ବିଜେପି-ବିଜେଡି ବିରୋଧରେ ବର୍ଷିଲେ ରାହୁଲ

ଭୁବନେଶ୍ୱର: ‘ଭାରତ ଯୋଡ଼ୋ ନ୍ୟାୟ ଯାତ୍ରା’ରେ ଓଡ଼ିଶା ଆସିଥିବା ରାହୁଲ ଗାନ୍ଧୀ ଗତକାଲି ପ୍ରଥମ ଦିନରେ ରାଜ୍ୟର ବିଜେଡି ସରକାରଙ୍କ ବିରୋଧରେ ପାଟି ଖୋଲି ନ ଥିଲେ । କେବଳ ମୋଦୀ ସରକାରଙ୍କୁ ଟାର୍ଗେଟ୍ ରେ ଭାଷଣ ସୀମିତ ରଖିଥିଲେ । ମାତ୍ର ଆଜି ଯାତ୍ରାର ଦ୍ୱିତୀୟ ଦିନରେ ସେ ରାଜ୍ୟର ନବୀନ ସରକାର ଏବଂ କେନ୍ଦ୍ରର ମୋଦୀ ସରକାରଙ୍କର ବିରୋଧରେ ପ୍ରବଳ ବର୍ଷିଛନ୍ତି । ଉଭୟ ଦଳର ଭାଗିଦାରୀରେ ଏଠି ସରକାର ଚାଲିଥିବା ରାହୁଲ କଡ଼ା ଆକ୍ଷେପ କରିଛନ୍ତି ।

ଆଜି ସକାଳେ ସୁନ୍ଦରଗଡ଼ର ପାନପୋଷ ଛକଠାରେ ଆୟୋଜିତ ଜନସଭାକୁ ସମ୍ବୋଧିତ କରି ରାହୁଲ କହିଲେ, ବିଜେପି ଓ ବିଜେଡି ଭାଗିଦାରୀରେ ଓଡ଼ିଶାରେ ଶାସନ ଚାଲିଛି । ବିଜେଡି ସରକାରର ଦୀର୍ଘ ବର୍ଷ ଶାସନ ସତ୍ତ୍ୱେ ଓଡ଼ିଶାରେ ବହୁ ଶିଳ୍ପ ଅନୁଷ୍ଠାନ ବନ୍ଦ ହୋଇଯାଇଛି । ରାଜ୍ୟରେ ବେରୋଜଗାରୀ ବଢ଼ିଛି । ଗତ ୪୦ ବର୍ଷରେ ଦେଶରେ ସବୁଠାରୁ ଅଧିକ ବେରୋଜଗାରୀ ରହିଛନ୍ତି ଓଡ଼ିଶାରେ । ଓଡ଼ିଶା ସରକାରଙ୍କ ଦାୟିତ୍ୱହୀନତା ଯୋଗୁଁ ରାଜ୍ୟର ୩୦ ଲକ୍ଷ ଲୋକ ବାହାର ରାଜ୍ୟକୁ ଦାଦନ ଖଟିଯିବାକୁ ବାଧ୍ୟ ହୋଇଛନ୍ତି ।

୩୦ ଲକ୍ଷ ଲୋକଙ୍କୁ ବାହାର ରାଜ୍ୟକୁ ପଠାଇ ଦେଇଥିବା ଏହି ସରକାର ରାଜ୍ୟକୁ ଲୁଟିବାକୁ ୩୦ ଜଣ କୋଟିପତିଙ୍କୁ ଡାକି ଆଣିଛନ୍ତି । ସେମାନେ ଓଡ଼ିଶାକୁ ଲୁଟି ନିଜେ କୋଟିପତି ହେଉଛନ୍ତି । ସେହିଭଳି ଓଡ଼ିଶା ଏକ ଆଦିବାସୀ ବହୁଳ ରାଜ୍ୟ ହୋଇଥିବା ସତ୍ତ୍ୱେ ଏଠାରେ ଆଦିବାସୀ, ଦଳିତ ଓ ପଛୁଆବର୍ଗ ସୁରକ୍ଷିତ ନାହାନ୍ତି । ସେମାନଙ୍କୁ ଅକଥନୀୟ ଅତ୍ୟାଚାରର ଶିକାର ହେବାକୁ ପଡୁଛି ।

ତେବେ ଏଥିପାଇଁ କେବଳ ରାଜ୍ୟ ସରକାର ଦାୟୀ ନୁହଁନ୍ତି କେନ୍ଦ୍ରରେ କ୍ଷମତାସୀନ ମୋଦୀ ସରକାର ବି ସମପରିମାଣରେ ଦାୟୀ ବୋଲି ରାହୁଲ କହିଥିଲେ । ସେ କହିଥିଲେ, ଓଡ଼ିଶାରେ ନରେନ୍ଦ୍ର ମୋଦୀ ଏବଂ ନବୀନ ପଟ୍ଟନାୟକଙ୍କ ସରକାର ପାର୍ଟନରସିପ୍ ରେ ଚାଲିଛି । ସେମାନଙ୍କ ବନ୍ଧୁତ୍ୱର ଝଲକ ପାର୍ଲାମେଣ୍ଟରେ ଦେଖିବାକୁ ମିଳୁଛି ବୋଲି ରାହୁଲ କହିଥିଲେ ।
ଅପରାହ୍ନରେ ସୁନ୍ଦରଗଡ଼ ଏସବିଆଇ ଛକରେ ଆୟୋଜିତ ସାଧାରଣ ସଭାରେ ମଧ୍ୟ ରାହୁଲ ସମାନ କଥା ଦୋହରାଇଥିଲେ ।

ଏହି ଅବସରରେ ପୂର୍ବତନ କେନ୍ଦ୍ରମନ୍ତ୍ରୀ ଜୟରାମ ରମେଶ ମଧ୍ୟ ବିଜେପି ଓ ବିଜେଡିକୁ ଏକ ମୁଦ୍ରାର ଦୁଇଟି ପାଶ୍ୱର୍ ବୋଲି କହିଛନ୍ତି । ସେ କହିଛନ୍ତି ଯେ ଯେତେବେଳେ ମୁଁ ବିଜେଡି ସାଂସଦମାନଙ୍କ ସହ କଥା ହୁଏ, ମୋଦୀଙ୍କୁ ସମର୍ଥନ ଦେବା ପାଇଁ ଭୁବନେଶ୍ୱରରୁ ଆଦେଶ ରହିଥିବା ସେମାନେ କୁହନ୍ତି । ସଂସଦରେ କୌଣସି ବିଲ୍ ଉପରେ ଆଲୋଚନା କିମ୍ବା ପାରିତ ହେଲା ବେଳେ ବିଜେଡି ମୋଦୀ ସରକାରଙ୍କୁ କେବେ ସମାଲୋଚନା କରନ୍ତି ନାହିଁ ବୋଲି କହିଥିଲେ ।

ମୋଦୀ ଆଉ ଥରେ ନିର୍ବାଚନ ଜିତି ଆସିଲେ ରାଉରକେଲା ଷ୍ଟିଲ୍ ପ୍ଲାଣ୍ଟ ଏବଂ ନାଲକୋର ଘରୋଇକରଣ କରିଦେବେ ବୋଲି ରମେଶ ସତର୍କ କରାଇଥିଲେ ।

ଆଜି ସକାଳେ ରାଉରକେଲା ଶିବମନ୍ଦିରରେ ରାହୁଲ ପ୍ରଥମେ ପୂଜାର୍ଚ୍ଚନା କରିଥିଲେ । ଏହାପରେ ଉଦିତନଗରଠାରୁ ତାଙ୍କର ଯାତ୍ରା ଆରମ୍ଭ ହୋଇଥିଲା । ଏଥିରେ ହଜାର ହଜାର କର୍ମୀ ସାମିଲ ହୋଇଥିଲେ । ରାସ୍ତାର ବିଭିନ୍ନ ସ୍ଥାନରେ ଉତ୍ସାହିତ କର୍ମୀମାନେ ତାଙ୍କୁ ସ୍ୱାଗତ ସମ୍ବର୍ଦ୍ଧନା ଜଣାଇଥିଲେ ।

ରାହୁଲଙ୍କ ଏହି ଭାରତ ଯୋଡ଼ୋ ନ୍ୟାୟ ଯାତ୍ରାରେ ପୂର୍ବତନ କେନ୍ଦ୍ରମନ୍ତ୍ରୀ ଜୟରାମ ରମେଶ, କହ୍ଲେୟା କୁମାର, ପ୍ରଭାରୀ ଅଜୟ କୁମାର, ପିସିସି ସଭାପତି ଶରତ ପଟ୍ଟନାୟକ, ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ, ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ, ପୂର୍ବତନ କେନ୍ଦ୍ରମନ୍ତ୍ରୀ ଭକ୍ତ ଦାସ, ପୂର୍ବତନ ପିସିସି ସଭାପତି ସର୍ବଶ୍ରୀ ନିରଞ୍ଜନ ପଟ୍ଟନାୟକ, ଜୟଦେବ ଜେନା, ପ୍ରସାଦ ହରିଚନ୍ଦନ, ବିଧାୟକ ସୁର ରାଉତରାୟ, ତାରା ବାହିନୀପତି, ମହମ୍ମଦ ମୋକିମ୍, ସାଂସଦ ସପ୍ତଗିରି ଉଲ୍ଲାକାଙ୍କ ସମେତ ଦଳର ଅନେକ ନେତା ସାମିଲ ହୋଇଛନ୍ତି ।

ସୂଚନାଥାଉକି, ଝାଡ଼ଖଣ୍ଡରେ “ଭାରତ ଯୋଡ଼ୋ ନ୍ୟାୟ ଯାତ୍ରା’ ଶେଷ କରି ଗତକାଲି ସଂଧ୍ୟାରେ ରାହୁଲ ଗାନ୍ଧୀ ବୀରମିତ୍ରପୁର ସୀମାନ୍ତ ବାଂଶଯୋଜରଠାରେ ପହଞ୍ଚିଥିଲେ । ସେଠାରେ ଏକ ସଭାରେ ଉଦବୋଧନ ଦେଇ କେନ୍ଦ୍ର ସରକାରଙ୍କୁ ତୀବ୍ର ସମାଲୋଚନା କରିଥିଲେ । ସେ କହିଥିଲେ, ଦେଶରେ ଆଦିବାସୀ, ଦଳିତ, କୃଷକ ଓ ମହିଳାଙ୍କ ପ୍ରତି ଅନ୍ୟାୟ ଦିନକୁ ଦିନ ବଢ଼ି ଚାଲିଛି । ବେକାରୀ, ଦରଦାମ ବୃଦ୍ଧିରେ ଲୋକେ ଅତିଷ୍ଠ ହେଲେଣି । ସରକାରୀ କମ୍ପାନୀଗୁଡ଼ିକର ଘରୋଇକରଣ କରାଯାଉଥିବା ବେଳେ ଆଦାନୀକୁ ମୂଲ୍ୟବାନ ଜମି ଟେକି ଦେଉଛନ୍ତି ।

ତେବେ ରାହୁଲଙ୍କ ମନ୍ତବ୍ୟ ଉପରେ ବିଜେପି ଏବଂ ବିଜେଡି ପକ୍ଷରୁ ଆନୁଷ୍ଠାନିକ ଭାବେ କୌଣସି ପ୍ରତିକ୍ରିୟା ଏ ଯାଏଁ ଆସିନାହିଁ ।