ଭୁବନେଶ୍ୱର: ଲୋକପ୍ରିୟ କଣ୍ଠଶିଳ୍ପୀ ଶାନ୍ତିଲତା ବାରିକ ଆଉ ନାହାନ୍ତି । ତାଙ୍କ କଣ୍ଠରୁ ଆଉ ଶୁଭିବନି ଭାବପୂର୍ଣ୍ଣ ଭଜନ । ଚିକିତ୍ସାଧୀନ ଅବସ୍ଥାରେ ଗତକାଲି ରାତି ୮ଟାରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ତାଙ୍କୁ ୬୫ ବର୍ଷ ହୋଇଥିଲା । ତାଙ୍କର ପରଲୋକରେ ସଙ୍ଗୀତ ଜଗତରେ ଶୋକର ଛାୟା ଖେଳିଯାଇଛି । ତାଙ୍କର ମୃତ୍ୟୁ ଗଭୀର ଶୂନ୍ୟସ୍ଥାନ ସୃଷ୍ଟି କରିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଶୋକପ୍ରକାଶ କରିବା ସହିତ ରାଷ୍ଟ୍ରୀୟ ମର୍ଯ୍ୟାଦା ସହ ଶେଷକୃତ୍ୟ ସମ୍ପନ୍ନ କରାଯିବ ବୋଲି ଘୋଷଣା କରିଛନ୍ତି । ଆଜି ପୁରୀ ସ୍ୱର୍ଗଦ୍ୱାରରେ ତାଙ୍କର ଅନ୍ତିମ ସତ୍କାର କରାଯିବ ।
ଶ୍ରୀମତୀ ବାରିକ ୨୦୧୧ ମସିହାରୁ କ୍ୟାନସର୍ ରୋଗରେ ପଡ଼ିଥିଲେ । କୋଭିଡ୍ ପରେ ତାଙ୍କର ସ୍ୱାସ୍ଥ୍ୟାବସ୍ଥା ଗୁରୁତର ହୋଇପଡ଼ିଥିଲା । ଗତବର୍ଷ ତାଙ୍କର ଅବସ୍ଥା ଅଧିକ ବିଗିଡ଼ି ଯାଇଥିଲା । ଏହି ସମୟରେ ତାଙ୍କର ଦେହାନ୍ତ ହୋଇଯାଇଥିବା ନେଇ ମିଛ ଖବର ପ୍ରଚାରିତ ହୋଇଥିଲା ।
ଶାନ୍ତିଲତା ବାରିକ ଓଡ଼ିଆ ଭକ୍ତି ସଙ୍ଗୀତର ଅତି ପରିଚିତ ନାଁ । ତାଙ୍କ ଗୀତସବୁ ଶ୍ରୋତାଙ୍କ ମନରେ ଭକ୍ତି, ସମର୍ପଣ ଭାବ ସୃଷ୍ଟି କରୁଥିଲା । ସେଥିପାଇଁ ଭିକାରୀ ବଳ, ଅରବିନ୍ଦ ମୁଦୁଲିଙ୍କ ଭଳି ସେ ମଧ୍ୟ ଘରେ ଘରେ ପରିଚିତ ଥିଲେ । ବାଳକୃଷ୍ଣ ଦାସଙ୍କ ସଙ୍ଗୀତ ନିର୍ଦ୍ଦେଶନାରେ ୧୯୭୮ ମସିହାରେ ତାଙ୍କ କଣ୍ଠରେ ରେଡିଓ ପାଇଁ ରେକର୍ଡିଂ ହୋଇଥିବା ପ୍ରଥମ ଗୀତ ‘ହେ ଚକାନୟନ’ ସଫଳତାର ଶୀର୍ଷ ଛୁଇଁଥିଲା । ତାଙ୍କର ଅନେକ ପ୍ରସିଦ୍ଧ ଭଜନ ମଧ୍ୟରେ ରହିଛି ‘ଭଜି ଭଜି ତୋ ନାମ ଚକାନୟନ’, ‘ମୋ ପ୍ରଭୁ ଜଗନ୍ନାଥ’, ‘କାହ୍ନୁ ହେ, ବଂଶୀ କେ ଦେଲା’, ‘ଯମୁନା କୂଳ ନୁହେଁ’, ‘କାଳିଆ ତୋ କଳା କଳା ଡୋଳା’ ଆଦି ଗୀତ ।
ଓଡ଼ିଆ ଭଜନ ପ୍ରତି ବିଶେଷ ଅବଦାନ ପାଇଁ ଶାନ୍ତିଲତାଙ୍କୁ ଅନେକ ସମ୍ମାନ ଓ ପୁରସ୍କାର ମିଳିଥିଲା ।
