ସିଟି ବସ୍ ରେ ଜିତେନ୍ଦ୍ର ସିଂ ଆସିଲେ କଂଗ୍ରେସ ଭବନ

ଭୁବନେଶ୍ୱର: ଦରମରା ଅବସ୍ଥାରେ ରହିଥିବା ରାଜ୍ୟ କଂଗ୍ରେସକୁ ସଞ୍ଜିବନୀ ଦେବା ପାଇଁ ଅଣ୍ଟା ଭିଡ଼ିଛନ୍ତି ଦଳର ପ୍ରଭାରୀ ଜିତେନ୍ଦ୍ର ସିଂ । ଅଲୱାର୍ ର ଏହି ଯୁବରାଜ ଖୁବ୍ କମ ଦିନରେ ଓଡ଼ିଶା କଂଗ୍ରେସର ସ୍ଥିତି ପରଖି ସାରିବା ପରେ ଏବେ ସାଧାରଣ ଲୋକଙ୍କ ମନୋଭାବ ଜାଣିବାକୁ ଆଗ୍ରହୀ ହୋଇଛନ୍ତି । ନିଜକୁ କଂଗ୍ରେସ ଭବନରେ ସୀମିତ ରଖିବାକୁ ସେ ଚାହୁଁନାହାନ୍ତି । ସମସ୍ତଙ୍କୁ ଚକିତ କରି ଆଜି କଂଗ୍ରେସ ଭବନକୁ ସେ ଆସିଥିଲେ ସାଧାରଣ ସିଟି ବସ୍ ରେ । ସାଧାରଣ ଟାଉନ୍(ସିଟି) ବସରେ ଅନ୍ୟ ଯାତ୍ରୀଙ୍କ ମେଳରେ କଂଗ୍ରେସ ପ୍ରଭାରୀ ଜିତେନ୍ଦ୍ର ସିଂ ଆସି କଂଗ୍ରେସ ଭବନ ସାମନାରେ ଓହ୍ଲାଇବା ବେଶ୍ ଚର୍ଚ୍ଚାର ବିଷୟ ହୋଇଛି ।

ଓଡ଼ିଶା ଗସ୍ତରେ ଥିବା ଜିତେନ୍ଦ୍ର ସିଂ ରହୁଛନ୍ତି ନୟାପଲ୍ଲୀସ୍ଥିତ ହୋଟେଲ୍ କ୍ରାଉନ୍ ରେ । ଆଜି ସକାଳ ପ୍ରାୟ ୯ଟା ବେଳେ ସେ ହୋଟେଲ ଛାଡ଼ି କଂଗ୍ରେସ ଭବନ ଆସିବାକୁ ବାହାରିଲେ । ତାଙ୍କୁ ଆଣିବା ପାଇଁ ହୋଟେଲ ବାହାରେ କାର୍ ଅପେକ୍ଷା କରିଥିଲା । ମାତ୍ର ଜିତେନ୍ଦ୍ର ସିଂ ସେହି କାର୍ କୁ ଫେରାଇ ଦେଇଥିଲେ । ଏକା ଚାଲି ଚାଲି ସିଧା ଆସିଲେ ରାସ୍ତାକୁ । ଆଉ ବସ ଷ୍ଟପ୍ ରେ ଅଟକି ରହିଲେ । କିଛି ସମୟ ପରେ ମାଷ୍ଟରକ୍ୟାଣ୍ଟିନ୍ ଆସୁଥିବା ଏକ ସିଟି ବସ୍ ରେ ଚଢ଼ିଲେ । ବସ୍ ଭିତରେ ଅନ୍ୟ ସହଯାତ୍ରୀଙ୍କ ସହ ଗପସପରେ ମାତିଗଲେ ଜିତେନ୍ଦ୍ର । ଓଡ଼ିଶାର ରାଜନୈତିକ ପାଣିପାଗ ସମ୍ପର୍କରେ ପଚାରି ବୁଝିଲେ । ବସ୍ ଯାତ୍ରୀଙ୍କ ଭିତରୁ କିଛି ତାଙ୍କୁୁ ଚିହ୍ନି ପାରିଥିଲେ ମଧ୍ୟ ଅନେକଙ୍କ ପାଇଁ ସେ ଥିଲେ ଅଜଣା ପଥିକ । ବସ ମାଷ୍ଟରକ୍ୟାଣ୍ଟିନ୍ ହେଲାରୁ ଜିତେନ୍ଦ୍ର କଣ୍ଡକ୍ଟରଙ୍କୁ ପଇସା ଦେଇ ବସ୍ ରୁ ଓହ୍ଲାଇଲେ ଏବଂ କଂଗ୍ରେସ ଭବନକୁ ଚାଲି ଚାଲି ଗଲେ ।

ସାଧାରଣ ଲୋକ ଓ କର୍ମୀଙ୍କ ସହ ଅତି ଆରାମ୍ ରେ ମିଶିପାରୁଥିବା ଏହି ଦିଲ୍ଲୀ ନେତା ତଥା ଯୁବରାଜଙ୍କ ଭଦ୍ର ଓ ନମ୍ର ଆଚରଣ ରାଜ୍ୟ କଂଗ୍ରେସ ପାଇଁ ଏବେ ବଡ଼ ଆସେଟ୍ ହୋଇଛି । ଓଡ଼ିଶା କଂଗ୍ରେସକୁ ଚଳଚଞ୍ଚଳ କରିବାକୁ ସେ ନିଜର ଫୁଲ ଦମ୍ ଖଟାଇଛନ୍ତି । କଂଗ୍ରେସ ପ୍ରତି ଲୋକଙ୍କ ଆସ୍ଥା ଫେରାଇ ଆଣିବାକୁ ସେ ବିଭିନ୍ନ ଏକ୍ସପେରିମେଣ୍ଟ ଚଲାଇଥିବା ଦଳୀୟ ମହଲରେ ଚର୍ଚ୍ଚା ହେଉଛି । ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ବିରୋଧରେ ରହିଥିବା ବିଭିନ୍ନ ପ୍ରସଙ୍ଗକୁ ପ୍ରଭାବୀ ଢ଼ଙ୍ଗରେ ଆଣିବା ପାଇଁ ସେ ପ୍ରସ୍ତୁତ କରିଛନ୍ତି ରୋଡମ୍ୟାପ୍ ।

ଆଜି ଅପରାହ୍ନରେ କଂଗ୍ରେସ ଭବନରେ ଏକ ସାମ୍ବାଦିକ ସମ୍ମିଳନୀ କରି ସେ ରାଫେଲ୍ ଦୁର୍ନୀତି ପ୍ରସଙ୍ଗରେ କେନ୍ଦ୍ର ସରକାରଙ୍କ ଉପରେ ହମଲା କରିଥିଲେ । ରାଫେଲ୍ ବିମାନ କିଣାରେ ୧ ଲକ୍ଷ ୭୦ ହଜାର କୋଟି ଟଙ୍କାର ଘୋଟାଲା ହୋଇଥିବା କହି ତାହାର ଦସ୍ତାବିଜ୍ ଉପସ୍ଥାପନ କରିଥିଲେ । ଏଆଇସିସିର ନିଷ୍ପତ୍ତିକ୍ରମେ ସେ ନିର୍ଦ୍ଦିଷ୍ଟ ଭାବେ ରାେଫେଲ ଦୁର୍ନୀତିକୁ ପ୍ରସଙ୍ଗ କରିଥିଲେ । ଏଥିରେ ଅନ୍ୟ କୌଣସି ପ୍ରସଙ୍ଗ ଆଲୋଚନା କରିବାକୁ ମନା କରିଥିଲେ ଜିତେନ୍ଦ୍ର ସିଂ ।