିଂ କରାଯାଉଛି ଏବଂ ଟେଷ୍ଟିଂ କ୍ଷମତା ଦିନକୁ ୫୫୦୦ କୁ ବୃଦ୍ଧି ପାଇଛି ।

ବର୍ତ୍ତମାନ ସୁଦ୍ଧା ୧୦୯ ଟି ସ୍ୱତନ୍ତ୍ର ଟ୍ରେନ୍ ରେ ୧,୫୩,୭୩୮ ଜଣ ପ୍ରବାସୀ ରାଜ୍ୟରେ ପହଞ୍ଚିଛନ୍ତି । ଅନ୍ୟ ପରିବହନ ମାଧ୍ୟମ ଜରିଆରେ ଓଡ଼ିଶା ଆସୁଥିବା ଲୋକଙ୍କ ସୁବିଧା ପାଇଁ ରାଜ୍ୟ ସରକାର ‘ମୋ ସରକାର କଲ୍ ସେଣ୍ଟର୍’ ଆରମ୍ଭ କରିଥିବା ବୈଠକରେ ସୂଚନା ଦିଆଯାଇଛି ।

ନରେଗାରେ ବର୍ତ୍ତମାନ ଦିନକୁ ୧୦ ଲକ୍ଷ ଶ୍ରମ ଦିବସ ସୃଷ୍ଟି ହୋଇଥିବା ବେଳେ ଏହାକୁ ଦୈନିକ ୨୦ ଲକ୍ଷକୁ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଥିବା ବୈଠକରେ ମୁଖ୍ୟ ଶାସନ ସଚିବ କହିଛନ୍ତି ।