ଭୁବନେଶ୍ୱର: ନୂଆପଡ଼ା ଉପନିର୍ବାଚନରେ ବିଜେପି ମାମଲତକାର ଥିଲେ ଧର୍ମଶାଳାର ସ୍ୱାଧୀନ ବିଧାୟକ ହିମାଂଶୁ ଶେଖର ଓରଫ୍ ଲିକୁ ସାହୁ । ସବୁଠାରୁ ଗୁରୁତ୍ୱପୂର୍ଣ୍ଣ କୋମନା ବ୍ଲକ୍ ର ସମ୍ପୂର୍ଣ୍ଣ ଦାୟିତ୍ୱ ତାଙ୍କ ଉପରେ ନ୍ୟସ୍ତ ଥିଲା । ରାଜ୍ୟର ବିଜେପି ଜମାନାରେ ଅର୍ଥ, କ୍ଷମତା ଓ ପ୍ରତିପତ୍ତିରେ ଅପ୍ରତିଦ୍ୱନ୍ଦୀ ଏହି ନେତା ଭୋଟ ଅବ୍ୟବହିତ ପୂର୍ବରୁ ନୂଆପଡ଼ା ଜନତାଙ୍କ ଦାଉରୁ ଅଳ୍ପକେ ବର୍ତ୍ତି ଯାଇଛନ୍ତି । ରାତି ଅଧିଆ ବିଜେ ବେଳେ ସ୍ଥାନୀୟ ଅଞ୍ଚଳର ବିଜେଡି ସମର୍ଥକମାନଙ୍କ ହାବୁଡ଼ରେ ପଡ଼ିଯିବାରୁ ତାଙ୍କ ଅବସ୍ଥା ବାର୍ ହୋଇଯାଇଥିଲା ।
ବିଶ୍ୱସ୍ତ ସୂତ୍ରର ସୂଚନା ଅନୁଯାୟୀ, ଗତ ମଧ୍ୟରାତ୍ରରେ ଲିକୁ ସାହୁ କୋମନା ଅଞ୍ଚଳର ଗୋଟିଏ ଜଙ୍ଗଲୀ ଗାଁରେ ଅନ୍ଧାରି ବିଜେ କରିଥିଲେ । ତାଙ୍କୁ ଗୋଡ଼େ ଗୋଡ଼େ ଜଗିଥିବା ବିଜେଡି ନେତା ମନୋଜ ମିଶ୍ରଙ୍କ ସମର୍ଥକମାନେ ଏହି ଖବର ପାଇଲା ପରେ ବଦମାସୀ ରଚନା କରିଥିଲେ । ଫୋନ୍ ଫାନ୍ କରି ଗାଁ ଲୋକଙ୍କୁ ମତେଇ ଦେଇଥିଲେ । ତୁରନ୍ତ ଆରମ୍ଭ ହୋଇଗଲା ଲିକୁ ତଡ଼ିପାର ଅଭିଯାନ ।
ଲିକୁଙ୍କୁ ଗାଁ ଲୋକେ ଗୋଡ଼େଇଥିଲେ । କୁଆଡ଼େ ଆସିଛ କହି ଆକ୍ରମଣ ଉଦ୍ୟମ କରିଥିଲେ । ଉତ୍ତ୍ୟକ୍ତ ଗ୍ରାମବାସୀଙ୍କ ହାବୁଡ଼ରୁ ଲିକୁ ଖସିଯିବାରେ ସମର୍ଥ ହୋଇଥିଲେ ମଧ୍ୟ ଅନ୍ଧାର ରାତିରେ କୁଆଡ଼େ ଯିବେ ବାଟ ପାଇ ନ ଥିଲେ । ପ୍ରାଣ ବିକଳରେ ସେଠାରୁ ଦୌଡ଼ି ଜଙ୍ଗଲ ପାଖ ବିଲରେ ଯାଇ ଲୁଚିଲେ । ତାଙ୍କୁ ଉଦ୍ଧାର କରିବା ପାଇଁ ପୁଲିସକୁ ଖବର ଦେଲେ । ତେବେ ପୁଲିସ ତାଙ୍କ ପାଖରେ ପହଞ୍ଚିଲା ବେଳକୁ ଘଣ୍ଟାଏ ପାର୍ ହୋଇଯାଇଥିଲା ।
ଲିକୁଙ୍କ ଏହି ଅବସ୍ଥା ଜାଣିଲା ପରେ ଦଳପତିଙ୍କର ରାଗ ପଞ୍ଚମକୁ ଚଢ଼ିଯାଇଛି । ଏହି ନାଟର ଗୋବର୍ଦ୍ଧନ ମନୋଜ ମିଶ୍ରଙ୍କ ଉପରେ ପ୍ରତିଶୋଧପରାୟଣ ହୋଇଛନ୍ତି । ଭୋଟ କାର୍ଯ୍ୟ ସରିଲା । ଏବେ ମନୋଜଙ୍କ ବେଳା ଖରାପ ପଡ଼ିଗଲା ବୋଲି ଚର୍ଚ୍ଚା ହେଉଛି ।
ସୂଚନାଥାଉକି, ୯ ତାରିଖ ରାତିରୁ ନୂଆପଡ଼ା ନିର୍ବାଚନମଣ୍ଡଳୀରେ ଲାଗିଥିଲା ନିରବ ଅବଧି କଟକଣା । ବାହାର ଅଞ୍ଚଳର ନେତାଙ୍କୁ ସେଠାରେ ରହିବା ମନା ଥିଲା । ମାତ୍ର ଲିକୁ ସାହୁଙ୍କ ଭଳି ବିଜେପିର ଅନେକ ଉପକୂଳିଆ ନେତା ସେଠାରେ ଚକ୍କର କାଟୁଥିଲେ ।
