ଭୁବନେଶ୍ୱର: ଆଜିଠାରୁ ଆରମ୍ଭ ହୋଇଛି ସପ୍ତାହବ୍ୟାପୀ ‘ଆର୍ଟ ଅଫ ଗିଭିଂ’ ଷଷ୍ଠ ବାର୍ଷିକୀ ଅଭିଯାନ । କିଟ୍ ଓ କିସ୍ କ୍ୟାମ୍ପସ୍ ରେ ଏହାର ଶୁଭାରମ୍ଭ କରିଛନ୍ତି ଅଭିଯାନର ପ୍ରତିଷ୍ଠାତା ଡ. ଅଚ୍ୟୁତ ସାମନ୍ତ । ‘ଆର୍ଟ ଅଫ ଗିଭିଂ’ ର ଶ୍ରେଷ୍ଠ ଉଦାହରଣ କିସ୍ ଓ କିଟ୍ ବୋଲି ଆୟୋଜିତ ସମାରୋହରେ ଉଦବୋଧନ ଦେଇ ଡ. ସାମନ୍ତ କହିଛନ୍ତି । ଏହି ଦୁଇ ସଂସ୍ଥା ଉକ୍ତ ଆଦର୍ଶକୁ ଦୀର୍ଘ ୨୭ ବର୍ଷ ଧରି ପାଳନ କରି ଆସୁଛନ୍ତି । କିଟ୍ ଦେଉଛି ଏବଂ କିସ୍ ତାହାକୁ ଗ୍ରହଣ କରି ହଜାର ହଜାର ଆଦିବାସୀ ପିଲାଙ୍କ ମଧ୍ୟରେ ଖୁସି ବାଣ୍ଟୁଛି । ସମସ୍ତେ କିଛି ଦେବାକୁ ଚାହାନ୍ତି, ମାତ୍ର ସେମାନେ ଉପଯୁକ୍ତ ପ୍ଲାଟଫର୍ମ ଏବଂ ସୁଯୋଗ ପାଇନଥାନ୍ତି । ‘ଆର୍ଟ ଅଫ ଗିଭିଂ’ ଏହି ପ୍ଲାଟଫର୍ମ ଯୋଗାଇ ଦେଉଥିବା ଡ. ସାମନ୍ତ କହିଛନ୍ତି ।
ଖାଲି ଓଡ଼ିଶା କି ଭାରତ ନୁହେଁ, ଦକ୍ଷିଣ ଆଫି୍ରକା, ବାଙ୍ଗାଲାଦେଶ, ତୁର୍କୀ, ତାଇୱାନ୍ ସମେତ ସମଗ୍ର ବିଶ୍ୱର ୧୨୦ଟି ଦେଶର ଏକ ଲକ୍ଷରୁ ଉଦ୍ଧ୍ୱର୍ କେନ୍ଦ୍ରରେ ପାଳନ ହେଉଛି ‘ଆର୍ଟ ଅଫ ଗିଭିଂ’ କାର୍ଯ୍ୟକ୍ରମ । ଓଡ଼ିଶାର ୪୦ ଲକ୍ଷ ଲୋକଙ୍କ ସମେତ ବିଶ୍ୱର ୧ କୋଟି ଲୋକ ଏହି ଅଭିଯାନରେ ସାମିଲ ହୋଇଛନ୍ତି । ଚଳିତବର୍ଷର ବିଷୟବସ୍ତୁ ରହିଛି “ବ୍ୟାଗ୍ ଅଫ ହାପିନେସ୍” । ସମସ୍ତଙ୍କ ପାଇଁ ଶିକ୍ଷା ହିଁ ଏହାର ମୂଳ ଉଦ୍ଦେଶ୍ୟ। ଚଳିତବର୍ଷ ପ୍ରଥମ ଥର ପାଇଁ ୟୁନେସ୍କୋ ଏବଂ ଏମଜିଆଇଇପି ‘ଆର୍ଟ ଅଫ ଗିଭିଂ’ ଅଭିଯାନରେ ହାତ ମିଳାଇଛନ୍ତି ।
