ପୂର୍ତ୍ତି ପାଳନରେ ଉଡ଼ିଲା ଟଙ୍କା!

ମୋଦୀ ସରକାରଙ୍କ ତୃତୀୟ ପାଳିର ଦ୍ୱିତୀୟ ବର୍ଷ

ଭୁବନେଶ୍ୱର: ନରେନ୍ଦ୍ର ମୋଦୀ କ୍ରମାଗତ ଭାବେ ତୃତୀୟ ଥର ପାଇଁ ଆଜିର ଦିନରେ ଦେଶର ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ । ତୃତୀୟ ପାଳିର ଦ୍ୱିତୀୟ ବର୍ଷ ପୂର୍ତ୍ତି ଉତ୍ସବ ଲୋକସେବା ଭବନର କନଭେନସନ୍ ହଲରେ ଆୟୋଜିତ ହୋଇଥିଲା । ଦେଶରେ ଆର୍ଥିକ ସଙ୍କଟ କାରଣରୁ ସରକାରୀସ୍ତରରେ ଖର୍ଚ୍ଚକାଟ ଘୋଷଣା କରାଯାଇଥିଲେ ମଧ୍ୟ ଆଜି କିନ୍ତୁ ତାହାର ଧଜିଆ ଉଡ଼ିଛି । ସାମ୍ବାଦିକ ସମ୍ମିଳନୀ ନାଁରେ ବେଶୀ ନେତା/କୁଜିନେତାଙ୍କୁ ଡକାଯାଇ ଆପ୍ୟାୟିତ କରାଯାଇଛି । ସରକାରୀ ପଇସାରେ ଏହି ସରକାରୀ କାର୍ଯ୍ୟକ୍ରମ ବିଜେପି ରାଜ୍ୟ କାର୍ଯ୍ୟାୟରୁ ପରିଚାଳିତ ହୋଇଛି । ସୂଚନା ଓ ଲୋକସମ୍ପର୍କ ବିଭାଗର ଅଧିକାରୀମାନେ ବିଜେପି କାର୍ଯ୍ୟାଳୟର ଚିଆଁଙ୍କ ନିର୍ଦ୍ଦେଶକୁ ଆଜ୍ଞାବହ କରିଛନ୍ତି ।

ପୂର୍ତ୍ତି ପାଳନ ଆୟୋଜନ ଏକ ବଡ଼ ଇଭେଣ୍ଟ ସଂସ୍ଥାକୁ ଦିଆଯାଇଥିଲା । ଏକ ପ୍ରଦର୍ଶନୀର ମଧ୍ୟ ଆୟୋଜନ କରାଯାଇଥିଲା । କାର୍ଯ୍ୟକ୍ରମକୁ ଅଧିକ ଜାକଜମକ କରିବା ପାଇଁ ବଡ଼ ବଡ଼ ହୋର୍ଡିଂରେ ଛାଇ ହୋଇଥିଲା ଲୋକସେବା ଭବନ । ଯୁଆଡ଼େ ଦେଖିବ ମାଳ ମାଳ ହୋର୍ଡିଂ । ହୋର୍ଡିଂ ପ୍ରସ୍ତୁତ ପାଇଁ ଅନ୍ୟ ଏକ ସଂସ୍ଥାକୁ ଦାୟିତ୍ୱ ଦିଆଯାଇଥିଲା । ହୋର୍ଡିଂ ନିର୍ମାଣରେ ଖର୍ଚ୍ଚ ହୋଇଥିବା ଟଙ୍କା ସାମ୍ବାଦିକଙ୍କ ଆକଳନ ବାହାରେ ଥିଲା । ପ୍ରବେଶପଥଠାରୁ କାର୍ଯ୍ୟକ୍ରମସ୍ଥଳ ପର୍ଯ୍ୟନ୍ତ ସାଜସଜାରେ ଅତି କମ୍ ରେ ୫ ଲକ୍ଷ ଟଙ୍କାର ଫୁଲ ଲାଗିଥିଲା । ବାକି ଅନ୍ୟାନ୍ୟ ସାଜସଜା ସାମଗ୍ରୀ ଅଛି ।

ସାମ୍ବାଦିକମାନଙ୍କ ସମ୍ମିଳନୀ ନାଁରେ ଭବ୍ୟ କାର୍ଯ୍ୟକ୍ରମରେ ପ୍ରାୟ ୭୦୦ ଅତିଥି ଉପସ୍ଥିତ ଥିଲେ । ସେମାନଙ୍କ ମଧ୍ୟରେ ପାଖାପାଖି ୧୦୦ ଭିଭିଆଇପି ଏବଂ ୧୦୦ରୁ କମ୍ ସାମ୍ବାଦିକ ଥିଲେ । ବାକି ଅନ୍ୟମାନେ କିଏ ତାହା କେହି ଜାଣନ୍ତିନି । ବିଜେପି ଅଫିସରୁ ସେମାନଙ୍କ ନାଁ ଯାଇଥିଲା ସୂଚନା ଓ ଲୋକସମ୍ପର୍କ ବିଭାଗକୁ । ସେଠାରୁ ସେମାନଙ୍କୁ ଫୋନ୍ ଯୋଗେ ଆମନ୍ତ୍ରଣ କରାଯାଇଥିଲା ।

ଅତିଥିମାନଙ୍କ ଚର୍ଚ୍ଚା ପାଇଁ ପ୍ରସିଦ୍ଧ ‘ଖଟାମିଠା’ ସଂସ୍ଥାକୁ ଦାୟିତ୍ୱ ଦିଆଯାଇଥିଲା । ପୂରା ଫାଇଭ୍ ଷ୍ଟାର୍ କାଇଦା କଟକଣାରେ ଅତିଥିମାନଙ୍କୁ ଚର୍ଚ୍ଚା କରାଯାଇଥିଲା । ଉପର ମହଲାରେ ସାମ୍ବାଦିକମାନଙ୍କ ପାଇଁ ଖାଇବା ବ୍ୟବସ୍ଥା ହୋଇଥିଲା ବେଳେ ତଳେ ଭିଭିଆଇପି ଏବଂ ଅନ୍ୟମାନଙ୍କ ପାଇଁ ବ୍ୟବସ୍ଥା ହୋଇଥିଲା ।

ସାମ୍ବାଦିକ କମ୍,କୁଜିନେତା ଅଧିକାଙ୍କୁ ନେଇ ଆୟୋଜିତ ଏହି ସାମ୍ବାଦିକ ସମ୍ମିଳନୀକୁ ଉଦବୋଧନ ଦେଇଥିଲେ କେନ୍ଦ୍ରମନ୍ତ୍ରୀ ଅର୍ଜୁନ ରାମ ମେଘୱାଲ୍ ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।