ଭୁୁବନେଶ୍ୱର: ମୋହନ ସରକାରଙ୍କ ଦୁଇବର୍ଷ ପୂରଣ ବେଳେ ଦୁଇଟି ତଦନ୍ତ କମିସନ ରିପୋର୍ଟ ଗାଏବ ଖବର ଆସିଛି । ବିଜେଡି ସରକାର ବେଳେ ମୁଖ୍ୟମନ୍ତ୍ରୀଙ୍କ ଅଫିସରୁ ଏହି ଫାଇଲ୍ ଗାଏବ ହୋଇଥିବା ନେଇ ଦୁଇଦିନ ତଳେ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ପ୍ରକାଶ କରିଥିଲେ । ଗୃହ ବିଭାଗ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କଠାରୁ ସାମ୍ବାଦିକମାନେ ଏହାର ପ୍ରତିକ୍ରିୟା ଲୋଡ଼ିଲା ବେଳେ ତାଙ୍କ ପାଖରେ ସେହି ଖବର ନ ଥିଲା । ଅଭିଯୋଗ ଆସିଲେ ତଦନ୍ତ ହେବ ବୋଲି ମୁଖ୍ୟମନ୍ତ୍ରୀ ସ୍ୱାଭାବିକ ଉତ୍ତର ଦେଇଥିଲେ । ଫଳରେ ଏହାକୁ ନେଇ ଦ୍ୱନ୍ଦ ସୃଷ୍ଟି ହୋଇଥିଲା । ବିଜେଡି ଏହି ପ୍ରସଙ୍ଗକୁ ଆଗକୁ ବଢ଼ାଇଥିଲା । ଫାଇଲ୍ ହଜିଛି ନା ହଜା ଯାଇଛି ବୋଲି ପ୍ରଶ୍ନ କରାଯାଇଥିଲା ।
ଏହାପରେ ଗୃହ ବିଭାଗର ନିଦ ଭାଙ୍ଗିଛି । ବିଭାଗ ପକ୍ଷରୁ କ୍ୟାପିଟାଲ୍ ଥାନାରେ ଦୁଇଟି ଫାଇଲ୍ ମିଳୁ ନ ଥିବା ନେଇ ବୁଧବାର ଏତଲା ଦିଆଯାଇଛି । ବିଭାଗୀୟ ଯୁଗ୍ମ ସଚିବ ଶରତ ଚନ୍ଦ୍ର ମାରାଣ୍ଡି କ୍ୟାପିଟାଲ୍ ଥାନାରେ ଏହି ଏତଲା ଦେଇଛନ୍ତି । ମିଳୁ ନ ଥିବା ଦୁଇ ଫାଇଲ୍ ହେଲା- ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟା ମାମଲାର ତଦନ୍ତ କରିଥିବା ନାଇଡୁ କମିସନଙ୍କ ତଦନ୍ତ ରିପୋର୍ଟ ଏବଂ ସମ୍ ହସ୍ପିଟାଲ୍ ଅଗ୍ନିକାଣ୍ଡ ଘଟଣାର ଆରଡିସି ତଦନ୍ତ ରିପୋର୍ଟ ।
ଏତଲା ଅନୁଯାୟୀ, ଗୃହ ବିଭାଗରେ ଦାଖଲ ହୋଇଥିବା ନାଇଡୁ କମିସନଙ୍କ ତଦନ୍ତ ରିପୋର୍ଟ ୧୬.୦୯.୨୦୧୬ରେ ମୁଖ୍ୟ ଶାସନ ସଚିବଙ୍କ ଅଫିସକୁ ପଠାଯାଇଥିଲା । ସେଠାରୁ ୧୯.୦୯.୨୦୧୬ରେ ମୁଖ୍ୟମନ୍ତ୍ରୀଙ୍କ ଅଫିସକୁ ଯାଇଥିଲା । ସେହିଭଳି ସମ୍ ହସ୍ପିଟାଲ୍ ଅଗ୍ନିକାଣ୍ଡ ଘଟଣାର ଆରଡିସି ତଦନ୍ତ ରିପୋର୍ଟ ଗୃହ ବିଭାଗରୁ ମୁଖ୍ୟ ଶାସନ ସଚିବଙ୍କ ଅଫିସ୍ କୁ ୨୩.୦୫.୨୦୧୮ରେ ପଠାଯାଇଥିଲା । ସେଠାରୁ ୨୪.୦୫.୨୦୧୮ରେ ମୁଖ୍ୟମନ୍ତ୍ରୀଙ୍କ ଅଫିସ୍ କୁ ଆସିଥିଲା ।
ମାତ୍ର, ଏବେ ଗୃହ ବିଭାଗ ଜାଣିବାକୁ ପାଇଲା ଯେ ଏହି ଦୁଇଟି ତଦନ୍ତ ରିପୋର୍ଟ ମିଳୁନାହିଁ । କୁହାଯାଇଛି ଯେ ୪.୬.୨୦୨୪ରେ ନିର୍ବାଚନ ଫଳ ପ୍ରକାଶ ପାଇବା ଦିନ ସରକାର ବଦଳୁଥିବା ଜଣାପଡ଼ିବା ପରେ ସ୍ୱାଭାବିକ ପ୍ରକ୍ରିୟାରେ ଗୃହ ବିଭାଗରୁ ମୁଖ୍ୟମନ୍ତ୍ରୀଙ୍କ ଦପ୍ତରକୁ ଯାଇଥିବା ସବୁ ରିପୋର୍ଟ ଏବଂ ଫାଇଲ୍ ଗୁଡ଼ିକ ସେଦିନ ଗୃହ ବିଭାଗକୁ ଫେରି ଆସିଥିଲା । ମାତ୍ର ସେଥିମଧ୍ୟରେ ଉପରୋକ୍ତ ଦୁଇଟି ତଦନ୍ତ ରିପୋର୍ଟ ନ ଥିଲା । ଏବେ ଦୁଇ ବର୍ଷ ପରେ ଗୃହ ବିଭାଗ ଏହା ଜାଣିବାକୁ ପାଇଛି ।
ବିଶେଷ ଭାବରେ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟା ମାମଲାର ତଦନ୍ତ ରିପୋର୍ଟ ସାର୍ବଜନିତାକୁ ନେଇ ଗତ ନିର୍ବାଚନ ବେଳେ ବିଜେପି ପକ୍ଷରୁ ତୁମ୍ବିତୋଫାନ ହୋଇଥିଲା । ସରକାରକୁ ଆସିଲେ ସେହି ତଦନ୍ତ ରିପୋର୍ଟ ଖୋଲାଯିବ ଏବଂ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଥିଲା । ମାତ୍ର ସରକାରକୁ ଆସିବାର ଦୁଇବର୍ଷ ପରେ ମଧ୍ୟ କୌଣସି ଗୋଟିଏ ବି ତଦନ୍ତ ରିପୋର୍ଟ ଖୋଲାଗଲା ନାହିଁ । କାର୍ଯ୍ୟାନୁଷ୍ଠାନ ପର କଥା । ଦୁଇବର୍ଷ ପରେ ଯାଇ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟା ଘଟଣାର ତଦନ୍ତ ଫାଇଲ୍ କଥା ମନେ ପଡ଼ିଛି । ଫାଇଲ୍ ମିଳୁ ନ ଥିବା ଦୁଇ ଦିନ ପୂର୍ବ ପର୍ଯ୍ୟନ୍ତ ଗୃହ ବିଭାଗ ଦାୟିତ୍ୱରେ ଥିବା ଖୋଦ୍ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ମଧ୍ୟ ଜଣା ନ ଥିଲା । ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ପ୍ରକୃତରେ ସଂପୃକ୍ତ ଦୁଇ ତଦନ୍ତ ଫାଇଲ୍ ସେବେଠାରୁ ହଜିଛି ନା ଏବେ ହଜାଇ ଦିଆଯାଇଛି ତାହା ସମସ୍ତଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି । ଏହା ପଛରେ ଆଉ କିଛି ଷଡ଼ଯନ୍ତ୍ର ଥାଇପାରେ ବୋଲି ମଧ୍ୟ ଚର୍ଚ୍ଚା ହେଉଛି ।
କ୍ୟାପିଟାଲ ଥାନାରେ ବିଏନଏସ୍ ୩୦୫, ୩୧୬(୨), ୨୩୮(ସି), ୨୪୧ ଏବଂ ୬୧(୨)(ବି) ଧାରାରେ ଏତଲା ଗ୍ରହଣ ହୋଇଛି । ପୁଲିସ ଏହି ଘଟଣାର ଅନୁସନ୍ଧାନ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଏତଲାରେ ଅନୁରୋଧ କରାଯାଇଛି ।
