ଭୁୁବନେଶ୍ୱର: ନିଜକୁ ଓଡ଼ିଆ ପୁଅର ଗର୍ବ ଦେଖୋଉଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କର ଓଡ଼ିଆ ପ୍ରୀତି ଧରାପଡ଼ିଛି । ଜଣେ ଅଣଓଡ଼ିଆ ମୁହଁରେ ଓଡ଼ିଶାର ସ୍ୱାଭିମାନ, ଅସ୍ମିତ ଅପମାନିତ ହୋଇ ଚାଲିଥିବା ବେଳେ ତାଙ୍କ ପାଟି ଖୋଲିନି । ଏଥିପାଇଁ ଧାଡ଼ିଟିଏ ନିନ୍ଦା କରିବାକୁ ତାଙ୍କର ମନ ଯାଇନି । ଓଲଟି ସେହି ବ୍ୟକ୍ତିଙ୍କୁ ବନ୍ଧୁ ଭାବେ ସଙ୍ଖୋଳିଥିବା ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ ସୁରକ୍ଷା ପାଇଁ ଅଣ୍ଟା ଭିଡ଼ିଛନ୍ତି ଧର୍ମେନ୍ଦ୍ର ବାବୁ । ନିଜକୁ ମୁଖ୍ୟମନ୍ତ୍ରୀ ଦାବିଦାର କରୁଥିବା ଧର୍ମେନ୍ଦ୍ରଙ୍କର ଓଡ଼ିଶାର ସ୍ୱାଭିମାନ ମୂଲ୍ୟରେ ଏଭଳି ସଂକୀର୍ଣ୍ଣ ରାଜନୀତିକୁ ବିଭିନ୍ନ ସ୍ତରରେ ସମାଲୋଚନା କରାଯାଇଛି ।
ବୈଜୟନ୍ତଙ୍କ ହୀନ ଚରିତ୍ରର ବନ୍ଧୁ କୁହାଯାଉଥିବା ଅଭିଜିତ୍ ଆୟାରଙ୍କ ଓଡ଼ିଶା ଓ ଏହାର ଐତିହ୍ୟ ଓ ସଂସ୍କୃତି ଉପରେ ରୁଚିହୀନ ଟିପ୍ପଣୀ ସମଗ୍ର ରାଜ୍ୟବାସୀଙ୍କୁ ଆଘାତ ଦେଇଛି । ଓଡ଼ିଆ ଲୋକଙ୍କ ପ୍ରତିକ୍ରିୟା ପରେ ସେ ନିଜକୁ ସେଥିରୁ ନିବୃତ୍ତ କରିବା ପରିବର୍ତ୍ତେ ଅଧିକରୁ ଅଧିକ ତାତ୍ସଲ୍ୟ କରିଚାଲିଛନ୍ତି । ବିଧାନସଭାରେ ଏ ସମ୍ପର୍କରେ ଆଲୋଚନାକୁ ସେ କଟାକ୍ଷ କରିଥିବା ବେଳେ ଗଣମାଧ୍ୟମ ଚର୍ଚ୍ଚାକୁ ବିଦ୍ରୁପ କରିଛନ୍ତି । ଓଡ଼ିଶାର ସାମ୍ବାଦିକଙ୍କୁ ସେ ପରଚେଜଡ୍ ପ୍ରେଷ୍ଟିଚୁଟସ୍ ଆଣ୍ଡ ପେଡ୍ ଆଉଟ୍ରେଜରସ୍ କହିବାକୁ ପଛାଇନାହାନ୍ତି ।
ମାତ୍ର ଓଡ଼ିଆ ପୁଅ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କୁ ଏହା ବାଧିନାହିଁ । ବାଧିଥିଲେ କିମ୍ବା ଓଡ଼ିଶାବାସୀଙ୍କ ପ୍ରତି ସମ୍ବେଦନଶୀଳ ଥିଲେ ସେ ତାହାକୁ ବିରୋଧ କରିଥାଆନ୍ତେ । ନିନ୍ଦା କରିଥାଆନ୍ତେ । ମାତ୍ର ଦୁର୍ଭାଗ୍ୟର କଥା, ଆଜି ପୁରୀରେ ଏକ ସାମ୍ବାଦିକ ସମ୍ମିଳନୀରେ ସେ ଏ ପ୍ରସଙ୍ଗକୁ ଆଦୌ ଯାଇ ନ ଥିଲେ । ବରଂ ଚିଲିକାରେ ବୈଜୟନ୍ତ ପଣ୍ଡାଙ୍କ ହେଲିକପ୍ଟର ଉଡ଼ାଣ ଉପରେ ପୁଲିସର କାର୍ଯ୍ୟାନୁଷ୍ଠାନକୁ ନାଲି ଆଖି ଦେଖାଇଥିଲେ । ପୁରୀ ଏସପିଙ୍କ ପ୍ରତି ସେ ଔଦ୍ଧତ୍ୟ ଶବ୍ଦ ବ୍ୟବହାର କରିଥିଲେ । ଓଡ଼ିଶାରେ ଅଘୋଷିତ ଏର୍ମଜେନ୍ସୀ ଲାଗୁ ହୋଇଥିବା କହି ବୈଜୟନ୍ତଙ୍କୁ ଭରପୁର ସମର୍ଥନ ଦେଇଥିଲେ ଧର୍ମେନ୍ଦ୍ର ।
ସୂଚନାଯୋଗ୍ୟ, ଅଫିସରମାନଙ୍କୁ ନାଲିଆଖି ଦେଖାଇବାରେ ଧର୍ମେନ୍ଦ୍ରଙ୍କର ରେକର୍ଡ ଅଛି । ବିଜେପୁର ଉପନିର୍ବାଚନ ବେଳେ ସେ ଜିଲ୍ଲାପାଳ, ଏସପିଙ୍କ ସମେତ ତଳିଆ ଅଫିସରଙ୍କୁ ବି ନାଲି ଆଖି ଦେଖାଇଥିଲେ । ଜଣେ ଦାୟିତ୍ୱବାନ କେନ୍ଦ୍ରମନ୍ତ୍ରୀଙ୍କ ଆଚରଣ ତାଙ୍କଠାରେ ଅଭାବ ଥିବା ଆଲୋଚନା ହୁଏ ।
