ଭୁବନେଶ୍ୱର: ଯାଜପୁର ଓ ଭଦ୍ରକ ଜିଲ୍ଲାର ବନ୍ୟାଞ୍ଚଳ ସ୍ଥିତିକୁ ଆଜି ବୋଟ୍ ରେ ବୁଲି ଦେଖିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରାଜସ୍ୱମନ୍ତ୍ରୀ ସୁରେଶ ପୂଜାରୀ, କ୍ରୀଡ଼ାମନ୍ତ୍ରୀ ସୂରଜ ସୂର୍ଯ୍ୟବଂଶୀ, ବିଜେପି ରାଜ୍ୟ ସଭାପତି ତଥା ସାଂସଦ ମନମୋହନ ସାମଲଙ୍କ ସମେତ ଦଳୀୟ ବିଧାୟକ ଓ କର୍ମୀମାନେ ମୁଖ୍ୟମନ୍ତ୍ରୀଙ୍କ ଗସ୍ତରେ ସାମିଲ ହୋଇଥିଲେ । ତେବେ ମୁଖ୍ୟମନ୍ତ୍ରୀଙ୍କ ଗସ୍ତରେ ଜିଲ୍ଲାର ଦୁଇ ବିଧାୟିକା ପ୍ରମିଳା ମଲ୍ଲିକ ଏବଂ ସୁଜାତା ସାହୁଙ୍କୁ ସାମିଲ ହେବାର ସୁଯୋଗ ନ ମିଳିବାରୁ ଉତ୍ତେଜନା ସୃଷ୍ଟି ହୋଇଥିଲା ।
ମୁଖ୍ୟମନ୍ତ୍ରୀ ପ୍ରଥମେ ଧର୍ମଶାଳାରେ ପହଞ୍ଚି ବନ୍ୟା ପ୍ରଭାବିତ ଲୋକଙ୍କ ସହ ଆଲୋଚନା କରିଥିଲେ । ବିପନ୍ନଙ୍କ ନିକଟରେ ତୁରନ୍ତ ରିଲିଫ୍, ସ୍ୱାସ୍ଥ୍ୟସେବା ଓ ଜରୁରୀ ଯୋଗାଣ ପହଞ୍ଚାଇବା କାର୍ଯ୍ୟ ତ୍ୱରାନ୍ୱିତ କରିବାକୁ ଅଧିକାରୀମାନଙ୍କୁ ନିଦେ୍ର୍ଦଶ ଦେଇଥିଲେ । ଜିଲ୍ଲାର ଦଶରଥପୁର ବ୍ଲକ୍ ଅନ୍ତର୍ଗତ କସପା ପଞ୍ଚାୟତ ଓ ତରପଡ଼ା ପଞ୍ଚାୟତର ବନ୍ୟାଞ୍ଚଳକୁ ମୁଖ୍ୟମନ୍ତ୍ରୀ ବୋଟ୍ ରେ ବୁଲି ଦେଖିଥିଲେ । ତରପଡ଼ା ପଞ୍ଚାୟତଠାରେ ମୁଖ୍ୟମନ୍ତ୍ରୀ ରିଲିଫ ଖାଦ୍ୟର ତଦାରଖ କରିଥିଲେ । ମୁଖ୍ୟମନ୍ତ୍ରୀ ସେଠାରୁ ଭଦ୍ରକ ଆସି ଜିଲ୍ଲାର ବନ୍ୟାଞ୍ଚଳ ବୁଲିଥିଲେ । ଶ୍ୟାମସୁନ୍ଦର ପଞ୍ଚାୟତର ଈଶାନପୁର, ଶ୍ୟାମସୁନ୍ଦରପୁର, ବାଲିଘାଇ, କଣପା ଆଦି ନିକଟସ୍ଥ ଗ୍ରାମର ଲୋକମାନଙ୍କ ସହ ଆଲୋଚନା କରିଥିଲେ ମୁଖ୍ୟମନ୍ତ୍ରୀ ।
ବନ୍ୟା ପ୍ରଭାବିତଙ୍କ ପାଇଁ ସରକାରଙ୍କ ପଦକ୍ଷେପ ସମ୍ପର୍କରେ ମୁଖ୍ୟମନ୍ତ୍ରୀ ତାଙ୍କ ସୋସିଆଲ୍ ମିଡିଆ ଆକାଉଣ୍ଟରେ ସୂଚନା ଦେଇଛନ୍ତି । ୨ ଲକ୍ଷ ୭୭ ହଜାର ୬୫୫ ଲୋକଙ୍କୁ ସୁରକ୍ଷିତ ଭାବେ ସ୍ଥାନାନ୍ତରିତ କରାଯାଇଛି । ୫୩୧ ଟି ରିଲିଫ୍ କ୍ୟାମ୍ପରେ ରନ୍ଧା ଖାଦ୍ୟ ଯୋଗାଇ ଦିଆଯାଉଛି । ୭୮୨.୮ ମେଟ୍ରିକ୍ ଟନ୍ ଗୋଖାଦ୍ୟ ଯୋଗାଣ କରାଯାଇଛି । ବନ୍ୟାଞ୍ଚଳରେ ୯୯ଟି ଉଦ୍ଧାରକାରୀ ଦଳ ନିୟୋଜିତ ଥିବା କୁହାଯାଇଛି ।
ବିଜେଡି ବିଧାୟକଙ୍କୁ ସାଙ୍ଗରେ ନେଲେନି
ଆଜି ମୁଖ୍ୟମନ୍ତ୍ରୀଙ୍କ ବନ୍ୟାଞ୍ଚଳ ଗସ୍ତବେଳେ ଯାଜପୁରରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା । ଜିଲ୍ଲାର ଦୁଇ ବିଧାୟକ ବିଝାଂରପୁରର ପ୍ରମିଳା ମଲ୍ଲିକ ଏବଂ ଯାଜପୁରର ସୁଜାତା ସାହୁଙ୍କୁ ମୁଖ୍ୟମନ୍ତ୍ରୀଙ୍କ ସହ ବୋଟ୍ ରେ ଯିବାକୁ ସୁଯୋଗ ମିଳିଲା ନାହିଁ । ବିଧାୟକ ଏହାର ପ୍ରତିବାଦ କରିବାରୁ ବିଜେପି କର୍ମୀମାନେ ମୁହାଁମୁହିଁ ହୋଇଥିଲେ । ଦୁଇ ବିଧାୟିକାଙ୍କୁ ଖରାପ ଭାଷାରେ ଗାଳିମନ୍ଦ କରିଥିଲେ । ଏହାକୁ ନେଇ ଉଭୟ ପକ୍ଷଙ୍କ ମଧ୍ୟରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ପୁଲିସର ହସ୍ତକ୍ଷେପ ଫଳରେ ବଡ଼ ଅଘଟଣ ଟଳି ଯାଇଥିଲା । ନିଜ ଅଞ୍ଚଳରେ ସେମାନଙ୍କୁ ଉପେକ୍ଷାର ପ୍ରତିବାଦରେ ଦୁଇ ବିଧାୟିକା ଧାରଣାରେ ବସିଥିଲେ । ମୁଖ୍ୟମନ୍ତ୍ରୀଙ୍କଠାରୁ ସେମାନେ ଜବାବ ମାଗିଥିଲେ ।
ଶ୍ରୀମତୀ ମଲ୍ଲିକଙ୍କ ଅଭିଯୋଗ ଅନୁଯାୟୀ, ମୁଖ୍ୟମନ୍ତ୍ରୀ ତାଙ୍କ ଜିଲ୍ଲାର ବନ୍ୟାଞ୍ଚଳ ବୁଲିବାକୁ ଆସୁଥିବାରୁ ସେମାନେ ତାଙ୍କ ସହିତ ଯାଇ ବନ୍ୟା ପ୍ରପୀଡ଼ିତ ଲୋକଙ୍କ ଦୁର୍ଦ୍ଦଶା ସମ୍ପର୍କରେ ଭଲ ଭାବରେ ଅବଗତ କରାଇବାକୁ ଚାହିଁଥିଲେ । ଗତକାଲିଠାରୁ ସେମାନେ ଯୋଗାଯୋଗ କରିଥିଲେ ଏବଂ ମୁଖ୍ୟମନ୍ତ୍ରୀଙ୍କ ଗସ୍ତରେ ସାମିଲ କରିବା ପାଇଁ ସେମାନଙ୍କୁ ପ୍ରତିଶ୍ରୁତି ଦିଆଯାଇଥିଲା । ଆଜି ସେମାନେ ମୁଖ୍ୟମନ୍ତ୍ରୀଙ୍କ ଆଗମନକୁ ଅପେକ୍ଷା କରିଥିଲେ ମଧ୍ୟ କୌଣସି ସୂଚନା ଦିଆଗଲା ନାହିଁ । ସେମାନେ ବୋଟ୍ ପାଖକୁ ଯାଇ ଅପମାନିତ ହୋଇ ଫେରିଥିଲେ । ମୁଖ୍ୟମନ୍ତ୍ରୀ ଦଳୀୟ କର୍ମୀଙ୍କୁ ସାଙ୍ଗରେ ନେଇ ବନ୍ୟାଞ୍ଚଳ ବୁଲିବାକୁ ଗଲେ । ଜିଲ୍ଲାର ଜନପ୍ରତିନିଧିଙ୍କ ପ୍ରତି ଏହା ଅଭଦ୍ରାମୀ ବୋଲି ସେ ଅଭିଯୋଗ କରିଛନ୍ତି ।
ମୁଖ୍ୟମନ୍ତ୍ରୀଙ୍କର ଆଡମ୍ବରପୂର୍ଣ୍ଣ ବନ୍ୟାଞ୍ଚଳ ଗସ୍ତକୁ ନେଇ ବିରୋଧୀ ଶିବିରରେ ପ୍ରତିକ୍ରିୟା ଦେଖିବାକୁ ମିଳିଛି । ଲୋକଙ୍କର ଦୁର୍ଦ୍ଦଶା ବେଳେ ମୁଖ୍ୟମନ୍ତ୍ରୀଙ୍କ ଗସ୍ତକୁ ବିଜେପି କର୍ମୀମାନେ ପିକନିକ୍ କରିଦେଇଥିବା କର୍ମୀମାନେ ଅଭିଯୋଗ କରିଛନ୍ତି ।
