ଭୁବନେଶ୍ୱର(ମିଡ-ଡେ ଓଡ଼ିଶା): ମନ୍ତ୍ରୀଙ୍କୁ ଅଣ୍ଡାମାଡ ତତ୍ତ୍ୱର ପ୍ରବକ୍ତା ଲୁଲୁ ମହାପାତ୍ର ତାଙ୍କ ଷ୍ଟ୍ରାଟେଜିରେ ପରିବର୍ତ୍ତନ ଆଣିଛନ୍ତି । ଅଣ୍ଡାମାଡ଼ ବଦଳରେ ମନ୍ତ୍ରୀମାନଙ୍କୁ ଅଶ୍ଲୀଳ ଆଚରଣ ଦେଖାଇବାକୁ ସେ ଦଳର ଯୁବ ଓ ଛାତ୍ର କର୍ମୀଙ୍କୁ ଆହ୍ୱାନ ଦେଇଛନ୍ତି । ଏହି ଆଚରଣ କିଭଳି ହେବ ତାହା ବି ସ୍ଥିର କରିଛନ୍ତି ଲୁଲୁ । ମନ୍ତ୍ରୀମାନେ କୁଆଡେ ଯାଉଛନ୍ତି, ତାଙ୍କ ପିଲାମାନେ ଫଲୋ କରିବେ । ଆଉ ଆଗମନ ରୁଟ୍ରେ ଲୁଙ୍ଗି କିମ୍ବା ସର୍ଟସ୍ ପିନ୍ଧି ଚୁପ୍ଚାପ ଛିଡ଼ା ହୋଇ ରହିବେ । ମନ୍ତ୍ରୀଙ୍କ ଗାଡ଼ି ଆସିଲା କ୍ଷଣି ନିଜ ଲୁଙ୍ଗି କିମ୍ବା ସର୍ଟସ୍କୁ ଫଟାଫଟ୍ ତଳକୁ ଖସାଇଦେବେ । କିଛି ସମୟର ଅଙ୍ଗ ପ୍ରଦର୍ଶନ ପରେ ପୁଣି ତାକୁ ଉପରକୁ ଟେକିଦେବେ । ଗତକାଲି ରାତିରେ ଶୋଇବା ବେଳେ ତାଙ୍କ ମୁଣ୍ଡକୁ ଏହି ବୁଦ୍ଧି ପଶିଥିବା ଲୁଲୁ ନିଜେ କହିଛନ୍ତି । ତାଙ୍କର ଯୁକ୍ତି, ମୁଖ୍ୟମନ୍ତ୍ରୀ କିମ୍ବା ମନ୍ତ୍ରୀମାନଙ୍କୁ ଅଣ୍ଡା କି କଳାପତାକା ଦେଖାଇଲେ ପୁଲିସ ୩୦୭ ଦଫା ଲଗାଇ ଗିରଫ କରୁଛି । ହେଲେ ତାହା ନ କରି ଯଦି ୨୯୪ ଦଫାକୁ ଆପଣାଯିବ ତେବେ ?
ଭାରତୀୟ ପିଙ୍ଗଳ କୋଡ୍ ର ୨୯୪ ଦଫା(ଅଶ୍ଲୀଳ ଆଚରଣ, ଇଙ୍ଗିତ) ଟି ମାରାତ୍ମକ କିନ୍ତୁ ବେଲେବୁଲ୍ । ଅର୍ଥାତ୍ ଦୋଷୀକୁ ପୁଲିସ ଧରିଲେ ବି ସାଙ୍ଗେ ସାଙ୍ଗେ ଜାମିନ୍ ମିଳିଯିବ । ଏହାଦ୍ୱାରା ଆଇନ ଫାସରେ ତାଙ୍କ ପିଲାମାନେ ହଇରାଣ ହରକତ ହେବେ ନାହିଁ ବୋଲି ଲୁଲୁ ଭାବିଛନ୍ତି । ତାଙ୍କ ଭାବନାକୁ ତୁରନ୍ତ କାମରେ ଲଗାଇବାକୁ ସାରା ରାଜ୍ୟର କୋଣ ଅନୁକୋଣରେ ଥିବା ଅନୁଗତଙ୍କୁ ସେ ଆହ୍ୱାନ ଦେଇଛନ୍ତି ।
ଗତକାଲି କଟକରେ ମନ୍ତ୍ରୀ ଅରୁଣ ସାହୁଙ୍କ ଉପରେ ଅଣ୍ଡାମାଡ଼ କରି ତାଙ୍କ ପିଲା ନିରଞ୍ଜନ ଦାସ ଯେଭଳି ନିର୍ଘାତ୍ ଛେଚା ଖାଇଲେ ତାହାକୁ ହଜମ କରିନାହାନ୍ତି ଲୁଲୁ । ବିଜେଡ଼ି ବାଲାଙ୍କୁ ତାହାର କିଭଳି ଜବାବ ଦିଆଯିବ ତାହାର ବ୍ଲୁ ପ୍ରିଣ୍ଟ୍ ତିଆରି କରୁଛନ୍ତି ସେ । ଦଳର ମୂଳ ସଂଗଠନ ତାଙ୍କ ସପକ୍ଷରେ ନ ଥିବାରୁ ସାରା ରାଜ୍ୟର ଛାତ୍ର ଓ ଯୁବ କଂଗ୍ରେସ କର୍ମୀଙ୍କୁ ସଂଗଠିତ କରୁଛନ୍ତି । ପୂରା ହିସାତ୍ମକ ଢ଼ଙ୍ଗରେ ବିଜେଡ଼ିର ମୁକାବିଲା କରିବାକୁ ବଳ ଯୋଗାଡ଼ କରୁଛନ୍ତି । ତେବେ ତାହା ପୂର୍ବରୁ ପିଲାଙ୍କୁ ଲଙ୍ଗଳା ନଚାଇ ବିଜେଡ଼ି ସରକାରଙ୍କୁ ରାସ୍ତାରେ ଚଲାଇ ନ ଦେବାର ଯୋଜନା କରିଛନ୍ତି ଲୁଲୁ । ତେଣିକି ଦଳର କିଏ ତାହାକୁ ଗ୍ରହଣ କରୁ ନ କରୁ ତାହାକୁ ପରବାଏ କରିନାହାନ୍ତି । ଦଳ କିଏ ? ସେ କ’ଣ ଦଳର ନୁହଁନ୍ତି ବୋଲି ଲୁଲୁ ଓଲଟି ପ୍ରଶ୍ନ ପଚାରିଛନ୍ତି । ଲୁଲୁଙ୍କର ଏଭଳି କଠୋର ଆଭିମୁଖ୍ୟ କଂଗ୍ରେସ ନେତାଙ୍କ ହୋସ୍ ଉଡାଇ ଦେଇଥିଲା ବେଳେ ବିଜେଡ଼ିର ଟେନସନ୍ ବଢ଼ାଇ ଦେଇଛି ।
