ଅନୁତାପ ନାହିଁ, ଆତ୍ମବଡିମା ଦେଖାଇଲେ ମ୍ୟାଡାମ୍

ଭୁବନେଶ୍ୱର: କୋଭିଡ ନିୟମକୁ ବାରମ୍ବାର ଭାଙ୍ଗୁଥିବା ଅମାନିଆ ସାଂସଦ ଅପରାଜିତା ଷଡ଼ଙ୍ଗୀଙ୍କର ପଳାସପଲ୍ଲୀସ୍ଥିତ ଅଫିସ୍(ଏ-୫୬)କୁ ୧୫ ଦିନ ପାଇଁ ସିଲ୍ କରିଛି ବିଏମସି । ଜନ୍ମଦିନ ପାର୍ଟିରେ ଯୋଗଦେଇଥିବା ସମସ୍ତଙ୍କର ଏହି ସମୟରେ କୋଭିଡ ଟେଷ୍ଟ ହେବ ଏବଂ ସେହି ଅନୁଯାୟୀ ଅଫିସ ଘରକୁ ବିଶୋଧନ କରାଯିବ । ଗତ ଗୁରୁବାର ଦିନ ଏହି ଜାଗାରେ ସାଂସଦ ନିଜ ସମର୍ଥକଙ୍କ ଗହଣରେ ନାଚଗୀତ ସହ ଜନ୍ମଦିନ ପାଳିଥିଲେ । ସେଠାରେ ସାମାଜିକ ଦୂରତା ନ ଥିଲା କି କାହାରି ମୁହଁରେ ମାସ୍କ ନ ଥିଲା । ବିନା ମାସ୍କରେ ସାଂସଦ ସମସ୍ତଙ୍କୁ ଖାଇବାକୁ ବି ପରଷିିଥିଲେ ।

ତେବେ ସାଂସଦ ନିଜର ଭୁଲ୍ ବୁଝି ଅନୁତାପ କରିବା ପରିବର୍ତ୍ତେ ଓଲଟି ଆତ୍ମବଡ଼ିମା ଦେଖାଇଛନ୍ତି । ସିଲ୍ ହୋଇଥିବା ତାଙ୍କ ଅଫିସ ଆଗରେ ସାମ୍ବାଦିକ ସମ୍ମିଳନୀ ଡାକି ନିଜର କାର୍ଯ୍ୟଦକ୍ଷତା ବଖାଣିବା ସହ ରାଜ୍ୟ ସରକାର ଓ ବିଜେଡ଼ି ବିରୋଧରେ ହୁଙ୍କାର ମାରିଛନ୍ତି । କୋଭିଡ ଆଇନ ଉଲ୍ଲଂଘନ କରିଥିବା ବିଜେଡ଼ି ନେତାଙ୍କର ୧୭ ଟି ଫଟୋ ଏବଂ ଗୋଟିଏ ଭିଡ଼ିଓ ଦେଖାଇ ସେମାନଙ୍କ ବିରୋଧରେ କି କାର୍ଯ୍ୟାନୁଷ୍ଠାନ ହୋଇଛି ତାହାର ଜବାବ ମାଗି ବିଜେଡ଼ି ଅଫିସ୍ କେବେ ସିଲ୍ ହେବ ବୋଲି ପ୍ରଶ୍ନ କରିଛନ୍ତି । ଆସନ୍ତାକାଲି ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ୧୫ ଦିନ ସମୟ ନେବେ ବୋଲି ସାଂସଦ ଚେତାବନୀ ଦେଇଛନ୍ତି ।

ଲଜ୍ଜାର କଥା ହେଉଛି, ସାଂସଦଙ୍କ ଜନ୍ମଦିନ ପାର୍ଟିର ଭିଜୁଆଲ୍ ସାର୍ବଜନୀନ ହୋଇଥିଲେ ମଧ୍ୟ ସାଂସଦ କିନ୍ତୁ କୋଭିଡ୍ ନିୟମ ଭାଙ୍ଗିଛନ୍ତି ବୋଲି ମାନିବାକୁ ନାରାଜ । କୋଭିଡ ନିୟମ ଭାଙ୍ଗିନାହାନ୍ତି ବୋଲି ବିନା ସଙ୍କୋଚରେ କହୁଛନ୍ତି । ‘ପ୍ରଧାନମନ୍ତ୍ରୀ ମୋର ଆଦର୍ଶ, କୋଭିଡ ନିୟମ ଭଙ୍ଗ ପ୍ରଶ୍ନ ଉଠୁନି’ ବୋଲି ଆଜି ସାମ୍ବାଦିକ ସମ୍ମିଳନୀରେ ଦମ୍ଭ ଦେଖାଇଛନ୍ତି । ସାଂସଦ ଅପରାଜିତା ଲୋକଙ୍କୁ ଭକୁଆ ବନାଇବା ସହ ଖୋଦ୍ ପ୍ରଧାନମନ୍ତ୍ରୀଙ୍କୁ ବଦନାମ କରୁଥିବା ତାଙ୍କ ବକ୍ତବ୍ୟରୁ ସ୍ପଷ୍ଟ ହେଉଛି ।

ଉଲ୍ଲେଖଥାଉକି, କରୋନାରେ ସଂକ୍ରମିତ ଥାଇ ସ୍ୱର୍ଗତ ପ୍ରଦୀପ ମହାରଥୀଙ୍କ ଅନ୍ତେଷ୍ଟିରେ ଯୋଗଦେଇଥିବା ସତ୍ୟବାଦୀ ବିଧାୟକ ଉମା ସାମନ୍ତରାୟ ଆଜି ଏକ ଭିଡ଼ିଓ ବାର୍ତ୍ତାରେ ନିଜର ଭୁଲ୍ ପାଇଁ କ୍ଷମାପ୍ରାର୍ଥନା କରିଛନ୍ତି । ମହାରଥୀଙ୍କ ବିୟୋଗ ତାଙ୍କୁ ଅତ୍ୟନ୍ତ ମର୍ମାହତ କରିଥିଲା । ଭାବବିହ୍ୱଳ ହୋଇ ସ୍ୱର୍ଗଦ୍ୱାରରେ ପହଞ୍ଚି ଅନ୍ତେଷ୍ଟିରେ ଯୋଗଦେବା ତାଙ୍କର ବିରାଟ ଭୁଲ୍ ଥିଲା । ଆଇନ ଉପରେ କେହି ନୁହଁନ୍ତି । ଭୁଲ୍ ପାଇଁ ଦଣ୍ଡ ଭୋଗିବାକୁ ପ୍ରସ୍ତୁତ ବୋଲି ଉମା କହିଛନ୍ତି । ଗତକାଲି ଉମାଙ୍କ ବିରୋଧରେ ପୁରୀ ସମୂଦ୍ରକୂଳ ଥାନା ପୁଲିସ ଏପିମେଡିମ୍ ଆକ୍ଟରେ ମାମଲା ରୁଜୁ କରିସାରିଛି ।

କୋଭିଡ ନିୟମ ଉଲ୍ଲଂଘନ କରି ବିଧାୟକ କେସ୍ ଖାଇବା ଏବଂ ନିଜର ଭୁଲ୍ ବୁଝି ସର୍ବସାଧାରଣରେ କ୍ଷମା ମାଗିଥିବା ବେଳେ ସାଂସଦ କିନ୍ତୁ ନଛୋଡ଼ବନ୍ଧା । ଅପରାଜିତାଙ୍କ ଅମାନିଆ ଆଚରଣ ତାଙ୍କ ଦଳ ପାଇଁ ବି ଅଡୁଆ ସୃଷ୍ଟି କରିଛି । ଜନ୍ମଦିନରେ କୋଭିଡ କଟକଣା ଭାଙ୍ଗି ନାଚଗୀତ କରିଥିବା ସାଂସଦଙ୍କ ଅଫିସ୍ ସିଲ୍ ହେବା ପରେ ସେ ଏହାକୁ ରାଜନୈତିକ ରଙ୍ଗ ଦେବାକୁ ଉଦ୍ୟମ କରିଥିଲେ ମଧ୍ୟ ଦଳ ତାଙ୍କ ସମର୍ଥନରେ ବାହାରିନାହିଁ । ଆଜି ସାମ୍ବାଦିକମାନଙ୍କ ପ୍ରଶ୍ନରେ ଦଳର ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି, କୋଭିଡ ନିୟମ ସମସ୍ତେ ମାନିବା ଦରକାର ।

ସେପଟେ ବିଜେଡ଼ି ମୁଖପାତ୍ର ଶ୍ରୀମତୀ ସୁଲତା ଦେ କହିଛନ୍ତି, କୌଣସି କୋଠାକୁ ସିଲ୍ କରିବା ହେଉଛି ପ୍ରଶାସନିକ ନିଷ୍ପତ୍ତି । ସାଧାରଣ ଲୋକଙ୍କ ଧନ ଜୀବନର ସୁରକ୍ଷା ଦୃଷ୍ଟିରୁ ପ୍ରଶାସନ ପକ୍ଷରୁ ସମଗ୍ର ରାଜ୍ୟରେ ଅନେକ କୋଠା, ହୋଟେଲ ଆଦିକୁ ସିଲ୍ କରାଯାଇଛି । ଲୋକଙ୍କ ସ୍ୱାର୍ଥ ଦୃଷ୍ଟିରୁ ଆବଶ୍ୟକ ପଡ଼ିଲେ ଏଭଳି ସିଲ୍ କରାଯିବ । ସେଥିରେ ବିଜେଡ଼ି କୌଣସି ମତାମତ ଦେବାକୁ ଚାହେଁନାହିଁ । ବିଜେପି, ବିଜେଡ଼ି, କଂଗ୍ରେସ କିମ୍ବା ଅନ୍ୟ କୌଣସି ରାଜନୈତିକ ଦଳକୁ ଦେଖି କରୋନା ସଂକ୍ରମିତ କରେନାହିଁ । ଏହା ହେଉଛି ମାନବିକତା ଏବଂ ଆମେ ସମସ୍ତେ କୋଭିଡ ନିୟମ ମାନି ଏହି ମହାମାରୀ ବିରୋଧରେ ଏକଜୁଟ ହୋଇ ଲଢ଼େଇ କରିବାର ଅଛି ।

ବାରମ୍ବାର କୋଭିଡ ନିୟମ ଉଲ୍ଲଂଘନ କରୁଥିବା ଅପରାଜିତାଙ୍କ ବିରୋଧରେ କୋଭିଡ ଯୋଦ୍ଧାମାନେ ଏକାଠି ହୋଇଛନ୍ତି । ଡାକ୍ତର, ନର୍ସ, ସ୍ୱାସ୍ଥ୍ୟକର୍ମୀ ଏବଂ ଅନ୍ୟ କୋଭିଡ ଯୋଦ୍ଧାଙ୍କ ଏକ ଦଳ ଆଜି ଡିସିପିଙ୍କୁ ଭେଟି ସାଂସଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । କରୋନା ମହାମାରୀ ବେଳେ ସାଂସଦଙ୍କର ଏଭଳି କାର୍ଯ୍ୟ ଲୋକଙ୍କ ଜୀବନକୁ ବାଜି ଲଗାଉଥିବା ବେଳେ ଦିନରାତି ଅକ୍ଲାନ୍ତ ପରିଶ୍ରମ କରୁଥିବା କୋଭିଡ ଯୋଦ୍ଧାଙ୍କୁ ସାଂସଦ ତାତ୍ସଲ୍ୟ କରୁଥିବା ସେମାନେ ଦର୍ଶାଇଛନ୍ତି ।

ସୂଚନାଥାଉକି, ସାଂସଦ ଅପରାଜିତା ଷଡ଼ଙ୍ଗୀ ପ୍ରଥମରୁ କୋଭିଡ କଟକଣା ମାନୁନଥିବା ଦେଖିବାକୁ ମିଳୁଛି । ସୋସିଆଲ୍ ମିଡ଼ିଆରେ ଏହାର ଗଣ୍ଡା ଗଣ୍ଡା ଫଟୋ ୬ ମାସ ହେଲା ଘୂରି ବୁଲୁଛି । ସମସ୍ତଙ୍କ ସାମନାରେ ବାରମ୍ବାର କୋଭିଡ କଟକଣା ଭାଙ୍ଗୁଥିଲେ ବି କୋଭିଡ କଟକଣା ଭାଙ୍ଗୁନାହାନ୍ତି ବୋଲି ଦମ୍ଭ ଦେଖାଇ ସତେ ଯେମିତି ସମସ୍ତଙ୍କୁ ତାତ୍ସଲ୍ୟ କରୁଛନ୍ତି ।

ଆଇଏଏସ୍ ଚାକିରିରୁ ରାଜନୀତିକୁ ଆସି ପ୍ରଥମେ ସାଂସଦ, ପରେ ରାଜ୍ୟ ଉପସଭାପତି ଏବଂ ଏବେ ଦଳର ଜାତୀୟ ମୁଖପାତ୍ର ହୋଇଥିବା ଅପରାଜିତା ଷଡ଼ଙ୍ଗୀଙ୍କଠାରୁ ଏଭଳି ଆଚରଣ ଆଶା କରାଯାଏନି ବୋଲି ବୁଦ୍ଧିଜୀବୀମହଲରେ ଚର୍ଚ୍ଚା ହେଉଛି । ଅନ୍ୟ ଉପରକୁ ଅଙ୍ଗୁଳି ନ ଉଠାଇ ଆଗ ନିଜକୁ ଦେଖନ୍ତୁ ଏବଂ ନିଜର ଭୁଲ୍ ସ୍ୱୀକାର କରି କୋଭିଡ କଟକଣା ମାନନ୍ତୁ ବୋଲି ସୋସିଆଲ୍ ମିଡ଼ିଆରେ ତାଙ୍କର କିଛି ଶୁଭେଚ୍ଛୁ ପରାମର୍ଶ ଦେଇଛନ୍ତି ।