ଭୁବନେଶ୍ୱର: ପ୍ରମୁଖ ଟିଭି ଚାନେଲଗୁଡ଼ିକ ଏବେ କିପରି ବିଜେପି ପ୍ରେମରେ ବନ୍ଧା ତାହା ଗୁଜୁରାଟ ନିର୍ବାଚନରୁ ଆହୁରି ସ୍ପଷ୍ଟ ହୋଇଯାଇଛି । ନିର୍ବାଚନ ଆରମ୍ଭରୁ ଶେଷଯାଏଁ ସେମାନଙ୍କର ମୋଦି ଜୟଜୟକାର ସାଧାରଣ ଲୋକଙ୍କ ପାଇଁ ବି ଚର୍ଚ୍ଚାର ବିଷୟ ପାଲଟିଛି । ନିର୍ବାଚନ ଫଳାଫଳ ଦିନ ଟିଭି ପରଦାରେ ସେମାନେ ଦେଖିଥିଲେ ବିଜେପି ଓ ନରେନ୍ଦ୍ର ମୋଦିଙ୍କ ପରସ୍ତ ପରସ୍ତର ସ୍ତୁତିଗାନ୍ । ଗୁଜୁରାଟରେ ବିଜେପି ଟ୍ରେଣ୍ଡ ୧୦୦ ଟପିଲା ବେଳେ ଜାତୀୟ ଚାନେଲର ସେଲିବ୍ରିଟି ଆଙ୍କରମାନେ ଗଳାଫଟାଇ ଦେଇଥିଲେ । ଜଣେ ଆଙ୍କର ଖୁସିରେ ତାଙ୍କ ଚଉକି ଛାଡ଼ି ଦେଇଥିଲେ । ୨୦୧୯ ରେ କେନ୍ଦ୍ରରେ ବିଜେପିର ରିଟର୍ଣ୍ଣକୁ ସୁନିଶ୍ଚିତ ଦର୍ଶାଇ ନିର୍ବାଚନ କେବଳ ଏକ ଫର୍ମାଲିଟି ବୋଲି ଏକ ଚାନେଲ କହିଚାଲିଥିଲା । ସଂପୃକ୍ତ ଚାନେଲଗୁଡ଼ିକ ଚୂଡ଼ାନ୍ତ ଫଳାଫଳକୁ ଅପେକ୍ଷା ନ କରି କଂଗ୍ରେସ ଓ ରାହୁଲ ଗାନ୍ଧୀଙ୍କୁ ଜୋକର୍ କରିଦେଇଥିଲେ । ରାହୁଲଙ୍କ ପପୁ ଇମେଜ୍ କୁ ସେମାନେ ବାରମ୍ବାର ଉପସ୍ଥାପିତ କରୁଥିଲେ । ଚାନେଲଗୁଡ଼ିକୁ ଦେଖୁଥିବା ସାଧାରଣ ଜନତା ବି ରାହୁଲଙ୍କ ନେତୃତ୍ୱ ଓ କଂଗ୍ରେସର ସ୍ଥିତି ନେଇ ଭ୍ରମରେ ପଡ଼ିଯାଇଥିଲେ । ଗୁଜୁରାଟ ସମେତ ସମଗ୍ର ଭାରତବର୍ଷରୁ କଂଗ୍ରେସ ଯେ ସଫା ହୋଇଗଲା ସେଭଳି ଏକ ଧାରଣା ଆସିଥିଲା ।
ପ୍ରମୁଖ ଟିଭି ଚାନେଲମାନଙ୍କର ଏଭଳି ଆଭିମୁଖ୍ୟ ସାଧାରଣ ଜନତାଙ୍କୁ ଚିନ୍ତାରେ ପକାଇଛି । ଗୁଜୁରାଟର ଚୂଡ଼ାନ୍ତ ଫଳାଫଳ ଜାଣିଲା ପରେ ଗଣମାଧ୍ୟମ ଉପରୁ ସେମାନଙ୍କ ଆସ୍ଥା ତୁଟିଯାଉଛି । ଗଣମାଧ୍ୟମ ବି ବିକ୍ରୀ ହୋଇପାରେ ସେହି ଧାରଣା ଅଧିକ ଦୃଢ଼ୀଭୂତ ହେଉଛି । ଦେଶର ଜଣାଶୁଣା ବୁଦ୍ଧିଜୀବୀମାନେ ମଧ୍ୟ ଗଣମାଧ୍ୟମର ଏଭଳି ପକ୍ଷପାତିତାକୁ ସହଜରେ ଗ୍ରହଣ କରିନାହାନ୍ତି । ତେବେ ନରେନ୍ଦ୍ର ମୋଦି ଓ ତାଙ୍କ ବିଜେପିକୁ ଏହି ମେନଷ୍ଟ୍ରିମ୍ ମିଡ଼ିଆ ଯେ ଭଲ ପାଇ ଗଳା ଫଟାଉଛନ୍ତି ତାହା ନୁହେଁ । ଅତୀତରେ ଉପା ସରକାର ବେଳେ ମଧ୍ୟ ଅନୁରୂପ ଘଟଣା ଦେଖିବାକୁ ମିଳୁଥିଲା । ଯେଉଁ ପ୍ରମୁଖ ଚାନେଲ ନରେନ୍ଦ୍ର ମୋଦିଙ୍କୁ ଆଜି ମୁଣ୍ଡ ଉପରେ ବସାଇଛନ୍ତି, ସାଢ଼େ ୩ ବର୍ଷ ପୂର୍ବରୁ ସେମାନେ ତାଙ୍କୁ ମୌତ୍ କା ସୌଦାଗର ଭାବେ ଅଭିହିତ କରିଥିଲେ । ବିଜେପି ଉପରେ ସାମ୍ପ୍ରଦାୟିକତାର ଛାଟ ବସାଇଥିଲେ । ମାତ୍ର କ୍ଷମତା ବଦଳିବା ସହ ଆଜି ସେମାନଙ୍କ ସ୍ୱର ବଦଳିଯାଇଛି । ଅର୍ଥାତ୍ କ୍ଷମତା ଯୁଆଡେ ସେମାନେ ସିଆଡେ । ଏବେ କୁହାଯାଉଛି, ଗଣମାଧ୍ୟମ ଉପରେ ତିକ୍ତ ଅଭିଜ୍ଞତା ରଖିଥିବା ମୋଦି କ୍ଷମତା ପାଇଲା ପରେ ନିଜର ରାଗ ଶୁଝାଉଛନ୍ତି । ବର୍ତ୍ତମାନର ଅଧିକାଂଶ ମେନଷ୍ଟ୍ରିମ୍ ମିଡ଼ିଆ ସମ୍ପୂର୍ଣ୍ଣ ଭାବେ ମୋଦି ସରକାରଙ୍କ ନିୟନ୍ତ୍ରଣକୁ ଚାଲିଯାଇଥିବା କୁହାଯାଉଛି ।
ଖାଲି ଜାତୀୟସ୍ତରରେ ନୁହେଁ, ଓଡ଼ିଶାରେ ମଧ୍ୟ ସମାନ ଅବସ୍ଥା । ବର୍ଷା ଯୁଆଡ଼େ, ଛତା ସିଆଡେ ନ୍ୟାୟରେ କ୍ଷମତା ନିକିତିରେ ମିଡ଼ିଆ ନିଜକୁ ତଉଲେଇ ଦେଇଛି । ଲୋକଙ୍କ ସମସ୍ୟାକୁ କମ୍ ଗୁରୁତ୍ୱ ଦେଇ ନିଜକୁ ସୁହାଇଲା ଭଳି ଖବର ହେଉଥିବା ଅଭିଯୋଗ ହେଉଛି । କ୍ଷମତା ଛାଇରେ ରହି ନିଜ ବ୍ୟବସାୟିକ ସ୍ୱାର୍ଥକୁ ପ୍ରାଧାନ୍ୟ ଦେଉଛନ୍ତି ମିଡ଼ିଆ ମାଲିକ । ମେନଷ୍ଟ୍ରିମ୍ ମିଡ଼ିଆର ଏଭଳି ଟ୍ରେଣ୍ଡ ଜନସାଧାରଣଙ୍କ ପାଇଁ ବିପଦଜ୍ଜନକ ଅବସ୍ଥା ସୃଷ୍ଟି କରିଥିବା କୁହାଯାଉଛି । ଜୀ-କଳିଙ୍ଗ ଓ ଇଟିଭି ଓଡ଼ିଆର ପୂର୍ବତନ ମୁଖ୍ୟ ସମ୍ପାଦକ ତଥା ବରିଷ୍ଠ ସାମ୍ବାଦିକ ସତ୍ୟପ୍ରକାଶ ନାୟକ କହିଛନ୍ତି, କ୍ଷମତାକେନ୍ଦ୍ରର ନିକଟତର ହେବାକୁ ମିଡ଼ିଆ ହାଉସ୍ ଗୁଡ଼ିକ ବ୍ୟାକୁଳ ହୋଇପଡ଼ିଛନ୍ତି । କ୍ଷମତାଶାଳୀ ରାଜନୈତିକ ଦଳ ଓ ବ୍ୟକ୍ତିଙ୍କୁ ଖୁସି କରାଇବା ପାଇଁ ପ୍ରତିଯୋଗିତା ଚାଲିଛି । ସେମାନଙ୍କ ଇଚ୍ଛାରେ ତିଆରି ହେଉଛି ଖବର । ଏହି ଖୁସି କରାଇବା ଉଦ୍ୟମ ପଛରେ ବିଜ୍ଞାପନ ବା ଅର୍ଥମୋହ ରହିଛି । ଆଉ ଏକ କାରଣ ହେଉଛି, ଅଧିକାଂଶ ମିଡ଼ିଆ ମାଲିକ ଏକାଧିକ ବ୍ୟବସାୟରେ ସଂପୃକ୍ତ ଥିବାରୁ ସରକାରୀ କଳ ଓ ରାଜନେତାଙ୍କ ଶରଣରେ ରହିଛନ୍ତି । ତେଣୁ ସେଠି ନିରପେକ୍ଷ ଖବର ଆଶା କରିବା ବୃଥା ବୋଲି ଶ୍ରୀ ନାୟକ କହିଛନ୍ତି ।
ସୂଚନାଯୋଗ୍ୟ, ନିକଟରେ ୱାଲର୍ଡ ଇକୋନିମିକ୍ ଫୋରମ୍ ପକ୍ଷରୁ ଏକ ସର୍ଭେରେ ଭାରତୀୟ ମିଡ଼ିଆକୁ ଦୁର୍ନୀତିଗ୍ରସ୍ତ ଓ ବିଶ୍ୱର ଦ୍ୱିତୀୟ ସର୍ବବୃହତ୍ତ ଅବିଶ୍ୱନୀୟ ସଂସ୍ଥା ଭାବେ ନାମିତ କରାଯାଇଛି । ଏଠାରେ ବହୁ ସାମ୍ବାଦିକ ନିଜର ଦାୟିତ୍ୱ ଓ କର୍ତ୍ତବ୍ୟବୋଧ ଭୁଲି ନିର୍ଦ୍ଦିଷ୍ଟ ଗୋଷ୍ଠୀର ପିଆର ଏଜେଣ୍ଟ ଭାବେ କାର୍ଯ୍ୟ କରୁଛନ୍ତି । ୨୮ ଟି ଦେଶକୁ ନେଇ ହୋଇଥିବା ଏହି ସର୍ଭେରେ ଭାରତୀୟ ମିଡ଼ିଆକୁ ‘କର୍ପୋରେଟ୍ ମେସିନ୍’ ଆଖ୍ୟା ଦିଆଯାଇଛି । ତେବେ ସୋସିଆଲ୍ ମିଡ଼ିଆର ଅଭ୍ୟୁଦୟ ଜନସାଧାରଣଙ୍କ ମନରେ ନୂଆ ଆଶା ସଞ୍ଚାର କରିଛି ଏବଂ ଲୋକଙ୍କ ଦ୍ୱାରା ଅଧିକ ଗ୍ରହଣୀୟ ହୋଇପାରିଛି ବୋଲି ସର୍ଭେ ରିପୋର୍ଟରେ କୁହାଯାଇଛି ।
