ଭୁବନେଶ୍ୱର: ଆଗାମୀ ବିଧାନସଭା ନିର୍ବାଚନ ପାଇଁ କଂଗ୍ରେସର ପ୍ରସ୍ତୁତି ଜୋରଦାର । ନୂଆ କରି ଗଠିତ ପ୍ରଦେଶ କଂଗ୍ରେସ ନିର୍ବାଚନ କମିଟିର ପ୍ରଥମ ବୈଠକ ଆଜି ବସିଥିଲା । ଏଥିରେ ପ୍ରାର୍ଥୀ ଚୟନର ମାପକାଠି ସମ୍ପର୍କରେ ଆଲୋଚନା ହୋଇଥିଲା । ବୈଠକ ଶେଷରେ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି, ଏଥର ନିର୍ବାଚନରେ ନୂଆ ମୁହଁଙ୍କୁ ଗୁରୁତ୍ୱ ଦିଆଯିବ । ଉଇନେବିଲିଟି ବା ବିଜୟ ସମ୍ଭାବନା ପ୍ରାର୍ଥୀ ଚୟନର ମୁଖ୍ୟ ମାପକାଠି ହେବ ବୋଲି ସେ ସୂଚନା ଦେଇଛନ୍ତି । ୧୫ ଜଣ ଯାକ ବିଧାୟକଙ୍କୁ ପୁନର୍ବାର ଟିକେଟ ଦିଆଯିବ ବୋଲି ମଧ୍ୟ ପିସିସି ସଭାପତି ସ୍ପଷ୍ଟ କରିଛନ୍ତି । ଆଜିର ବୈଠକରେ କେବଳ ପ୍ରାର୍ଥୀ ଚୟନ ମାପକାଠି ସମ୍ପର୍କରେ ଆଲୋଚନା ହୋଇଛି,କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇନାହିଁ ବୋଲି ସେ କହିଛନ୍ତି ।
୧୫ ଦିନ ଭିତରେ ୫୦ଟି ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା ହେବ ବୋଲି ଗତକାଲି କଂଗ୍ରେସ ପ୍ରଭାରୀ ଜିତେନ୍ଦ୍ର ସିଂ ସୂଚନା ଦେଇଥିଲେ । ସେହି ଅନୁଯାୟୀ, ଆଜିର ବୈଠକରେ ପ୍ରଥମ ପର୍ଯ୍ୟାୟର ପ୍ରାର୍ଥୀ ତାଲିକା ଉପରେ ବିଶଦ ଆଲୋଚନା ହୋଇଛି । ଦୁଇ ତିନି ଦିନ ମଧ୍ୟରେ ସମ୍ଭାବ୍ୟ ପ୍ରାର୍ଥୀ ତାଲିକା ଏଆଇସିସି ସ୍କ୍ରିନିଂ କମିଟିର ଅନୁମୋଦନ ପାଇଁ ପଠାଯିବ ବୋଲି ଏକ ସୂତ୍ରରୁ ଜଣାପଡ଼ିଛି । ବିଧାୟକଙ୍କ ୧୫ ଟି ଆସନକୁ ଛାଡ଼ିଦେଲେ ଅବଶିଷ୍ଟ ୩୫ ଆସନରୁ ସର୍ବାଧିକ ୪ ଜଣ ଲେଖାଏଁ ନାଁ ଉପରେ ପିସିସି ନିର୍ବାଚନ କମିଟି ମୋହର ମାରି ଦିଲ୍ଲୀ ପଠାଇପାରେ ।
ବିଜେଡ଼ି ଓ ବିଜେପି ଭଳି କଂଗ୍ରେସ ବି ତୃଣମୂଳ ସଂଗଠନ ମଜବୁତ୍ ଉପରେ ଗୁରୁତ୍ୱ ଦେଇଛି । ବୁଥ୍ ସ୍ତରରୁ ଦଳକୁ ମଜବୁତ କରିବାକୁ ରାହୁଲ ଗାନ୍ଧୀଙ୍କ ନିର୍ଦ୍ଦେଶକୁ ଅକ୍ଷରେ ଅକ୍ଷରେ ପାଳନ କରିବାକୁ ଟିମ୍ ନିରଞ୍ଜନ ନିଷ୍ପତ୍ତି ନେଇଛନ୍ତି । ରାଜସ୍ଥାନ ଢ଼ାଞ୍ଚାରେ ‘ମୋ ବୁଥ୍, ମୋ ଗୌରବ’ ଅଭିଯାନ ଗତକାଲିଠାରୁ ଦଳ ଆରମ୍ଭ କରିସାରିଛି । ରାଜ୍ୟର ସମସ୍ତ ବୁଥ୍ ରେ ଜଣେ ସଭାପତି ଓ ୨ ଜଣ ସଦସ୍ୟଙ୍କୁ ନେଇ ଏକ କମିଟି ଗଠନ ହେବ । ଆସନ୍ତା ୩୧ ତାରିଖ ସୁଦ୍ଧା ଏହି ପ୍ରକ୍ରିୟା ଶେଷ କରିବାକୁ ଯୋଜନା ହୋଇଛି । ସେପ୍ଟେମ୍ବର ପହିଲାରୁ ଦଳ ନିର୍ବାଚନମଣ୍ଡଳୀ ବୁଲିବା ଆରମ୍ଭ କରିବ ବୋଲି ସ୍ଥିର ହୋଇଛି । ପ୍ରତି ନିର୍ବାଚନମଣ୍ଡଳୀ ପାଇଁ ଜଣେ ଲେଖାଏଁ ପର୍ଯ୍ୟବେକ୍ଷକ ନିଯୁକ୍ତ ହେବେ ଏବଂ ପ୍ରତି ମାସରେ ସେମାନେ ୧୫ ଦିନ ନିର୍ବାଚନମଣ୍ଡଳୀରେ ରହିବାକୁ ବାଧ୍ୟ ।
କାମ କଲେ ପ୍ରମୋସନ୍ ନହେଲେ ବିଶ୍ରାମ । କଂଗ୍ରେସ ନେତା ଓ କର୍ମୀଙ୍କୁ ଏହା ବାର୍ତ୍ତା ଦେଇଛନ୍ତି ପ୍ରଭାରୀ ଜିତେନ୍ଦ୍ର ସିଂ । ଏହା ହିଁ ରାହୁଲଙ୍କ ନିର୍ଦ୍ଦେଶ ବୋଲି ସେ କହିଛନ୍ତି । ରାଜ୍ୟରେ ବିଜେଡ଼ିର କୁଶାସନ ଓ କେନ୍ଦ୍ରରେ ବିଜେପି ସରକାରଙ୍କ ଅପାରଗତାକୁ ଧରି ଗାଁ ଗାଁରେ ପହଞ୍ଚିବ କଂଗ୍ରେସ । ଏଥିପାଇଁ ଟିମ୍ ନିରଞ୍ଜନଙ୍କୁ ଭଲ ଭାବେ ପ୍ରସ୍ତୁତ କରାଉଛନ୍ତି ଜିତେନ୍ଦ୍ର ସିଂ ।
