ଦାମ ରଥ ରେଡ୍ଡି, ରାଜ୍ୟ ସାରା ବୁଲିବ

ଭୁବନେଶ୍ୱର: ରେଡ୍ଡି ହେଉଛି ଦାମ ରଥ । ଏକ ଏସି ମହିନ୍ଦ୍ରା ଜିପ୍ ଅଣାଯାଇ ତାକୁ ରଥ ଭାବେ ସଜାଯାଉଛି । ସେଥିରେ ବିଜୁ ପଟ୍ଟନାୟକଙ୍କ ଏକ ବିରାଟ ଫଟୋ ସହ ଦାମ ରାଉତଙ୍କ ଫଟୋ ଲାଗିଛି । ଆସନ୍ତା ମାସରୁ ସାରା ରାଜ୍ୟରେ ବୁଲିବ ଏହି ରଥ । ରଥରେ ବସି ବୁଲି ବୁଲି ଭାଷଣ ଦେବେ ଡାକ୍ତର ଦାମ ରାଉତ । ନବୀନ ସରକାରଙ୍କ ଦୁର୍ନୀତି ଲୋକଙ୍କୁ କହିବେ ।

ଦାମ ରଥ ପାଇଁ ଉଦ୍ଦିଷ୍ଟ ଜିପ୍ କିଣିବା ସହ ପ୍ରସ୍ତୁତିର ଯାବତୀୟ ଖର୍ଚ୍ଚ ବୁଝୁଛନ୍ତି ବୈଜୟନ୍ତ ପଣ୍ଡା । ଅତ୍ୟନ୍ତ ଗୋପନୀୟ ଭାବେ ତାଙ୍କ ଘରେ ଏହି ରଥକୁ ସଜାଯାଉଛି । କାର୍ଯ୍ୟସୂଚୀ ବି ପ୍ରସ୍ତୁତ ସରିଲାଣି । ଓଡ଼ିଶା ଭ୍ରମଣର କଣ୍ଟେଣ୍ଟ ଦେବେ ଦାମ ରାଉତ । ବାକି ସବୁ ବୁଝିବେ ବୈଜୟନ୍ତ । ବୈଜୟନ୍ତଙ୍କ ନିକଟତମ ମହଲର ସୂଚନା ଅନୁଯାୟୀ, ଦାମ ରାଉତ ବିଜେଡ଼ିର ବିଦା ହେବାର ଯଥେଷ୍ଟ ପୂର୍ବରୁ ଏହି ଜିପ୍ କିଣାଯାଇଛି । ଆଗକୁ ଏମିତି ହେବ ବୋଲି ବୈଜୟନ୍ତ ନିଶ୍ଚିତ ହେବା ପରେ କାମ ବଢ଼େଇ ଦେଇଥିଲେ । ଦାମଙ୍କ ସହ ବୈଜୟନ୍ତଙ୍କର ପୂର୍ବରୁ ଆଲୋଚନା ହୋଇ ଏହି କାର୍ଯ୍ୟକ୍ରମ ସ୍ଥିର କରାଯାଇଥିବା ଏହି ସୂତ୍ରରୁ ଜଣାପଡ଼ିଛି ।

ନବୀନ ହଟାଓ ଅଭିଯାନରେ ଦାମଙ୍କୁ ପାଇ ବୈଜୟନ୍ତ ଏବେ ଆକାଶରେ ଉଡୁଛନ୍ତି । ନିଜେ ବିଜେଡ଼ିରୁ ବିଦା ହେବା ପରେ ଜନ ସହାନୁଭୂତି ଯୋଗାଡ଼ରେ ଫେଲ୍ ହେବାର ଗ୍ଲାନି ଭୁଲି ଯାଇଛନ୍ତି । ନିଜେ ଯାହା ପାରିଲେନି ଦାମଙ୍କ ଜରିଆରେ ଲକ୍ଷ୍ୟ ହାସଲ କରିବାକୁ ଫୁଲ ଦମ୍ ଖଟାଇଛନ୍ତି । ସେଥିପାଇଁ ଦାମଙ୍କ ପ୍ରଚାରରେ ନିଜ ଟିଭିକୁ ଲଗାଇ ଦେଇଛନ୍ତି । ନବୀନ ହଟାଓ ଅଭିଯାନରେ ସେମାନେ ଯେ ନିଶ୍ଚିତ ସଫଳ ହେବେ ଏହି ବିଶ୍ୱାସ ଜନ୍ମିଛି ବୈଜୟନ୍ତଙ୍କର ।

ବୈଜୟନ୍ତଙ୍କ ବଳ ପାଇ ଦାମ ବି ପ୍ରସ୍ତୁତ ହୋଇଗଲେଣି । ତାଙ୍କ ପାଇଁ ପଇସାର ଅଭାବ ରହିବନି ବୋଲି ସେ ବୁଝିଯାଇଛନ୍ତି । ଖାଲି ବୈଜୟନ୍ତ କାହିଁକି, ଧର୍ମେନ୍ଦ୍ର ପ୍ରଧାନଙ୍କ ସାହାଯ୍ୟ ସହଯୋଗ ବି ତାଙ୍କ ଉପରେ ରହିବ ଏ ବିଶ୍ୱାସ ତାଙ୍କର ଅଛି । ଦାମ ତାଙ୍କ ମିଶନ୍ ରେ ସଫଳ ହେବେ ଏବଂ ନବୀନଙ୍କୁ ଶାସନଗାଦିରୁ ହଟାଇ ଦେବେ ବୋଲି ତାଙ୍କର ସମର୍ଥକମାନେ ମାନେ ଦମ୍ଭ ଦେଖାଇଛନ୍ତି ।