ଭୁବନେଶ୍ୱର: ବରିଷ୍ଠ ନେତା ଅମର ଶତପଥୀ ବିଜେଡିରେ ଆଉ ନାହାନ୍ତି । ଆନୁଷ୍ଠାନିକ ଭାବେ ବିଜେଡିରୁ ଇସ୍ତଫା ଦେଇନାହାନ୍ତି ସତ ହେଲେ ଦଳର ସଭ୍ୟପଦ ନବୀକରଣରୁ ଦୂରେଇ ଯାଇଛନ୍ତି । ନିଜେ ଶ୍ରୀ ଶତପଥୀ ଆଜି ଗଣମାଧ୍ୟମକୁ ଏହି ସୂଚନା ଦେଇଛନ୍ତି ।
ବଡ଼ଚଣାରୁ ୬ ଥର ବିଧାୟକ ହୋଇଥିଲେ ଅମର ଶତପଥୀ । ଦୁଇଥର ଜନତା ଦଳ, ଥରେ ଏନସିପି ଏବଂ ତିନି ଥର ବିଜେଡି ଟିକେଟ୍ ରେ ନିର୍ବାଚିତ ହୋଇଥିଲେ । ଗତ ସାଧାରଣ ନିର୍ବାଚନରେ ବିଜେଡି ତାଙ୍କୁ ଆଉ ଟିକେଟ୍ ଦେଲା ନାହିଁ । ସେଠାରୁ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କୁ ଟିକେଟ ଦେଲା । ବିନା କାରଣରେ ତାଙ୍କର ଟିକେଟ୍ କଟିଥିବାରୁ ଅମର ଭୀଷଣ କ୍ଷୁବ୍ଧ ଥିଲେ ମଧ୍ୟ ଚୁପ୍ ରହିଥିଲେ । ମାତ୍ର ବଡ଼ଚଣା ସମେତ ରାଜ୍ୟରେ ବିଜେଡିର ବିପର୍ଯ୍ୟୟ ପରେ ଗଣମାଧ୍ୟମରେ ମୁହଁ ଖୋଲି ବିଜେଡି କାର୍ଯ୍ୟଶୈଳୀ ଉପରେ ପ୍ରଶ୍ନ କରି ଆସୁଛନ୍ତି । ଦୁଇଦିନ ତଳେ ଖୋଦ୍ ନବୀନ ପଟ୍ଟନାୟକଙ୍କ ନାଁ ନେଇ ବିଷୋଦଗାର କରିଥିଲେ ।
ଅମରଙ୍କର ଏଭଳି ମନ୍ତବ୍ୟ ଉପରେ ଗଣମାଧ୍ୟମ ପ୍ରତିନିଧିମାନେ ଆଜି ବିଜେଡି ମୁଖପାତ୍ର ଲେନିନ୍ ମହାନ୍ତିଙ୍କ ପ୍ରତିକ୍ରିୟା ଲୋଡ଼ିଥିଲେ । ସେ ସିଧା ସିଧା କହିଥିଲେ ଯେ ଅମର ବାବୁଙ୍କୁ ଯଦି ଭଲ ଲାଗୁନି ବିଜେଡି ଛାଡ଼ି ପଳାନ୍ତୁ । ଯାହାଙ୍କୁ ଦଳରେ ଅଣନିଶ୍ୱାସୀ ଲାଗୁଛି ଦଳ ଛାଡ଼ି ପଳାଇଲେ ଭଲ ହୁଅନ୍ତା । ସେ ତ ନିଜ ପୁତୁରାଙ୍କୁ ଆଗରୁ ବିଜେପିକୁ ଛାଡ଼ିଛନ୍ତି, ଏବେ ନିଜେ ପଳାନ୍ତୁ । ଦଳ ତାଙ୍କୁ ୬ ଥର ବିଧାୟକ କରିଛି । ବିଭିନ୍ନ ପଦପଦବୀ ଦେଇଛି । ତା’ ପରେ ଯଦି ତାଙ୍କୁ ଅଣନିଶ୍ୱାସୀ ଲାଗୁଛି, ଛାଡ଼ି ପଳାଇଲେ ଭଲ ହେବ । ସେ ଚାଲିଗଲେ ଦଳର ପଇସାଟିଏର କ୍ଷତି ହେବ ନାହିଁ । ଯେଉଁମାନେ ବିଜେଡିରୁ ଡେଇଁଛନ୍ତି, ସେମାନେ ବିଜେପି ସମ୍ପର୍କରେ ଥିଲେ । ଯେଉଁମାନେ ବିଜେପି ଯାଇଛନ୍ତି, ସେମାନେ ସେଠି କୋଉ ଅବସ୍ଥାରେ ଅଛନ୍ତି ସମସ୍ତେ ଜାଣନ୍ତି । ଯେଉଁମାନେ ବି ଯିବାକୁ ଚାହୁଁଛନ୍ତି ଯାଆନ୍ତୁ, ବିଜେଡି ଆହୁରି ସୁଦୃଢ଼ ହେବ ବୋଲି ଲେନିନ୍ କହିଥିଲେ ।
ବିଜେଡି ମୁଖପାତ୍ରଙ୍କର ଏହି ମନ୍ତବ୍ୟର ଜବାବରେ ଅମର ଶତପଥୀ କହିଛନ୍ତି- ମୁଁ ବିଜେଡିରେ ନାହିଁ । ସଭ୍ୟ ସଂଗ୍ରହ ଅଭିଯାନରେ ମୁଁ ମୋ ସଭ୍ୟପଦ ନବୀକରଣ କରିନି । ସଭ୍ୟପଦ ନେଇନି ମାନେ ଟେକ୍ନିକାଲି ବିଜେଡିରେ ନାହିଁ । ସାମୟିକ ଭାବେ ସକ୍ରିୟ ରାଜନୀତିରୁ ଦୂରେଇ ରହିଛି । ସ୍ଥାନୀୟ ଲୋକ ଓ ଶୁଭେଚ୍ଛୁଙ୍କ ସହ ପରାମର୍ଶ କରିବା ପରେ ପରବର୍ତ୍ତୀ ପଦକ୍ଷେପ ନେବି ।
ତେବେ ନିର୍ବାଚନ ବିପର୍ଯ୍ୟୟ ଆଘାତରୁ ସୁସ୍ଥ ହୋଇ ନ ଥିବା ବିଜେଡିରେ ଏଭଳି କନ୍ଦଳ ଦଳ ପାଇଁ ଆହୁରି କ୍ଷତିକାରକ ହେବ ବୋଲି ରାଜନୈତିକ ପର୍ଯ୍ୟବେକ୍ଷକ ମହଲ ବିଚାର କରୁଛନ୍ତି । ଯାହା ତ ହୋଇଗଲା ହୋଇଗଲା । ମାତ୍ର ଏଣିକି ଅମର ଶତପଥୀଙ୍କ ଭଳି ବରିଷ୍ଠ ନେତାଙ୍କୁ ଉପଯୁକ୍ତ ଗୁରୁତ୍ୱ ଦେବାରେ କ’ଣ ସମସ୍ୟା ରହିଛି ତାହା କେହି ବୁଝିପାରୁନାହାନ୍ତି । ଦଳରେ ଯାହାଙ୍କୁ ଅଣନିଶ୍ୱାସୀ ଲାଗୁଛି ଛାଡ଼ି ଚାଲିଯିବା ପାଇଁ ମୁଖପାତ୍ରଙ୍କର ବୟାନକୁ ସେମାନେ ନାପସନ୍ଦ କରିଛନ୍ତି । ସାମଗ୍ରିକ ଭାବେ ବିଜେଡି ମହଲରେ ଏହା ଭୁଲ୍ ବାର୍ତ୍ତା ଦେଉଛି ବୋଲି ସେମାନଙ୍କର ମତ ।
