ପୁରୁଣା ଦିନର ସ୍ମୃତି ସାଉଁଟିଲେ ରାଷ୍ଟ୍ରପତି

ଭୁବନେଶ୍ୱର: ଆଜି ଥିଲା ଓଡ଼ିଶା ବିଧାନସଭା ପାଇଁ ଏକ ଐତିହାସିକ ଓ ଗୌରବମୟ ଦିନ । ଭାରତର ପ୍ରଥମ ରାଷ୍ଟ୍ରପତି ଭାବେ ଶ୍ରୀମତୀ ଦ୍ରୌପଦୀ ମୁର୍ମୁ ବିଧାନସଭା ଗୃହରେ ବିଧାୟକ/ବିଧାୟିକାମାନଙ୍କୁ ସମ୍ବୋଧିତ କରିଥିଲେ । ନିଜର ପୁରୁଣା ଦିନର ସ୍ମୃତି ସାଉଁଟି ଭାବବିହ୍ୱଳ ହୋଇଯାଇଥିଲେ ମହାମହିମ ରାଷ୍ଟ୍ରପତି ।

ଆଜି ଯାହା ହୋଇଛି ଏହି ଗୃହ ପାଇଁ

ରାଷ୍ଟ୍ରପତି କହିଥିଲେ, ଆପଣମାନଙ୍କ ଗହଣରେ ଉପସ୍ଥିତ ହୋଇ ମୁଁ ବେଶ୍ ଆନନ୍ଦିତ । ଏଠାରେ ମୋତେ ଘରକୁ ଫେରିଲା ଭଳି ଲାଗୁଛି । ମୁଁ ଗାଁରୁ ଆସିଥିଲି ସାଧାରଣ ଝିଅ ହୋଇ । ଏ ଗୃହ ମୋତେ ସବୁ କିଛି ଶିଖାଇଛି । କଥା କୁହାଇବା ଶିଖାଇଛି । ରାଜନୈତିକ ସ୍ତରରେ କିଭଳି ବ୍ୟବହାର କରାଯାଏ ଶିଖାଇଛି । ଜନସାଧାରଣଙ୍କ ସମସ୍ୟା ଉପସ୍ଥାପନା କରିବା ଶିଖାଇଛି । ଆଜି ଯେଉଁଠି ଅଛି ତା’ର ସମସ୍ତ ଶ୍ରେୟ ଏ ଗୃହର । ଏ ଗୃହ ମତେ ମିଅଁ ଦେଇଛି । ଏ ମିଅଁ ଯଦି ସୁଦୃଢ଼ ନ ଥାନ୍ତା, ଓଡ଼ିଶାବାସୀଙ୍କ ଭଲ ପାଇବା ଓ ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦ ନ ଥାନ୍ତା, ଆଜି ଯେଉଁ ଜାଗାରେ ଅଛି ବୋଧହୁଏ ସମ୍ଭବ ହୋଇ ନ ଥାନ୍ତା । ସେଥିପାଇଁ ଏ ଗୃହକୁ ଆଜି ମୁଁ କୋଟି କୋଟି ପ୍ରଣାମ ଜଣାଉଛି ।

ଏହି ପବିତ୍ର ଗୃହର ସଦସ୍ୟ ଭାବରେ ଏଠି ବସିବାର ସୌଭାଗ୍ୟ ମୁଁ ଲାଭ କରିଥିଲି । ଅନେକ ବର୍ଷ ବ୍ୟବଧାନ ପରେ ଏଠି ଉପସ୍ଥିତ ହେବା ପରେ ଅତୀତର ସ୍ମୃତି ତାଜା ହୋଇଉଠୁଛି । ଏ ଗୃହରେ ମୁଁ ବିଧାୟକ ଭାବେ ପ୍ରଶ୍ନ ପଚାରିଛି । ମନ୍ତ୍ରୀ ଭାବେ ବିଧାୟକମାନଙ୍କର ପ୍ରଶ୍ନର ଉତ୍ତର ମଧ୍ୟ ଦେଇଛି । ବିଭିନ୍ନ ସ୍ଥାୟୀ କମିଟିର ଅଧ୍ୟକ୍ଷ ଓ ସଦସ୍ୟ ଭାବରେ ମୋ ଚିନ୍ତା ବ୍ୟକ୍ତ କରିବାର ସୁଯୋଗ ପାଇଛି । ଏଠି ବସିଥିବା ୧୪୭ ସଦସ୍ୟ ମୋର ଚିହ୍ନା । ସୌଭାଗ୍ୟବଶତଃ କିଛି ଲୋକଙ୍କ ସହ କାମ କରିବାର ମତେ ସୁଯୋଗ ମିଳିଛି । ଏ ଗୃହର ଗ୍ୟାଲେରିରେ ଅନେକ ପୂର୍ବତନ ମନ୍ତ୍ରୀ ଓ ବିଧାୟକ ଅଛନ୍ତି ତାଙ୍କୁ ମଧ୍ୟ ସମ୍ମାନ ଜଣାଉଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ମୁଖ୍ୟମନ୍ତ୍ରୀ ମୋହନ ମାଝୀ ଆମେ ୨୦୦୦ ମସିହାରେ ଏକାଥରେ ଏ ବିଧାନସଭାକୁ ଆସିଥିଲୁ ବୋଲି ରାଷ୍ଟ୍ରପତି ମନେ ପକାଇ ଭାବବିହ୍ୱଳ ହୋଇଯାଇଥିଲେ ।

ଆଚରଣ ଓ ଉଚ୍ଚାରଣରେ ସଂଯମ ରଖନ୍ତୁ

ଏଠିକାର ଆତ୍ମୀୟ ପରିବେଶରେ ମୁଁ ଭାବପ୍ରବଣ ହୋଇଯାଇଛି ବୋଲି ରାଷ୍ଟ୍ରପତି ଶ୍ରୀମତୀ ମୁର୍ମୁ କହିବା ସହ ଗୃହର ସଦସ୍ୟ/ସଦସ୍ୟା ତଥା ଜନପ୍ରତିନିଧିମାନଙ୍କୁ ସେମାନଙ୍କର ଦାୟିତ୍ୱ ସମ୍ପର୍କରେ ପରାମର୍ଶ ଦେଇଥିଲେ । ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ କବିତା ଉଦ୍ଧାର କରି ରାଷ୍ଟ୍ରପତି କହିଥିଲେ- କାଳେ କାଳେ ଶାସନର ଡୋରି ପ୍ରଜା ବା ଜନଗଣଙ୍କ ହାତରେ ଅଛି । ଆପଣମାନେ ଜନଗଣଙ୍କର ପ୍ରତିନିଧି । ସେମାନଙ୍କର ସେବକ । କେତେ ଆଶା, ଭରସା, ବିଶ୍ୱାସ ନେଇ ସେମାନେ ଆପଣଙ୍କୁ କ୍ଷମତା ଅର୍ପଣ କରିଛନ୍ତି । ସେମାନଙ୍କର ଆଶା ପୂରଣ କରିବା, ସେମାନଙ୍କର ସ୍ୱପ୍ନ ସାକାର କରିବା ଏବଂ ସର୍ବୋପରି ସେମାନଙ୍କ ମୁହଁରେ ହସ ଫୁଟାଇବା ଆପଣମାନଙ୍କର ଓ ଆମ ସମସ୍ତଙ୍କର କର୍ତ୍ତବ୍ୟ । ଆପଣମାନେ ଏପରି କାର୍ଯ୍ୟ କରିବେ ଯାହା ସାଧାରଣ ଲୋକଙ୍କ ହିତ ପାଇଁ ଉଦ୍ଦିଷ୍ଟ ।

ଦେଶର ଦରିଦ୍ରତମ ଲୋକଙ୍କ ପାଇଁ କାର୍ଯ୍ୟ କରିବା ହିଁ ଅନ୍ତୋଃଦୟର ବାର୍ତ୍ତା । ବର୍ତ୍ତମାନର ସମୟ ପ୍ରଯୁକ୍ତି ବିଦ୍ୟାର ସମୟ । ଜନପ୍ରତିନିଧି ଭାବେ ଆପଣମାନେ ସାରା ରାଜ୍ୟର ଚିହ୍ନା ମୁହଁ । ଆପଣମାନଙ୍କର ଅନୁଗାମୀ ବହୁତ । ଆପଣମାନେ କ’ଣ କହୁଛନ୍ତି, କ’ଣ କରୁଛନ୍ତି ତାହା ଜାଣିବା ପାଇଁ ଲୋକଙ୍କର ଉତ୍ସୁକ ଥାଏ । ଆପଣମାନଙ୍କର ଆଚରଣ ଓ ଉଚ୍ଚାରଣ ଉଭୟ ମୂଲ୍ୟବାନ । ଆପଣମାନେ ଲିଡର । ଜନତାଙ୍କୁ ଲିଡ୍ କରୁଛନ୍ତି । ଜନତା ହେଲେ ଫଲୋଅର୍ । ଲିଡର୍ ଯାହା କରିବେ ଜନତା ତାକୁ ଫଲୋ କରିବେ । ଏଣୁକରି ଆପଣମାନଙ୍କର ଆଚରଣ ଓ ଉଚ୍ଚାରଣକୁ ସଂଯମରେ ରଖିବାର ଆବଶ୍ୟକତା ଅଛି । ଏହି ଟେକନୋଲୋଜିର ଯୁଗରେ ଆପଣମାନେ କ’ଣ କହୁଛନ୍ତି ଓ କ’ଣ କରୁଛନ୍ତି ତାହା ସମସ୍ତେ ଜାଣିପାରୁଛନ୍ତି । ଆପଣମାନଙ୍କର ଆଚରଣ ଓ ଉଚ୍ଚାରଣ ଏପରି ହେବା ଉଚିତ୍ ଯଦ୍ୱାରା ଆପଣମାନଙ୍କର ଅନୁଗାମୀ ଓ ସମର୍ଥକମାନେ ସମାଜ ଓ ରାଜ୍ୟ ଗଠନରେ ସହାୟକ ହେବେ ବୋଲି ରାଷ୍ଟ୍ରପତି କହିଥିଲେ ।

ଓଡ଼ିଶାର ପ୍ରଗତି ପାଇଁ ମିଳିମିଶି କାମ କରିବା

ରାଷ୍ଟ୍ରପତି ତାଙ୍କ ଉଦବୋଧନରେ କହିଥିଲେ ଯେ ରାଷ୍ଟ୍ର ସର୍ବୋପରି । ଏହି ଭାବନା ରଖି ଆପଣମାନେ କାର୍ଯ୍ୟ କରିବେ ବୋଲି ମୋର ବିଶ୍ୱାସ । ଗଣ ବିନା ଗଣତନ୍ତ୍ର ନାହିଁ କି ଗଣରାଜ୍ୟ ନାହିଁ । ଲୋକଶକ୍ତିକୁ ଭାରତୀୟ ସଂସ୍କୃତିରେ ଗୁରୁତ୍ୱ ଦିଆଯାଇଛି । ଓଡ଼ିଶା ସଂସ୍କୃତି ପ୍ରବାହର ରାଜ୍ୟ । ଦେଶର ସ୍ୱାଧୀନତା ଓ ରାଷ୍ଟ୍ର ଗଠନରେ ଓଡ଼ିଶାର ଗୁରୁତ୍ୱପୂର୍ଣ୍ଣ ଭୂମିକା ରହିଛି । ଦୟାନଦୀ ଚଣ୍ଡାଶୋକରୁ ଧର୍ମାଶୋକରେ ପରିଣତ ହେବାର ଜୀବନ୍ତ ସାକ୍ଷୀ ।

ଓଡ଼ିଶା ପ୍ରଗତି ପଥରେ ଦ୍ରୁତ ଗତିରେ ଚାଲିଛି । ବିଭିନ୍ନ ସମୟରେ ରାଜ୍ୟର ନେତୃତ୍ୱ ନେଇଥିବା ବ୍ୟକ୍ତିମାନେ ସେମାନଙ୍କର ଅବଦାନ ରଖିଛନ୍ତି । ମୋହନ ଚରଣ ମାଝୀ ଅଳ୍ପଦିନର କାର୍ଯ୍ୟକାଳ ମଧ୍ୟରେ ଅନେକ ନୂଆ କାମର ଶୁଭାରମ୍ଭ କରିଛନ୍ତି । ଓଡ଼ିଶାର ପ୍ରଗତି ପାଇଁ ସମସ୍ତେ ମିଳିମିଶି କାର୍ଯ୍ୟ କରିବା ଉଚିତ । ଓଡ଼ିଶା ମହାପ୍ରଭୁ ଜଗନ୍ନାଥଙ୍କ ପୂଣ୍ୟମାଟି । ପ୍ରକୃତି ଏଠାରେ ସବୁ ଓଜାଡ଼ି ଦେଇଛି । ବିପୁଳ ଖଣିଜ ସମ୍ପଦ, ଜଙ୍ଗଲ ସମ୍ପଦ ଓ ଜଳସମ୍ପଦରେ ପରିପୂର୍ଣ୍ଣ ଓଡ଼ିଶା । ଓଡ଼ିଶା ମାନବ ସମ୍ବଳ ବିକାଶରେ ମଧ୍ୟ ପଛରେ ପଡ଼ିନାହିଁ । ଶ୍ରମିକଙ୍କଠାରୁ ଶିଳ୍ପୀ ଓ ଶିଳ୍ପପତି, ଆଇଟି ପ୍ରଫେସନାଲଠାରୁ ଆରମ୍ଭ କରି ବୈଜ୍ଞାନିକ ପର୍ଯ୍ୟନ୍ତ ସବୁ ବର୍ଗର ମାନବ ସମ୍ବଳରେ ଓଡ଼ିଶା ସମୃଦ୍ଧ । ଓଡ଼ିଶାରେ ମଧ୍ୟ ରହିଛି ସୁଦୀର୍ଘ ବେଳାଭୂମି ଓ ଉର୍ବର ଚାଷ ଜମି । କୃଷି, ଶିଳ୍ପ ଓ ବାଣିଜ୍ୟ ଆଦିର ବିକାଶ ପାଇଁ ଓଡ଼ିଶାର ପରିବେଶ ଖୁବ ଅନୁକୂଳ । ଏସବୁ ସମ୍ପଦର ସଦୁପଯୋଗ କରାଯାଇ ଓଡ଼ିଶାକୁ ଦେଶର ଅଗ୍ରଣୀ ପ୍ରଦେଶରେ ପରିଣତ କରାଯାଇପାରିବ ।

୨୦୪୭ ମସିହାରେ ସ୍ୱାଧୀନତାର ଶତାବ୍ଦୀ ସମାରୋହ ପାଳନ ବେଳକୁ ଭାରତ ବିକ୍ଷିପ୍ତ ଭାରତରେ ପରିଣତ ହୋଇପାରିବ ବୋଲି ଆମ ସମସ୍ତଙ୍କର ବିଶ୍ୱାସ । ସେହି ଦିଗରେ ଆମେ ଅଗ୍ରସର ହେଉଛେ । ୨୦୩୬ ମସିହାରେ ଓଡ଼ିଶା ଗଠନର ଶତବାର୍ଷିକୀ ପାଳନ ହେବ । ଆପଣମାନେ ସମ୍ମିଳିତ ଭାବେ ୨୦୩୬ ସୁଦ୍ଧା ଏକ ସୁସମୃଦ୍ଧ ଓଡ଼ିଶା ଗଠନ କରିପାରିଲେ ତାହା ହେବ ବିକ୍ଷିପ୍ତ ଭାରତ ପାଇଁ ଓଡ଼ିଶାର ଶ୍ରେଷ୍ଠ ଅବଦାନ । ଓଡ଼ିଶାର ନେତୃବୃନ୍ଦ, କୃଷକ, ଶ୍ରମିକ, ବୁଦ୍ଧିଜୀବୀ ଓ ଯୁବକ ସମସ୍ତେ ଏକଜୁଟ ହୋଇ କାମ କଲେ ଅସାଧ୍ୟ ସାଧନ କରିହେବ । ମୁଁ ଆଶା କରୁଛି ଆପଣମାନେ ଓଡ଼ିଶାର ପ୍ରଗତିକୁ ଜୀବନର ବ୍ରତ ଭାବରେ ଗ୍ରହଣ କରିବେ ।

ଏହି ଅବସରରେ ରାଷ୍ଟ୍ରପତି ଓଡ଼ିଶାର ନାରୀ ଶକ୍ତି, ବକ୍ସି ଜଗବନ୍ଧୁଙ୍କଠାରୁ ଆରମ୍ଭ କରି ବିଜୁ ପଟ୍ଟନାୟକଙ୍କ ପର୍ଯ୍ୟନ୍ତ ବରପୁତ୍ରମାନଙ୍କର ସ୍ମୃତିଚାରଣ କରିଥିଲେ । ଓଡ଼ିଶା ବିଧାନସଭାର ଗରିମା ଓ ଗୌରବ ସମ୍ପର୍କରେ ଉଲ୍ଲେଖ କରିଥିଲେ ।

ଉଦବୋଧନ ଶେଷରେ ରାଷ୍ଟ୍ରପତି ବିଧାନସଭାର ୧୧ ନମ୍ବର ପ୍ରକୋଷ୍ଠକୁ ଯାଇ କିଛି ସମୟ ବିତାଇଥିଲେ । ୨୦୦୦ ମସିହାରେ ସେ ମନ୍ତ୍ରୀ ଥିବା ବେଳେ ଏହି ଚାମ୍ବର ବ୍ୟବହାର କରୁଥିଲେ । ସେହି ପୁରୁଣା ଦିନର ସ୍ମୃତିକୁ ମନେ ପକାଇଥିଲେ ମହାମହିମ ରାଷ୍ଟ୍ରପତି ।