ବସ୍ ରେ ବିଧାନସଭା ଆସିଲେ ମୁଖ୍ୟମନ୍ତ୍ରୀ

‘ମୋ ବସ୍’ ସେବା ଆରମ୍ଭ

ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ବସ୍ ରେ ବସି ଏୟାରପୋର୍ଟ ନିକଟରୁ ବିଧାନସଭା ଆସିଥିଲେ । ‘ମୋ ବସ୍’ ସେବା କାର୍ଯ୍ୟକ୍ରମର ଶୁଭାରମ୍ଭ କରି ମୁଖ୍ୟମନ୍ତ୍ରୀ ସାଧାରଣ ଯାତ୍ରୀଙ୍କ ଭଳି ବସ୍ ରେ ଚଢ଼ିଥିଲେ । ଯାତ୍ରୀଙ୍କ ମେଳରେ ବସି ବିଧାନସଭା ଆସିଥିଲେ । ଏୟାରପୋର୍ଟ ରୁ ବିଧାନସଭା ଆସିବା ପାଇଁ ବସ୍ ଟିକେଟ ବାବଦକୁ ମୁଖ୍ୟମନ୍ତ୍ରୀ ସଂପୃକ୍ତ କଣ୍ଡକ୍ଟର(ଗାଇଡ୍) ଙ୍କୁ ୧୦ ଟଙ୍କା ବଢ଼ାଇଥିଲେ । କଣ୍ଡକ୍ଟର ୮ ଟଙ୍କା ରଖି ୨ ଟଙ୍କା ଫେରସ୍ତ କରିଥିଲେ । ବସ୍ ରେ ବସିବା ପରେ ମୁଖ୍ୟମନ୍ତ୍ରୀ ସହଯାତ୍ରୀଙ୍କ ସହ କଥା ହୋଇଥିଲେ । ସେଲଫି ଦେଇଥିଲେ । ମୁଖ୍ୟମନ୍ତ୍ରୀଙ୍କ ଏହି ଯାତ୍ରା ସମୟରେ କୌଣସି ସୁରକ୍ଷା କର୍ମୀଙ୍କୁ ବସ୍ ରେ ଦେଖିବାକୁ ମିଳି ନ ଥିଲା ।

ଭୁବନେଶ୍ୱର, କଟକ ଓ ପୁରୀର ଜନସାଧାରଣଙ୍କ ପାଇଁ ଆରମ୍ଭ ହୋଇଛି ‘ମୋ ବସ୍’ ସେବା । କ୍ୟାପିଟାଲ ରିଜିଅନ ଅର୍ବାନ ଟ୍ରାନସପୋର୍ଟ ସଂସ୍ଥାର ଏହି ସେବାକୁ ଭୁବନେଶ୍ୱର ବିଜୁ ପଟ୍ଟନାୟକ ବିମାନ ବନ୍ଦର ନିକଟରେ ମୁଖ୍ୟମନ୍ତ୍ରୀ ଉଦଘାଟନ କରିଥିଲେ । ଏହି କାର୍ଯ୍ୟକ୍ରମରେ କଟକ, ଭୁବନେଶ୍ୱର ଓ ପୁରୀରେ ୩୦୦ଟି ବସ୍ ଚାଲିବ । ଆଜି ୧୦୦ରୁ ଅଧିକ ବସ୍ ସେବା ଆରମ୍ଭ ହୋଇଛି । ‘ମୋ ବସ୍’ ରେ ଯୁବବର୍ଗଙ୍କୁ ଆକୃଷ୍ଟ କରିବା ପାଇଁ ୱାଇଫାଇ ବ୍ୟବସ୍ଥା ରଖାଯାଇଛି । ମହିଳା ଯାତ୍ରୀଙ୍କ ସୁରକ୍ଷା ପାଇଁ ସିସିଟିଭି କ୍ୟାମେରା ରହିଛି । ଯାତ୍ରୀଙ୍କ ସୁବିଧା ପାଇଁ ଅନଲାଇନ୍ ଟିକେଟ ବ୍ୟବସ୍ଥା ଓ ବିଭିନ୍ନ ଜରୁରୀ ସୂଚନା ପାଇଁ ମୋବାଇଲ୍ ଆପ୍ ର ବ୍ୟବସ୍ଥା କରାଯାଇଛି ।

ଏହି ବସ୍ ଗୁଡ଼ିକରେ କଣ୍ଡକ୍ଟରମାନଙ୍କୁ ବସ୍ ଗାଇଡ ବୋଲି କୁହାଯିବ ଏବଂ ବସ୍ ଗାଇଡ ଭାବେ ୫୦ ପ୍ରତିଶତ ମହିଳାଙ୍କୁ ନିଯୁକ୍ତି ଦିଆଯିବ । ଛାତ୍ରଛାତ୍ରୀ ଓ ବରିଷ୍ଠ ନାଗରିକମାନଙ୍କ ପାଇଁ ସ୍ୱତନ୍ତ୍ର ସିବିଧା ଦିଆଯିବ ବୋଲି ମୁଖ୍ୟମନ୍ତ୍ରୀ ଗଣମାଧ୍ୟମକୁ ସୂଚନା ଦେଇଛନ୍ତି ।