ଭୁବନେଶ୍ୱର: ରାଜଧାନୀ ଛାତି ଉପରେ ଆଖି ଖୋସିଲା ଭଳି ଚାରି ଚାରିଟା କୋଠା । ପାଞ୍ଚ ପାଞ୍ଚଟି ପ୍ଲଟ୍ । ପୈତୃକ ସ୍ଥାନ ବ୍ରହ୍ମପୁରରେ ଚକଚକିଆ କୋଠା । ଭୁବନେଶ୍ୱର ସରକାରୀ କ୍ୱାର୍ଟର୍ସର ସାଜ୍ଜସଜ୍ଜାରେ ରାଜକୀୟ ଛାପ । ଦାମୀ ଆସବାବପତ୍ରରେ ଘର ଫୁଲ୍ । ମିଳିଲାଣି ନଗଦ ଲକ୍ଷେ ୨୦ ହଜାର ଟଙ୍କା । ଅଧ କିଲେ ସୁନା । ଏକାଧିକ ବ୍ୟାଙ୍କ ଆକାଉଣ୍ଟରେ ରହିଛି ପାଖାପାଖି ଦେଢ଼କୋଟି ଟଙ୍କା ।
ଏହି ବିଶାଳ ସମ୍ପତ୍ତିର ମାଲିକ ବନିଛନ୍ତି ସରକାରୀ ବାବୁ ପ୍ରଶାନ୍ତ କୁମାର ଗନ୍ତାୟତ । ସରୁ ଚିକଣ କଥା କହୁଥିବା ହୃଷ୍ଟପୃଷ୍ଟିଆ ଚେହେରାଧାରୀ ଏହି ବାବୁ ଭୁବନେଶ୍ୱରରେ ମୁଖ୍ୟ ଯୋଗାଣ ଅଧିକାରୀ ଭାବେ ଅବସ୍ଥାପିତ ଅଛନ୍ତି । ବାପ ସମ୍ପତ୍ତି ନୁହେଁ, ଚାକିରି କାଳରେ ଅର୍ଜିଛନ୍ତି ସେ ଏହି ସମ୍ପତ୍ତି । ନିଜର ଦରମା ଟଙ୍କାରେ ଏତେ ସମ୍ପତ୍ତି କରିବା ବିଲକୁଲ୍ ସମ୍ଭବ ନ ଥିବା ବେଳେ ସେ କିନ୍ତୁ ଢ଼େର୍ କମେଇ ସାରିଲେଣି । କୋଉଠୁ କେମିତି ଅର୍ଜିଲେ ତାହା ଲେଖିବାର ଆବଶ୍ୟକତା ନାହିଁ ।
ଏହି ବାବୁଙ୍କର ସମ୍ପତ୍ତି ତାଲିକା ଉପରେ ଟିକେ ନଜର ପକାନ୍ତୁ ।
– ଭୁବନେଶ୍ୱର ପାଣ୍ଡରାରେ ୪୮୦୦ ବର୍ଗଫୁଟ ଜାଗା ଉପରେ ତିନି ମହଲା କୋଠା
– ଭୁବନେଶ୍ୱର ଚନ୍ଦ୍ରଶେଖରପୁରରେ ଦୁଇ ମହଲା କୋଠା(ଭିଆଇଏମ-୧୯୨)
– ଭୁବନେଶ୍ୱରର ବଡ଼ଗଡ଼ କେନାଲ୍ ରୋଡ୍ ରେ ଏକ ଆପାର୍ଟମେଣ୍ଟ(ନୀଳାଚଳ ସିଟି)
– ବ୍ରହ୍ମପୁରର ଭବାନୀପୁରରେ ଏକ ଆପାର୍ଟମେଣ୍ଟ(ନୀଳାଚଳ ହାଇଟସ୍)
– ଭୁବନେଶ୍ୱରର ମୁଖ୍ୟ ଜାଗାରେ ତିନୋଟି ପ୍ଲଟ୍ କୁ ମିଶାଇ ୫ଟି ପ୍ଲଟ୍ ।
(ପାଣ୍ଡରାରେ ୩୦୦୦ ବର୍ଗଫୁଟ ଜାଗାର ପ୍ଲଟ୍, ବଙ୍କୁଆଳରେ ପ୍ଲଟ୍( ନଂ ୧୦୯୯), ଗଞ୍ଜାମ ଜିଲ୍ଲା ଗୋଲନ୍ଥରା ଅନ୍ତର୍ଗତ ମଦନମୋହନପୁରରେ ୦.୪୧୦ ଡିସିମିଲ୍ ପ୍ଲଟ୍, ଖୋର୍ଦ୍ଧା ଜଗାସାରାରେ ୨୪୦୦ ବର୍ଗଫୁଟର ପ୍ଲଟ୍)
– ୫୩୬ ଗ୍ରାମ୍ ର ସୁନା
– ୧.୩୭ କୋଟିର ବ୍ୟାଙ୍କ, ଇନସୁରାନ୍ସ ଡିପୋଜିଟ୍
– ନଗଦ ୧ ଲକ୍ଷ ୨୧ ହଜାର ୯୬୦ ଟଙ୍କା
– ଗୋଟେ ହୋଣ୍ଡା ଆମେଜ୍ କାର, ଦୁଇଟା ମଟରସାଇକେଲ
ଆଜି ସକାଳୁ ପ୍ରଶାନ୍ତ ଗନ୍ତାୟତଙ୍କର ଘର ଓ ଅଫିସ ମିଶାଇ ଭୁବନେଶ୍ୱର ଓ ଗଞ୍ଜାମର ୮ଟି ଜାଗାରେ ଚଢ଼ଉ ଚାଲିଛି । ଟିମ୍ ରେ ସାମିଲ ଅଛନ୍ତି ୮ ଡିଏସପି, ୫ ଇନସପେକ୍ଟର ସମେତ ଅନ୍ୟ କର୍ମଚାରୀ । ଅପରାହ୍ନ ୩ ଟା ସୁଦ୍ଧା ଏହିସବୁ ସମ୍ପତ୍ତି ଠାବ ହେଲାଣି । ଚଢ଼ଉ ଜାରି ରହିଥିବାରୁ ଆହୁରି ଅଧିକ ସମ୍ପତ୍ତି ଠାବ ହେବାର ସମ୍ଭାବନା ଥିବା ଭିଜିଲାନସ୍ ସୂତ୍ରରୁ ଖବର ମିଳିଛି ।
