ଭୁବନେଶ୍ୱର: ବରିଷ୍ଠ ଫଟୋ ସାମ୍ବାଦିକ ଅନୀଲ ପ୍ରସାଦ ମିଶ୍ରଙ୍କର ପରଲୋକ ହୋଇଯାଇଛି । ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଗତକାଲି ରାତି ପ୍ରାୟ ୧୧ଟାରେ ସେ ଆଖି ବୁଜି ଦେଇଥିଲେ । ତାଙ୍କୁ ୬୩ ବର୍ଷ ହୋଇଥିଲା । ଇଷ୍ଟର୍ଣ୍ଣ ପ୍ରେସ୍ ଏଜେନ୍ସିର ପ୍ରତିଷ୍ଠାତା ତଥା ସାପ୍ତାହିକ ପତ୍ରିକା ‘ଇପିଏ’ ର ମୁଖ୍ୟ ସମ୍ପାଦକ ଭାବେ ସେ ଦାୟିତ୍ୱ ତୁଲାଉଥିଲେ ।
ଫଟୋ ସାମ୍ବାଦିକତାରେ ସ୍ୱର୍ଗତ ମିଶ୍ର ଥିଲେ ଓଡ଼ିଶାର ଜଣେ ପ୍ରମୁଖ ଚେହେରା । ତାଙ୍କ ଦ୍ୱାରା ପ୍ରତିଷ୍ଠିତ ଇଷ୍ଟର୍ଣ୍ଣ ପ୍ରେସ୍ ଏଜେନ୍ସି ଥିଲା ରାଜ୍ୟର ପ୍ରଥମ ପ୍ରଫେସନାଲ୍ ଫଟୋ ସଂସ୍ଥା । ପରବର୍ତ୍ତୀ ସମୟରେ ସେ ଆରମ୍ଭ କରିଥିବା ଇପିଏ ନିଉଜ୍ ଉଇକ୍ଲି ପାଠକମାନଙ୍କ ମଧ୍ୟରେ ଆଦୃତ ଲାଭ କରିଥିଲା । ଜଣେ ସରଳ ଓ ଅମାୟିକ ବ୍ୟକ୍ତି ଭାବେ ତାଙ୍କର ବହୁତ ସମ୍ମାନ ଥିଲା । ମୃତ୍ୟୁଶଯ୍ୟା ନିକଟରେ ତାଙ୍କର ଆତ୍ମୀୟ ସ୍ୱଜନମାନେ ଉପସ୍ଥିତ ଥିଲେ ।
ଆଜି ପୁରୀ ସ୍ୱର୍ଗଦ୍ୱାରରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି ।
