ଭୁୁବନେଶ୍ୱର: ନିଜର ଅସ୍ଥିତ୍ୱ ପାଇଁ ସଂଗ୍ରାମ କରୁଥିବା ଓଡ଼ିଶା ବିଜେପି ପାଇଁ ଧାମନଗର ଉପନିର୍ବାଚନ ଜିତାପଟ ସଞ୍ଜିବନୀ ହୋଇଛି । ଦଳୀୟ କର୍ମୀ ଓ କର୍ମକର୍ତ୍ତାଙ୍କ ଆତ୍ମବିଶ୍ୱାସ ଏବଂ ମନୋବଳକୁ ଏହା ଜାଗ୍ରତ କରିଛି । ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ଓଡ଼ିଶା ବିଜେପି ଯେ ଆଗକୁ ବଢ଼ିବ, ତାହା ଏହି ଉପନିର୍ବାଚନ ଫଳାଫଳରୁ ଆଭାସ ମିଳିଛି ।
ଧାମନଗରରେ ବିଜେପି ବୃହତ୍ତ ବିଜୟ ହାସଲ କରିଛି । ଏଭଳି ବିଜୟକୁ ବିଜେପି ନେତୃତ୍ୱ ମଧ୍ୟ ଆକଳନ କରି ନ ଥିଲେ । ତେବେ ସେ ଯାହା ହେଉ, ଶାସକ ଦଳକୁ ସଫଳ ଭାବେ ସାମନା କରିବାର ଏହି ଦୃଷ୍ଟାନ୍ତ ବିଜେପି ପାଖରେ ପୂର୍ବ ଉପନିର୍ବାଚନ ଗୁଡ଼ିକରେ ଦେଖିବାକୁ ମିଳି ନ ଥିଲା । ଧାମନଗରରେ ବିଜେପିର ଏହି ସଫଳତା ପଛରେ ତିନୋଟି ପ୍ରମୁଖ କାରଣ ଆଲୋଚନା ହେଉଛି ।
ପ୍ରଥମଟି ହେଉଛି, ଯୋଗ୍ୟ ପ୍ରାର୍ଥୀ ଏବଂ ଅନୁକମ୍ପା । ସ୍ୱର୍ଗତ ବିଷ୍ଣୁ ସେଠୀଙ୍କ ୨୭ ବର୍ଷୀୟ ପୁଅ ସୂର୍ଯ୍ୟବଂଶୀ ସୂରଜ ଖାଲି ଉଚ୍ଚଶିକ୍ଷିତ ନୁହଁନ୍ତି ବେଶ୍ ମାର୍ଜିତ ମଧ୍ୟ । ବୟସ ଛୋଟ ହେଲେ ମଧ୍ୟ କଥା ଓ କାମରେ ରାଜନୈତିକ ପରିପକ୍ୱତା ରହିଛି । ତାଙ୍କର ଅପିଲ୍ ଓ ଭାଷଣ ସାଧାରଣ ଭୋଟରଙ୍କୁ ଆକୃଷ୍ଟ କରିବା ପାଇଁ ଯଥେଷ୍ଟ । ଦିବଙ୍ଗତ ବାପାଙ୍କ ଲୋକପ୍ରିୟତା ଏବଂ ନିଜର ଦକ୍ଷତା ଭୋଟରଙ୍କ ଅନୁକମ୍ପା ହାସଲ ପାଇଁ ଯଥେଷ୍ଟ ଥିଲା ।
ଦ୍ୱିତୀୟ କାରଣ ହେଉଛି, ଧାମନଗରରେ ଏକଜୁଟ ହୋଇ ଲଢ଼ିଥିଲା ବିଜେପି । ନିକଟ ଅତୀତରେ ହୋଇଥିବା କୌଣସି ଉପନିର୍ବାଚନରେ ବିଜେପି ଏଭଳି ମନପ୍ରାଣ ଦେଇ ଲଢ଼େଇ କରିବାର ଦେଖିବାକୁ ମିଳି ନ ଥିଲା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରତ୍ୟକ୍ଷ ଭାବେ ଉପନିର୍ବାଚନ ପରିଚାଳନା କରିଥିଲେ ଏବଂ ତିନି ଦିନ କାଳ ସେଠି ପ୍ରଚାର କରିଥିଲେ । ରାଜ୍ୟ ସଭାପତି ସମୀର ମହାନ୍ତି ମଧ୍ୟ ସେଠାରେ ପଡ଼ି ରହିଥିଲେ । ସ୍ଥାନୀୟ ଅଞ୍ଚଳର ଲୋକପ୍ରିୟ ନେତା ପୂର୍ବତନ ମନ୍ତ୍ରୀ ମନମୋହନ ସାମଲଙ୍କ ଉପରେ ଧର୍ମେନ୍ଦ୍ର ସମ୍ପୂର୍ଣ୍ଣ ଭରସା କରିଥିଲେ । ମନମୋହନଙ୍କ ପରିଚାଳନାରେ କର୍ମକର୍ତ୍ତାମାନେ ସେଠି ପ୍ରଚାର ଅଭିଯାନକୁ ତ୍ୱରାନ୍ୱିତ କରିଥିଲେ । ବିଜେଡିର ଭୋଟ ଏଜେନ୍ସୀଗୁଡ଼ିକୁ ଭଲ ଭାବେ ଟକ୍କର ଦେବାକୁ ବିଜେପି ଟିମ୍ ସମର୍ଥ ହୋଇଥିଲେ ।
ତୃତୀୟ ଗୁରୁତ୍ୱପୂର୍ଣ୍ଣ କାରଣ ହେଉଛନ୍ତି ସ୍ୱାଧୀନ ପ୍ରାର୍ଥୀ ରାଜେନ୍ଦ୍ର ଦାସ । ବିଜେଡ଼ି ବିଦ୍ରୋହୀ ଭାବେ ସେ ବିଜେଡି ଭୋଟବ୍ୟାଙ୍କକୁ ହିଁ ଭାଙ୍ଗିବାକୁ ଉଦ୍ୟମ କରିଥିଲେ । ନିଜ ସପକ୍ଷରେ ଭୋଟ ନହେଲେ ନାହିଁ ଶେଷ ପର୍ଯ୍ୟନ୍ତ ଦୋଦୁଲ୍ୟମାନ ଅବସ୍ଥାରେ ଥିବା ତାଙ୍କର ସମର୍ଥକମାନଙ୍କୁ ସେ ବିଜେପି ପ୍ରାର୍ଥୀଙ୍କୁ ଭୋଟ ଦେବାକୁ ପ୍ରବର୍ତ୍ତାଇଥିଲେ ବୋଲି କୁହାଯାଉଛି । ବିଜେପି ସପକ୍ଷରେ ମିଳିଥିବା ଭୋଟରୁ ଏହା ସତ ବୋଲି ବାରି ହେଉଛି ।
ତେବେ ସେ ଯାହା ହେଉ, ଆଗକୁ ପଦ୍ମପୁର ଉପନିର୍ବାଚନ ଏବଂ ଦେଢ଼ବର୍ଷ ପରେ ସାଧାରଣ ନିର୍ବାଚନ । ବିଜେପି ଏହାକୁ ସାମନା କରିବାର ମନୋବଳ ଧାମନଗର ଫଳାଫଳ ସୁଯୋଗ ଆଣିଦେଇଛି । ବିଜେପି ଏଥିରେ କିଭଳି ସଫଳ ହେବ ତାହା ଭବିଷ୍ୟତ କହିବ ।
