ଭୁବନେଶ୍ୱର: ଦୁଇଦିନ ଭିତରେ ଆନୁଷ୍ଠାନିକ ଭାବେ ବିଜେଡି-ବିଜେପି ମେଣ୍ଟ ଘୋଷଣା ହୋଇଯିବ । ଦିଲ୍ଲୀରେ ଏହାର ଘୋଷଣା ହେବ ବୋଲି ବିଶ୍ୱସ୍ତ ସୂତ୍ରରୁ ଖବର ମିଳିଛି ।
ବିଜେଡି-ବିଜେପି ମେଣ୍ଟ ନେଇ କଥାବାର୍ତ୍ତା ସରିଯାଇଥିବା ଉଭୟ ଦଳର କସରତ ଏବଂ ମତ ମନ୍ତବ୍ୟରୁ ସ୍ପଷ୍ଟ ହୋଇସାରିଛି । ଗତ ୪ ଦିନ ଧରି ଚାଲିଥିବା କସରତ୍ ସମ୍ପର୍କରେ ଦୁଇଦଳର ବରିଷ୍ଠ ନେତୃବର୍ଗଙ୍କ ସମେତ ଆଞ୍ଚଳିକ ଓ ଜାତୀୟ ଗଣମାଧ୍ୟମ ପାଖରେ ଖବର ଅଛି । ୬ ତାରିଖରେ ଦିଲ୍ଲୀରେ ଅନୁଷ୍ଠିତ ବିଜେପି କୋର୍ କମିଟି ବୈଠକରେ ଉପସ୍ଥିତ ଥିବା ଜୁଏଲ୍ ଓରାମ୍ ମେଣ୍ଟ ଉପରେ ଚର୍ଚ୍ଚା ହୋଇଥିବା ଗଣମାଧ୍ୟମକୁ ଜଣାଇଥିଲେ । ତେବେ ଚୂଡ଼ାନ୍ତ ନିଷ୍ପତ୍ତି କେନ୍ଦ୍ରୀୟ କମିଟି ନେବ ବୋଲି ସେ କହିଥିଲେ ।
ମାତ୍ର ଗତକାଲି ଦିଲ୍ଲୀରୁ ଫେରି ବିଜେପି ରାଜ୍ୟ ସଭାପତି ମନମୋହନ ସାମଲ ମେଣ୍ଟ ଚର୍ଚ୍ଚାକୁ ଖଣ୍ଡନ କରିଛନ୍ତି । ମେଣ୍ଟ ପ୍ରଶ୍ନ ସତେ ଯେମିତି ତାଙ୍କୁ ଆଶ୍ଚର୍ଯ୍ୟ କରିଦେଇଛି । ଆଜି ଭୁବନେଶ୍ୱର ଆସିଥିବା ପ୍ରଭାରୀ ବିଜୟପାଲ୍ ସିଂହ ତୋମାର ମଧ୍ୟ ମନମୋହନଙ୍କ ପାଳି ଧରିଛନ୍ତି । ମେଣ୍ଟ ନେଇ କୌଣସି ଚର୍ଚ୍ଚା ଆଲୋଚନା ହୋଇନାହିଁ ବୋଲି ଉଭୟ ସିଧାସଳଖ ମନ୍ତବ୍ୟ ଦେଇଛନ୍ତି । ବିଜେପି ଏକାକୀ ୧୪୭ ଯାକ ବିଧାନସଭା ଏବଂ ୨୧ ଲୋକସଭା ଆସନରେ ଲଢ଼ିବ ବୋଲି ଦମ୍ଭ ଦେଖାଇଛନ୍ତି ।
ଉଭୟ ସବୁ ଜାଣି ଏବଂ ସବୁ ନିଷ୍ପତ୍ତିରେ ଥାଇ ମଧ୍ୟ କର୍ମୀଙ୍କ ଆକ୍ରୋଶରୁ ରକ୍ଷା ପାଇବା ପାଇଁ ଏଭଳି କଞ୍ଚା ମିଛ କହିଥିବା ରାଜନୈତିକ ମହଲରେ ଆଲୋଚନା ହେଉଛି । ଅବଶ୍ୟ ସେମାନଙ୍କ କଥାର ସତ୍ୟତା ଦୁଇଦିନ ଭିତରେ ଜଣାପଡ଼ିଯିବ ।
ଏପଟେ, ମେଣ୍ଟ ଦ୍ୱନ୍ଦକୁ ନେଇ ବିଜେଡି ନେତୃବର୍ଗ ଚୁପ୍ ରହିଥିବା ବେଳେ ଆଜି ଦଳର ସୁପ୍ରିମୋ ନବୀନ ପଟ୍ଟନାୟକ ଏବଂ ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ମଧ୍ୟରେ ଏକ ଭିଡିଓ କଥାବାର୍ତ୍ତା ଚର୍ଚ୍ଚାର ବିଷୟ ହୋଇଛି । ଏଥିରେ ମୁଖ୍ୟମନ୍ତ୍ରୀଙ୍କୁ ପାଣ୍ଡିଆନ୍ ପଚାରୁଛନ୍ତି- ସାର୍, ରାଜନୀତିରେ ସବୁଠୁ ଖରାପ ଜିନିଷ କ’ଣ? ମୁଖ୍ୟମନ୍ତ୍ରୀ କହୁଛନ୍ତି- ଗୁଜବ ଏବଂ ମିଛ କଥା । ପାଣ୍ଡିଆନ୍ ହସି ହସି ଏହାକୁ ପାଳି ଧରିବା ସହ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଉଛନ୍ତି ।
ଉଭୟଙ୍କ ଏହି କଥାବାର୍ତ୍ତାର ପୃଷ୍ଠଭୂମି କ’ଣ ଏବଂ କାହା ଉଦେ୍ଦଶ୍ୟରେ ଏହା କୁହାଯାଉଛି, ତାହା ହିଁ ସବୁଆଡ଼େ ଚର୍ଚ୍ଚାର ବିଷୟବସ୍ତୁ ।
