ଭୁବନେଶ୍ୱର: ‘ସମ୍ବାଦ’ ସମ୍ପାଦକ ଏବଂ ଇଷ୍ଟର୍ଣ୍ଣ ମିଡିଆ ଲିମିଟେଡ୍ ଅଧ୍ୟକ୍ଷ ପଦରୁ ସୌମ୍ୟରଞ୍ଜନ ପଟ୍ଟନାୟକ ଅବ୍ୟାହତି ନେଇଛନ୍ତି । ତାଙ୍କ ଜାଗାରେ ଝିଅ ତନୟା ପଟ୍ଟନାୟକ ‘ସମ୍ବାଦ’ର ନୂତନ ସମ୍ପାଦକ ଭାବେ ଦାୟିତ୍ୱ ନେଇଛନ୍ତି । ବ୍ୟକ୍ତିଗତ କାରଣରୁ ସେ ଦାୟିତ୍ୱରୁ ଅବ୍ୟାହତି ନେଇଥିବା ‘ସମ୍ବାଦ’ ଖବରରେ କୁହାଯାଇଛି । ସୌମ୍ୟଙ୍କର ଏହି ଅପ୍ରତ୍ୟାଶିତ ନିଷ୍ପତ୍ତିକୁ ନେଇ ହଟଚମଟ ସୃଷ୍ଟି ହୋଇଛି । ୪୦ ବର୍ଷ ତଳେ ସମ୍ବାଦକୁ ନିଜ ହାତରେ ଗଢ଼ି ସମ୍ପାଦକ ଦାୟିତ୍ୱ ତୁଲାଇ ଆସୁଥିବା ସୌମ୍ୟଙ୍କର ଏଭଳି ନିଷ୍ପତ୍ତି ପଛରେ ବିଭିନ୍ନ କାରଣକୁ ନେଇ ଚର୍ଚ୍ଚା ହେଉଛି ।
ଇଷ୍ଟର୍ଣ୍ଣ ମିଡିଆ ଏବଂ ସମ୍ବାଦ ପରିବାର ଦାୟିତ୍ୱରୁ ସୌମ୍ୟବାବୁ ଅବ୍ୟାହତି ନେଉଥିବା ଖୋଦ୍ ତାଙ୍କ କର୍ମଚାରୀମାନେ ଗତକାଲି ବିଳମ୍ବିତ ସଂଧ୍ୟା ପର୍ଯ୍ୟନ୍ତ ଟେର୍ ପାଇ ନ ଥିଲେ । ଆସନ୍ତା ୪ ତାରିଖରେ ‘ସମ୍ବାଦ’ ୪୦ ବର୍ଷରେ ପଦାର୍ପଣ କରିବାକୁ ଯାଉଥିବାରୁ ୩ ତାରିଖ ଅପରାହ୍ନରେ ସ୍ୱସ୍ତି ପ୍ରିମିୟମ୍ ରେ ଆୟୋଜିତ ବାର୍ଷିକ ଉତ୍ସବ ପାଳନ ପାଇଁ ବରଂ ସମସ୍ତେ ପ୍ରସ୍ତୁତିରେ ବ୍ୟସ୍ତ ଥିଲେ । ସେହି ଉତ୍ସବର ଉଦଘାଟକ ଭାବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ମୁଖ୍ୟ ଅତିଥି ଭାବେ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ଯୋଗଦେବାର କାର୍ଯ୍ୟକ୍ରମ ଅଛି । ସମ୍ପାଦକ ଭାବେ ସୌମ୍ୟବାବୁ ଅତିଥି ଓ ଅନ୍ୟମାନଙ୍କୁ ନିମନ୍ତ୍ରଣ ପତ୍ର ବି ଦେଇଛନ୍ତି ।
ମାତ୍ର ରାତିରେ ଅଚାନକ ସୌମ୍ୟଙ୍କ ଅବ୍ୟାହତି ଏବଂ ଝିଅ ତନୟାଙ୍କ କାର୍ଯ୍ୟଭାର ଖବରଟି ସମ୍ବାଦ ପ୍ରଥମ ପୃଷ୍ଠାକୁ ଆସିଥିଲା । ସକାଳୁ ସକାଳୁ ଏହି ଖବର ବିଜୁଳି ବେଗରେ ପ୍ରଚାରିତ ହେଲା ପରେ ଏହାର କାରଣକୁ ନେଇ ଅନେକ ଚର୍ଚ୍ଚା ଲାଗି ରହିଛି ।
