କଟକ: ବହୁ ଚର୍ଚ୍ଚିତ ଅନୁଭବ-ବର୍ଷା ବିବାହ ବିଚ୍ଛେଦ କାହାଣୀରେ କ୍ଲାଇମାକ୍ସ ଆସିଛି । ଏହି ଓଲିଉଡ୍ ଷ୍ଟାର ଦମ୍ପତ୍ତିଙ୍କ ବିବାହ ବିଚ୍ଛେଦ ପାଇଁ ଓଡ଼ିଶା ହାଇକୋର୍ଟ ଅନୁମତି ଦେଇଛନ୍ତି । ଅଭିନେତା ତଥା କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି ତାଙ୍କ ପତ୍ନୀ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କୁ ଛାଡ଼ପତ୍ର ଦେବା ପାଇଁ କୋର୍ଟରେ ଆବେଦନ କରିଥିବା ବେଳେ ବର୍ଷା କିନ୍ତୁ ତାଙ୍କ ସହ ରହିବାକୁ ଜିଦ୍ ଧରିଥିଲେ । ଉଭୟଙ୍କ ମଧ୍ୟରେ ମିଳାମିଶା ଉଦ୍ୟମରେ ଫେଲ୍ ହୋଇଥିଲେ ମଧ୍ୟ ପରିବାର ଅଦାଲତ ଏହି ମାମଲାର ଶୁଣାଣି କରି ସେମାନଙ୍କ ବିବାହ ବିଚ୍ଛେଦକୁ ଅନୁମତି ଦେଇ ନ ଥିଲେ । ଉଭୟ ଏକାଠି ରହିପାରିବେନି ବୋଲି ମଧ୍ୟ ରାୟ ଶୁଣାଇଥିଲେ । ପରିବାର ଅଦାଲତଙ୍କ ଏହି ରାୟଙ୍କ ଚାଲେଂଜ କରି ଅନୁଭବ ହାଇକୋର୍ଟଙ୍କୁ ନ୍ୟାୟ ଭିକ୍ଷା କରିଥିଲେ । ଅନୁଭବଙ୍କ ଆବେଦନ ଆଧାରରେ ପରିବାର ଅଦାଲତଙ୍କ ରାୟକୁ ହାଇକୋର୍ଟ ଖାରଜ କରି ଦେଇଛନ୍ତି ।
ହାଇକୋର୍ଟରେ ଅନୁଭବ ତାଙ୍କର ପୁରୁଣା ଯୁକ୍ତି ଉପସ୍ଥାପିତ କରିଥିଲେ । କହିଥିଲେ, ବର୍ଷାଙ୍କ ସହିତ ତାଙ୍କର ବିବାହ କେବଳ କାଗଜପତ୍ରରେ ସୀମିତ ଥିଲା । ସେମାନଙ୍କ ମଧ୍ୟରେ ବୈବାହିକ ସମ୍ପର୍କ ନ ଥିଲା । ବର୍ଷା ତାଙ୍କଠାରୁ ଦୂରେଇ ରହୁଥିଲେ । ତାଙ୍କ ପରିବାର ଲୋକଙ୍କୁ ମଧ୍ୟ ଦୁର୍ବ୍ୟବହାର କରୁଥିଲେ । ମାନସିକ ଓ ଶାରୀରିକ ଭାବେ ସେମାନେ ସମ୍ପର୍କରେ ନ ଥିବାରୁ ବିବାହ ବିଚ୍ଛେଦ ଆବେଦନକୁ ଅନୁମତି ଦେବା ପାଇଁ ଅନୁଭବ ହାଇକୋର୍ଟ ବିଚାରପତିଙ୍କୁ ନିବେଦନ କରିଥିଲେ ।
ଗତ ସେପ୍ଟେମ୍ବର ୨୩ ରେ ପରିବାର ଅଦାଲତ ଏହି ମାମଲାରେ ରାୟ ଶୁଣାଇଥିଲେ । ଅଦାଲତ ଉଭୟ ଅନୁଭବ ଓ ବର୍ଷାଙ୍କ ଆବେଦନକୁ ଗ୍ରହଣ କରି ନ ଥିଲେ । ଅନୁଭବ ବିବାହ ବିଚ୍ଛେଦ ପାଇଁ ଆବେଦନ କରିଥିବା ବେଳେ ବର୍ଷା ସ୍ୱାମୀ-ସ୍ତ୍ରୀ ଭାବେ ଏକାଠି ରହିବାକୁ ଆବେଦନ କରିଥିଲେ । ତେବେ ପରିବାର ଅଦାଲତଙ୍କ ରାୟ ସେତେବେଳେ ଚର୍ଚ୍ଚାର ବିଷୟ ହୋଇଥିଲା । ଏହି ରାୟ ବିରୋଧରେ ଗତ ଅକ୍ଟୋବର ମାସରେ ଅନୁଭବ ମହାନ୍ତି ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।
ତେବେ ଆଜିର ହାଇକୋର୍ଟଙ୍କ ରାୟ ପରେ ବର୍ଷାଙ୍କ ପକ୍ଷରୁ କୌଣସି ପ୍ରତିକ୍ରିୟା ଏପର୍ଯ୍ୟନ୍ତ ଆସିନାହିଁ ।
ସୂଚନାଥାଉକି, ଓଲିଉଡ୍ ର ଏହି ବହୁ ଚର୍ଚ୍ଚିତ ଯୋଡି ଅନୁଭବ ଓ ବର୍ଷା ୨୦୧୪ ଫେବଅୁଆରୀ ମାସରେ ବିବାହ କରିଥିଲେ । ତେବେ ୨୦୧୬ ଠାରୁ ଉଭୟଙ୍କ ମଧ୍ୟରେ ବିବାଦ ଉପୁଜିଥିଲା । ୨୦୨୦ ମସିହାରେ ତାହା ସାଂଘାତିକ ରୂପ ନେଇ ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଯାଇଥଇଲା । ଦିଲ୍ଲୀ ପଟିଆଲା ହାଉସ୍ କୋର୍ଟରେ ଅନୁଭବ ଛାଡ଼ପତ୍ର ମାମଲା କରିଥିବା ବେଳେ ବର୍ଷା ଅନୁଭବଙ୍କ ବିରୋଧରେ ଓଡ଼ିଶା ହାଇକୋର୍ଟରେ ପାରିବାରିକ ହିଂସା ଅଭିଯୋଗ ଆଣିଥିଲେ । ପରବର୍ତ୍ତୀ ସମୟରେ ମାମଲା ଓଡ଼ିଶା ପରିବାର ଅଦାଲତକୁ ସ୍ଥାନାନ୍ତର ହୋଇଥିଲା ।
