ଆଉ କେବେ ପାଟି ଖୋଲିବେ ମୁଖ୍ୟମନ୍ତ୍ରୀ?

ଭୁୁବନେଶ୍ୱର: ଏମଏମଡିଆର ସଂଶୋଧନ ଯୋଗୁଁ ଓଡ଼ିଶା ସିଧାସଳଖ ୧ ଲକ୍ଷ କୋଟି ଟଙ୍କା ହରାଉଛି । ଏହା ଓଡ଼ିଶାର ହକ୍ ଟଙ୍କା । ଖଣି ସଂଶୋଧନ ବିଲ୍ ରେ ରାଜ୍ୟ ହାତରୁ ଟିକସ ଲଗାଇବା କ୍ଷମତା କାଢ଼ି ନିଆଯାଉଥିବାରୁ ଓଡ଼ିଶା ଏହି ବିପୁଳ ପାଣ୍ଠି ହରାଇବ । ଖଣି ଲିଜଧାରୀଙ୍କଠାରୁ ଲକ୍ଷେ କୋଟି ଟଙ୍କା ଆଦାୟ କରିବାକୁ ୨୦୨୪ ଜୁଲାଇରେ ସୁପ୍ରିମକୋର୍ଟଙ୍କ ୯ ଜଣିଆ ଖଣ୍ଡପୀଠ ରାୟ ଦେଇଥିଲେ । ସୁପ୍ରିମକୋର୍ଟଙ୍କ ରାୟକୁ କେନ୍ଦ୍ର ସରକାର ନିମିଷକେ ବଦଳାଇ ଦେଇଛନ୍ତି । ଅଗଷ୍ଟ ୧୩ରେ ସଂସଦରେ ବିନା ଆଲୋଚନାରେ ମାତ୍ର ୬ ମିନିଟ୍ ରେ ପାରିତ ହୋଇଛି ଏମଏମଡିଆର ସଂଶୋଧନ ବିଲ୍ । ଅଗଷ୍ଟ ୧୯ରେ ରାଷ୍ଟ୍ରପତି ତାହାକୁ ଅନୁମୋଦନ ଦେଇଥିବାରୁ ଏହା ଆଇନରେ ପରିଣତ ହୋଇଛି । ଓଡ଼ିଶା ଏକାଥରେ ଲକ୍ଷେ କୋଟି ଟଙ୍କା ବକେୟା ପ୍ରାପ୍ୟ ହରାଇବା ସାଙ୍ଗକୁ ଆଗାମୀ ଦିନରେ ବର୍ଷକୁ ୧୨ ହଜାର କୋଟି ହରାଇବ । ଲୋକସଭାରେ ଓଡ଼ିଶାର ୨୦ ଜଣ ଯାକ ବିଜେପି ସଂସଦ ଏହାକୁ ଆଖିବୁଜା ସମର୍ଥନ କରିଥିଲେ ।

ଓଡ଼ିଶାର ସ୍ୱାର୍ଥ ସମ୍ବଳିତ ଏତେ ବଡ଼ ପ୍ରସଙ୍ଗରେ ୧୫ ଦିନ ହେଲାଣି ଚାଲିଛି ବାକଯୁଦ୍ଧ । ଲୋକସଭାରେ ବିଲ୍ ପାରିତ ହେବା ପରେ ପରେ ବିରୋଧୀ ଦଳ ନେତା ନବୀନ ପଟ୍ଟନାୟକ ବିଧାନସଭାର ସ୍ୱତନ୍ତ୍ର ଅଧିବେଶନ ଡକାଯାଇ ଏହା ଉପରେ ଆଲୋଚନା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏକ ଚିଠିରେ ପ୍ରସ୍ତାବ ଦେଇଥିଲେ । ମାତ୍ର ମୁଖ୍ୟମନ୍ତ୍ରୀ ତାହାର ଉତ୍ତର ଦେଲେ ନାହିଁ । ପରବର୍ତ୍ତୀ ସମୟରେ ବିଧାନସଭା ସ୍ୱତନ୍ତ୍ର ଅଧିବେଶନ ପ୍ରସ୍ତାବକୁ ନା ବୋଲି ସଂସଦୀୟ ମନ୍ତ୍ରୀ ମୁକେଶ ମହାଲିଙ୍ଗ ପାଟିରେ କୁହାଗଲା । ଏହାକୁ ଦୃଢ଼ ବିରୋଧ କରିବା ପାଇଁ ନବୀନ ଏକ ଭିଡିଓ ବାର୍ତ୍ତାରେ ଓଡ଼ିଶାବାସୀଙ୍କୁ ଅପିଲ୍ କଲେ । ମାତ୍ର ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ତାଙ୍କୁ ଏକ ଭିଡ଼ିଓ ବାର୍ତ୍ତାରେ ପାଲଟା ଜବାବ ଦେଲେ । ଖଣି ବିଲ୍ କୁ ଐତିହାସିକ ବୋଲି କହିଲେ । ଗୁଡ଼ାଏ ତଥ୍ୟର ଅବତାରଣା କରିଥିଲେ ମଧ୍ୟ ସେଥିରେ ସ୍ପଷ୍ଟତା ନ ଥିଲା ।

ଗତ ୨୯ ତାରିଖରେ ବିଜେପିର ଓଡ଼ିଆ ସାଂସଦମାନଙ୍କୁ ଚିଠି ଲେଖିଲେ ନବୀନ । ଏମଏମଡିଆର ପ୍ରସଙ୍ଗର ଅବତାରଣା କରି ସାଂସଦମାନେ ଓଡ଼ିଶାବାସୀଙ୍କ ସ୍ୱାର୍ଥ ଓ ରାଜ୍ୟର ଅଧିକାର ମନେ ପକାଇଥିଲେ । ସାଂସଦମାନେ ନିଜ ବିବେକର କଥା ଶୁଣିବାକୁ ସେ ଆହ୍ୱାନ ଦେଇଥିଲେ । ନବୀନଙ୍କ ଏହି ଚିଠିର ତତକ୍ଷଣାତ ଜବାବ ଦେଲେ ଧର୍ମେନ୍ଦ୍ର । ଓଡ଼ିଶା ୯୦ ପ୍ରତିଶତ ରାଜସ୍ୱ ପାଇବ ବୋଲି ସେ ଯୁକ୍ତି ରଖିଛନ୍ତି । ହେଲେ ଏହାର ଆଧାର କହିନାହାନ୍ତି । ତେବେ ଓଡ଼ିଶା ୧ ଲକ୍ଷ କୋଟି ବକେୟା ଟଙ୍କା ହରାଇବ ନା ନାଇଁ ଏବଂ ବର୍ଷକୁ ୧୨ ହଜାର କୋଟି ହରାଇବ ନା ନାଇଁ ତାହାର ଉତ୍ତର ଦେଇନାହାନ୍ତି ।

କେବଳ ବିଜେଡି ନୁହେଁ, କଂଗ୍ରେସ ନେତୃତ୍ୱରେ ଇଣ୍ଡି ମେଣ୍ଟ ଏହି ପ୍ରସଙ୍ଗରେ ବାହାରିଛନ୍ତି । ମୁଖ୍ୟ ବିରୋଧୀ ଦଳ ବିଜେଡି ପ୍ରତିଦିନ ସାମ୍ବାଦିକ ସମ୍ମିଳନୀ କରି ସରକାରଙ୍କୁ ପ୍ରଶ୍ନ ପଚାରୁଥିବା ବେଳେ ଏହି କଳା ଆଇନ ପ୍ରତ୍ୟାହାର ନ ହେଲେ ଆନ୍ଦୋଳନ ହେବ ବୋଲି ଚେତାବନୀ ଦେଇ ଚାଲିଛି । ଅବଶ୍ୟ ବିଜେଡିର ଏହି ଚେତାବନୀ କେବଳ ସାମ୍ବାଦିକ ସମ୍ମିଳନୀରେ ଅଟକି ରହିଛି । ସେପଟେ କଂଗ୍ରେସ କିନ୍ତୁ ଇଣ୍ଡି ମେଣ୍ଟ ସହଯୋଗୀଙ୍କୁ ଧରି ସାରା ରାଜ୍ୟରେ ଅଭିଯାନ ଚଳାଇଛି ।

ଏତେବଡ଼ ପ୍ରସଙ୍ଗରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କିନ୍ତୁ ମୁହଁ ନ ଖୋଲିବା ସମସ୍ତଙ୍କୁ ବିସ୍ମିତ କରିଛି । ନବୀନଙ୍କ ଚିଠିର ଜବାବ ତ ଦେଲେନି, ଖଣି ସଂଶୋଧନ ଆଇନରେ ଓଡ଼ିଶାକୁ ଲାଭ ନା କ୍ଷତି ହେବ ତାହାର ସ୍ପଷ୍ଟୀକରଣ ଦେବାକୁ ମଧ୍ୟ ଉଚିତ୍ ମଣିନାହାନ୍ତି । ମୁଖ୍ୟମନ୍ତ୍ରୀଙ୍କ ପାଇଁ ପ୍ରସଙ୍ଗଟି ହୁଏତ ଛୋଟ ମନେ ହୋଇଛି ଅଥବା ସତ୍ୟ ଜାଣିଥିବାରୁ ପାଟି ଚୁପ୍ ରଖିବାକୁ ଉଚିତ ମଣିଛନ୍ତି ।

ମୁଖ୍ୟମନ୍ତ୍ରୀ ପ୍ରତିଦିନ ଦୁଇ ତିନୋଟି ବଡ଼ ବଡ଼ ସରକାରୀ କାର୍ଯ୍ୟକ୍ରମରେ ଯୋଗ ଦେଇ ଘଣ୍ଟା ଘଣ୍ଟା ଧରି ଭାଷଣ ପଢ଼ୁଛନ୍ତି । ରାଜ୍ୟବାସୀଙ୍କ ପାଇଁ କେତେ ଯୋଜନା, କେତେ ପ୍ରକଳ୍ପ ସେହି ଭାଷଣରେ ରହୁଛି । ମାତ୍ର ମୁଖ୍ୟମନ୍ତ୍ରୀଙ୍କ ସେହି ଭାଷଣ ସାଧାରଣ ଲୋକଙ୍କୁ ଆକୃଷ୍ଟ କରିପାରୁନାହିଁ । କାରଣ ପାଖାପାଖି ଅଢ଼େଇ ବର୍ଷ ହେଲାଣି ଲୋକେ ତାଙ୍କ ଭାଷଣର କାର୍ଯ୍ୟକାରିତା ଅନୁଭବ କରିପାରୁନାହାନ୍ତି । ମୁଖ୍ୟମନ୍ତ୍ରୀ ସଭାସମିତି ଓ ଭାଷଣରେ ଅଧିକ ବ୍ୟସ୍ତ ରହୁଥିବାରୁ ବାସ୍ତବତାଠାରୁ ଦୂରେଇ ଯାଇଛନ୍ତି ବୋଲି ଲୋକଙ୍କ ମଧ୍ୟରେ ଧାରଣା ସୃଷ୍ଟି ହୋଇଛି ।

ଏପରିକି ସେପ୍ଟେମ୍ବର ୮ରେ ମୁଖ୍ୟମନ୍ତ୍ରୀ ପୁଞ୍ଜି ଆଣିବାକୁ ଦୁବାଇ ଯିବା ଖବର ସେଭଳି ଗୁରୁତ୍ୱ ପାଇନାହିଁ । ବରଂ ଏମଏମଡିଆର ସଂଶୋଧନ ଆଇନରେ ଓଡ଼ିଶାର ଲାଭକ୍ଷତିକୁ ନେଇ ଗାଁ ଗହଳିରେ ଲୋକେ ଆଲୋଚନା କଲେଣି । ମୁଖ୍ୟମନ୍ତ୍ରୀ ଏ ସମ୍ପର୍କରେ କାହିଁକି ନିରବ ତାହାର ଉତ୍ତର ପାଇବାକୁ ସେମାନଙ୍କର ଉତ୍କଣ୍ଠା ବଢ଼ିଛି ।