କେନ୍ଦ୍ରାପଡ଼ା/ଭୁବନେଶ୍ୱର: ମିଥ୍ୟା ସତ୍ୟପାଠ ମାମଲାରେ ସାଂସଦ ବୈଜୟନ୍ତ ପଣ୍ଡାଙ୍କୁ ଡବଲ ଚଡ଼କ ପଡ଼ିଲା । ଗୋପାଳ ଲେଙ୍କାଙ୍କ ଆବେଦନ ଉପରେ କେନ୍ଦ୍ରାପଡ଼ା ଏସଡିଜେଏମ୍ ଆଜି ଶୁଣାଣି କରି କେନ୍ଦ୍ରାପଡ଼ା ଜିଲ୍ଲା ନିର୍ବାଚନ ରିଟର୍ଣ୍ଣିଂ ଅଫିସର ତଥା ଜିଲ୍ଲାପାଳଙ୍କୁ କୋର୍ଟରେ ହାଜିରା ନୋଟିସ୍ ଦେଇଛନ୍ତି । ୨୦୧୪ ମସିହାରେ ବୈଜୟନ୍ତ ଦାଖଲ କରିଥିବା ନିର୍ବାଚନୀ ସତ୍ୟପାଠର ମୂଳ କାଗଜପତ୍ର ଦାଖଲ ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି । ଜୁନ୍ ୨୯ ତାରିଖରେ ଜିଲ୍ଲାପାଳ କୋର୍ଟରେ ଏହା ଉପସ୍ଥାପନ କରିବେ । ଏଥିସହ ଆବେଦନକାରୀ ଶ୍ରୀ ଲେଙ୍କା ଓ ୨ ଜଣ ସାକ୍ଷୀ ସୁଶାନ୍ତ ମଲ୍ଲିକ ଓ ସୁଶାନ୍ତ ସାହୁଙ୍କ ସମ୍ପର୍କରେ ତଥ୍ୟ ସଂଗ୍ରହ କରି କୋର୍ଟରେ ଦାଖଲ ପାଇଁ ବିଚାରପତି ନିର୍ଦ୍ଦେଶ ଦେଇଛନ୍ତି ।
ଟାଙ୍ଗୀ ହରିଅନ୍ତାର ଗୋପାଳ ଚନ୍ଦ୍ର ଲେଙ୍କା ଗତ ମାର୍ଚ୍ଚ ୧୫ ତାରିଖରେ କେନ୍ଦ୍ରାପଡ଼ା ଏସଡ଼ିଜେଏମ୍ ଙ୍କ କୋର୍ଟରେ ସାଂସଦ ବୈଜୟନ୍ତଙ୍କ ବିରୋଧରେ ମାମଲା ଦାଏର କରିଥିଲେ । ୨୦୧୪ ନିର୍ବାଚନ ବେଳେ ବୈଜୟନ୍ତ ତାଙ୍କ ନାମାଙ୍କନପତ୍ର ସତ୍ୟପାଠରେ ଭୁଲ୍ ତଥ୍ୟ ଦେଇଛନ୍ତି ଏବଂ ଇମ୍ଫାରେ ଚାକିରି କରି କୋଟି କୋଟି ଟଙ୍କା ଦରମା ନେଇଥିଲେ ମଧ୍ୟ ଲୁଚାଇଛନ୍ତି । ଏଭଳି କରି କେନ୍ଦ୍ରାପଡ଼ାବାସୀଙ୍କୁ ପ୍ରତାରିତ କରିଥିବା ବୈଜୟନ୍ତଙ୍କ ସଭ୍ୟପଦ ରଦ୍ଦ ପାଇଁ ସେ ଆବେଦନ କରିବା ସହ ତାଙ୍କ ବିରୋଧରେ ଅପରାଧିକ ମାମଲା ରୁଜୁ ପାଇଁ ପ୍ରାର୍ଥନା କରିଥିଲେ । ମାର୍ଚ୍ଚ ୩୦ ତାରିଖରେ ଏସଡ଼ିଜେଏମ୍ କୋର୍ଟ ଶ୍ରୀ ଲେଙ୍କାଙ୍କ ଆବେଦନକୁ ବିଚାର ପାଇଁ ଗ୍ରହଣ କରିବା ସହ ତାଙ୍କର ବୟାନ ରେକର୍ଡ କରିଥିଲେ । ଗତ ଏପ୍ରିଲ୍ ୨୧ ତାରିଖରେ କୋର୍ଟ ଏହି ମାମଲାରେ ସାକ୍ଷ୍ୟ ଗ୍ରହଣ କରିଥିଲେ । ମେ ୫ ତାରିଖରେ ଦୁଇ ସାକ୍ଷୀଙ୍କ ରେକର୍ଡ ବୟାନ କରିଥିଲେ । ଆଜି ଏହାର ପରବର୍ତ୍ତୀ ଶୁଣାଣିରେ କୋର୍ଟ ଜିଲ୍ଲାପାଳଙ୍କୁ ହାଜର ପାଇଁ ନିର୍ଦ୍ଦେଶ ଦେଇଛନ୍ତି ।
ପୂର୍ବରୁ ସମାନ ମାମଲାରେ ଦିଲ୍ଲୀପ କୁମାର ଦାସ ନାମକ ଜଣେ ବ୍ୟକ୍ତିଙ୍କ ଆବେଦନକୁ କେନ୍ଦ୍ରପଡ଼ା ଏସଡ଼ିଜେଏମ୍ କୋର୍ଟ ଗ୍ରହଣ କରିଛନ୍ତି । ବୈଜୟନ୍ତଙ୍କ ବିରୋଧରେ ଆଇପିସି ୪୨୦ ଦଫା(ଠକେଇ) ଭଳି ସଙ୍ଗୀନ ଫୌଜଦାରୀ ମାମଲା ରୁଜୁ ପାଇଁ ଗତ ୩ ତାରିଖରେ ପୁଲିସକୁ ନିର୍ଦ୍ଦେଶ ଦେଇଛନ୍ତି । ମାମଲାର ତଦନ୍ତ ପାଇଁ କେନ୍ଦ୍ରାପଡ଼ା ଟାଉନ୍ ଥାନାକୁ କୋର୍ଟ ନିର୍ଦ୍ଦେଶ ଦେବା ପରେ ପରଦିନ ଅର୍ଥାତ ୪ ତାରିଖରେ ପୁଲିସ ବୈଜୟନ୍ତଙ୍କ ବିରୋଧରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛନ୍ତି । ଜୁଲାଇ ୨୫ ତାରିଖ ଭିତରେ ତଦନ୍ତ ସାରି ପୁଲିସ କୋର୍ଟକୁ ରିପୋର୍ଟ ଦେବେ ।
