ଭୁବନେଶ୍ୱର: କେରଳରେ ବନ୍ୟାର ତାଣ୍ଡବ ଜାରି ରହିଛି । ନ ଖାଇ ନ ପିଇ ଲକ୍ଷ ଲକ୍ଷ ଲୋକ ଏବେ ବି ପାଣି ଘେରରେ । ବନ୍ୟା ପ୍ରପୀଡ଼ିତଙ୍କ ପାଇଁ ସବୁଆଡୁ ସାହାଯ୍ୟ ଓ ସହାନୁଭୂତି ଆସିବାରେ ଲାଗିଛି । ଓଡ଼ିଶା ସରକାର ମଧ୍ୟ ସେଥିରେ ପଛଘୁଞ୍ଚା ଦେଇନାହାନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସହୃଦୟତାର ହାତ ବଢ଼େଇଛନ୍ତି । ତିନି ଦିନ ତଳେ ମୁଖ୍ୟମନ୍ତ୍ରୀ କେରଳକୁ ୫ କୋଟି ଟଙ୍କା ସହାୟତା ଘୋଷଣା କରିଥିଲେ । ଆଜି ଆଉ ୫ କୋଟି ଟଙ୍କା ଅତିରିକ୍ତ ସହାୟତା ଘୋଷଣା କରିଛନ୍ତି । ମୁଖ୍ୟମନ୍ତ୍ରୀଙ୍କ ରିଲିଫ୍ ଫଣ୍ଡରୁ ଏହି ଟଙ୍କା ଦିଆଯିବ । ଏଥିସହ ୮ କୋଟି ଟଙ୍କା ମୂଲ୍ୟର ୫୦୦ ଏମଟି ପଲିଥିନ୍ ସିଟ୍ କେରଳକୁ ପଠାଇବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।
ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଗତକାଲି ଓଡ଼ିଶା ଅଗ୍ନିଶମ ସେବାର ୨୪୪ ଜଣିଆ ଟିମ୍ କେରଳରେ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିଛନ୍ତି । ସେହି ଦଳରେ ଅଛନ୍ତି ୨୨୫ ଜଣ ବୈଷୟିକ ଅଧିକାରୀ, ଫାୟାର ମ୍ୟାନ୍ ଓ ବୋଟ ଅପରେଟର । ୬୫ ଟି ରେସକ୍ୟୁ ବୋଟ୍ ଓ ଅନ୍ୟାନ୍ୟ ଆନୁସଙ୍ଗିକ ଯନ୍ତ୍ରପାତି ସେମାନେ ସାଙ୍ଗରେ ନେଇଛନ୍ତି ।
ସାଧାରଣ ମଣିଷ ପାଇଁ ଏଭଳି ପ୍ରାକୃତିକ ଦୁର୍ବିପାକର ଭୟବହତା କେତେ ତାହା ଓଡ଼ିଶା ଭଲ ଭାବେ ଜାଣେ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏଭଳି ସମୟରେ କେରଳ ବନ୍ୟା ପ୍ରପୀଡ଼ିତଙ୍କ ସହ ଓଡ଼ିଶା ଦୃଢ଼ ଭାବେ ରହିଥିବା ସେ କହିଛନ୍ତି । ଏହି ଦୁର୍ବିପାକରେ ଜୀବନ ହରେଇଥିବା ଲୋକଙ୍କ ପାଇଁ ମୁଖ୍ୟମନ୍ତ୍ରୀ ଗଭୀର ଦୁଃଖ ପ୍ରକାଶ କରିଛନ୍ତି ।
କେରଳ ବନ୍ୟାରେ ଫସିଥିବା ଓଡ଼ିଆଙ୍କୁ ଉଦ୍ଧାର କରି ସେମାନଙ୍କୁ ସବୁପ୍ରକାର ସହାୟତା ଯୋଗାଇଦେବାର ବ୍ୟବସ୍ଥା କରିବାକୁ ମୁଖ୍ୟମନ୍ତ୍ରୀ ସ୍ୱତନ୍ତ୍ର ରିଲିଫ୍ କମିଶନରଙ୍କୁ ନିର୍ଦ୍ଦେଶ ଦେଇଛନ୍ତି । ଇତିମଧ୍ୟରେ ଶ୍ରମ ବିଭାଗର ଏକ ଟିମ୍ କେରଳରେ ପହଞ୍ଚି ସେଠାରେ ଫସିଥିବା ଓଡ଼ିଆ ଶ୍ରମିକଙ୍କ ଉଦ୍ଧାର କାର୍ଯ୍ୟ ତଦାରଖ କରୁଛନ୍ତି ।
