ନୂଆଦିଲ୍ଲୀ: ଏନଡିଏର ରାଷ୍ଟ୍ରପତି ପ୍ରାର୍ଥୀ ଶ୍ରୀମତୀ ଦ୍ରୌପଦୀ ମୁର୍ମୁ ଆଜି ନାମାଙ୍କନପତ୍ର ଦାଖଲ କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବିଜେପି ସଭାପତି ଜେ.ପି.ନଡ୍ଡା, ଗୃହମନ୍ତ୍ରୀ ଅମିତ୍ ଶାହା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ସମେତ ଦଳର ବରିଷ୍ଠ ନେତୃବୃନ୍ଦ, ସହଯୋଗୀ ଦଳର ନେତା ଏବଂ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ଗହଣରେ ସେ ତାଙ୍କର ନାମାଙ୍କନ ପତ୍ର ଦାଖଲ କରିଛନ୍ତି । ବିଜେଡି ପକ୍ଷରୁ ଓଡ଼ିଶାରୁ ଦୁଇ କ୍ୟାବିନେଟ୍ ମନ୍ତ୍ରୀ ଜଗନ୍ନାଥ ସାରକା, ଟୁକୁନି ସାହୁ, ସାଂସଦ ଡ. ସସ୍ମିତ୍ ପାତ୍ର ଏବଂ ୧୦ ବିଜେପି ବିଧାୟକ ମଧ୍ୟ ଉପସ୍ଥିତ ଥିଲେ ।
ଆଜି ଦିନ ୧୧ଟାରେ ଓଡ଼ିଶା ଭବନରୁ ବାହାରି ଶ୍ରୀମତୀ ମୁର୍ମୁ ସିଧା ପାର୍ଲାମେଣ୍ଟ ଭବନ ଯାଇଥିଲେ । ପ୍ରଧାନମନ୍ତ୍ରୀ ଓ ଅନ୍ୟମାନଙ୍କ ଗହଣରେ ରିଟର୍ଣ୍ଣିଂ ଅଫିସରଙ୍କ ପାଖକୁ ଯାଇ ୪ ସେଟ୍ ନାମାଙ୍କନ ପତ୍ର ଦାଖଲ କରିଥିଲେ । ପ୍ରଥମ ସେଟ୍ ରେ ପ୍ରଥମ ପ୍ରସ୍ତାବକ ଅଛନ୍ତି ପ୍ରଧାନମନ୍ତ୍ରୀ ଶ୍ରୀ ମୋଦି । ଅନ୍ୟମାନଙ୍କ ସହ ବିଜେଡି ପକ୍ଷରୁ ଦୁଇ କ୍ୟାବିନେଟ୍ ମନ୍ତ୍ରୀ ଜଗନ୍ନାଥ ସାରକା ଏବଂ ଟୁକୁନି ସାହୁ ମଧ୍ୟ ପ୍ରସ୍ତାବକ ଅଛନ୍ତି ।
ଶ୍ରୀମତୀ ମୁର୍ମୁଙ୍କ ପ୍ରାର୍ଥୀତ୍ୱକୁ ବିଜେଡି ପ୍ରଥମରୁ ସମର୍ଥନ କରିଥିବା ବେଳେ ଆଜି ୱାଇଏସଆର କଂଗ୍ରେସ ସମର୍ଥନ ଘୋଷଣା କରିଥିଲା । ମୁଖ୍ୟମନ୍ତ୍ରୀ ଜଗନ ରେଡ୍ଡୀଙ୍କ ନିର୍ଦ୍ଦେଶରେ ନାମାଙ୍କନପତ୍ର ଦାଖଲ ବେଳେ ଦଳର ଦୁଇ ସାଂସଦ ଉପସ୍ଥିତ ଥିଲେ । ପୂର୍ବରୁ ନୀତିଶ କୁମାରଙ୍କ ଜେଡି(ୟୁ) ଶ୍ରୀମତୀ ମୁର୍ମୁଙ୍କୁ ସମର୍ଥନ ଘୋଷଣା କରିଥିଲେ ।
ଶ୍ରୀମତୀ ମୁର୍ମୁ ଆଜି ନାମାଙ୍କନପତ୍ର ଦାଖଲ କରିବା ପୂର୍ବରୁ ସୋନିଆ ଗାନ୍ଧୀ, ମମତା ବାନାର୍ଜୀ, ଶରଦ ପାୱାରଙ୍କ କଥା ହୋଇ ସମର୍ଥନ ଲୋଡ଼ିଥିବା ଜଣାପଡ଼ିଛି । ଆସନ୍ତା ୨୭ ତାରିଖରେ ମିଳିତ ବିରୋଧୀ ଦଳର ପ୍ରାର୍ଥୀ ଯଶୱନ୍ତ ସିହ୍ନା ନାମାଙ୍କପତ୍ର ଦାଖଲ କରିବେ । ତେବେ ବିଜେଡି ଓ ୱାଇଏସଆର କଂଗ୍ରେସର ସମର୍ଥନ ପାଇବା ପରେ ଦ୍ରୌପଦ୍ରୀ ମୁର୍ମୁଙ୍କୁ ବିଜୟ ଆଶା ସୁନିଶ୍ଚିତ ହୋଇଯାଇଛି ।
ଜୁଲାଇ ୧୮ ତାରିଖରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବ ।
