ଭୁବନେଶ୍ୱର: ତିତଲି କ୍ଷୟକ୍ଷତିର ମୁକାବିଲା ପାଇଁ କେନ୍ଦ୍ର ସରକାରଙ୍କଠାରୁ ୧ ହଜାର କୋଟି ଟଙ୍କା ଅନ୍ତରୀଣ ସହାୟତା ମାଗିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ମୁଖ୍ୟମନ୍ତ୍ରୀ ଏହି ସହାୟତା ମାଗିଛନ୍ତି । ରାଜ୍ୟ ସରକାର ତାଙ୍କ ପ୍ରାଥମିକ ସ୍ମାରକପତ୍ରରେ ୨୨୭୦.୨୮ କୋଟି ଟଙ୍କାର ଆବଶ୍ୟକ ଖର୍ଚ୍ଚ ଅଟକଳ କେନ୍ଦ୍ର ସରକାରଙ୍କୁ ଜଣାଇ ଦେଇଛନ୍ତି । ଏହି ଖର୍ଚ୍ଚ ଭରଣା ପାଇଁ ଏନଡିଆରଏଫରୁ ୨୦୧୪.୦୯ କୋଟି ଟଙ୍କା କେନ୍ଦ୍ରୀୟ ସହାୟତା ମଗାଯାଇଥିବା ମୁଖ୍ୟମନ୍ତ୍ରୀ ତାଙ୍କ ପତ୍ରରେ ଉଲ୍ଲେଖ କରିଛନ୍ତି । ଏଥିସହ ତିତଲିରେ କ୍ଷତି ହୋଇଥିବା ୫୭,୧୩୧ ବାସଗୃହ ପ୍ରଧାନମନ୍ତ୍ରୀ ଆବାସ ଯୋଜନାରେ ଆବଣ୍ଟନ ପାଇଁ ବିଚାର କରିବାକୁ ପ୍ରଧାନମନ୍ତ୍ରୀଙ୍କୁ ମୁଖ୍ୟମନ୍ତ୍ରୀ ଅନୁରୋଧ କରିଛନ୍ତି ।
ମୁଖ୍ୟମନ୍ତ୍ରୀ ଜଣାଇଛନ୍ତି, ତିତଲି ବାତ୍ୟା ଓ ବନ୍ୟାରେ ୧୭ ଟି ଜିଲ୍ଲା ପ୍ରଭାବିତ ହୋଇଛି । ଗଜପତି ଜିଲ୍ଲା ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି । ବାତ୍ୟା ଓ ବନ୍ୟା ଛଡ଼ା ଗଜପତି ଜିଲ୍ଲାର ମହେନ୍ଦ୍ରଗିରି ପାହାଡ଼ରେ ଭୂସ୍ଫଳନ ଯୋଗୁଁ ବାରଘର ଗାଁ ବିଧ୍ୱସ୍ତ ହୋଇଯାଇଛି । ବିଭିନ୍ନ ଜିଲ୍ଲାରେ ୫୭ ଜଣ ବ୍ୟକ୍ତିଙ୍କ ମୃତ୍ୟୁ ହୋଇଥିବା ବେଳେ ଭୂସ୍ଫଳନ, କାନ୍ଥ ଭୁଷୁଡ଼ି ଏବଂ ପାଣିରେ ବୁଡ଼ିଯିବା ଯୋଗୁଁ ୧୦ ଜଣ ନିଖୋଜ ଅଛନ୍ତି । ଏଥିରେ ସମୁଦାୟ ୬୦.୧୧ ଲକ୍ଷ ଲୋକ କ୍ଷତିଗ୍ରସ୍ତ ହୋଇଛନ୍ତି । ୫୭,୧୩୧ ବାସଗୃହ ଭାଙ୍ଗି ଯାଇଥିବା ବେଳେ ୨.୭୩ ଲକ୍ଷ ହେକ୍ଟର ଚାଷଜମି ନଷ୍ଟ ହୋଇଛି । ରାସ୍ତାଘାଟର ବ୍ୟାପକ କ୍ଷୟକ୍ଷତି ହୋଇଛି । ଯାହାର ମରାମତି ଜରୁରି ହୋଇପଡ଼ିଛି ।
ମୁଖ୍ୟମନ୍ତ୍ରୀ ତାଙ୍କ ଚିଠିରେ ଲେଖିଛନ୍ତି ଯେ ତିତଲି ଆଗମନ ସମ୍ପର୍କରେ ପାଣିପାଗ ବିଭାଗର ପୂର୍ବାନୁମାନ ପାଇଲା ମାତ୍ରେ ରାଜ୍ୟ ସରକାର ସମସ୍ତ ସତର୍କତା ବ୍ୟବସ୍ଥା ଗ୍ରହଣ କରିଥିଲେ । ୧୦ ତାରିଖ ରାତି ୯.୪୫ ମିନିଟ୍ ରେ ଏହା ସିଭିୟର ସାଇକ୍ଲୋନିକ୍ ଷ୍ଟର୍ମର ରୂପ ନେଉଥିବାର ସୂଚନା ପାଇଲା କ୍ଷଣି ରାଜ୍ୟ ସରକାର ତଳିଆ ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର ଉପରେ ଧ୍ୟାନ ଦେଇଥିଲେ । ମାତ୍ର କେଇ ଘଣ୍ଟା ଭିତରେ ୩ ଲକ୍ଷ ଲୋକଙ୍କୁ ନିରାପଦ ଜାଗାକୁ ସ୍ଥାନାନ୍ତର କରାଯାଇଥିଲା । ପ୍ରଭାବିତ ଅଞ୍ଚଳରେ ଏନଡିଆରଏଫର ୧୪ ଟି ଟିମ୍, ଓଡ୍ରାଫ୍ ର ୨୬ ଟିମ୍ ଏବଂ ସମସ୍ତ ଅଗ୍ନିସେବା ଟିମ୍ କୁ କାର୍ଯ୍ୟରେ ଲଗାଯାଇଥିଲା ।
