ଖୋଲିଲା ଅପରାଜିତାଙ୍କ ପୋଲ୍

ଭୁବନେଶ୍ୱର: ଆବାସ ଦୁର୍ନୀତି ନେଇ ଆଜି ସଂସଦରେ କମ୍ପିଲେ ଅପରାଜିତା ଷଡ଼ଙ୍ଗୀ । କାର୍ଯ୍ୟାନୁଷ୍ଠାନରେ ରାଜ୍ୟ ସରକାର ଟାଳଟୁଳ ନୀତି ଧରୁଥିବାରୁ ବାଧ୍ୟ ହୋଇ ପ୍ରସଙ୍ଗଟି ସଂସଦକୁ ଆଣିଲେ ବୋଲି ମିଡ଼ିଆକୁ କହିଛନ୍ତି । ତେବେ ଏହା ପଛର ମଜାଦାର କାହାଣୀ ସାମନାକୁ ଆସିଛି । ବେଗୁନିଆ ନିର୍ବାଚନମଣ୍ଡଳୀରେ ଆବାସ କେଳେଙ୍କାରୀର ମୁଖ୍ୟ ଖଳନାୟକ ଆଉ କେହି ନୁହଁନ୍ତି, ଖୋଦ୍ ସାଂସଦଙ୍କର ଖାସ୍ ସହଯୋଗୀ । ସେ ଗିରଫ ହୋଇସାରିଥିବାରୁ ଅପରାଜିତା ନିଜ ଦେହରୁ ତାଙ୍କ କଳଙ୍କ ଝାଡ଼ିବା ପାଇଁ ଏଭଳି ଅଭିନୟ କରିଥିବା କୁହାଯାଉଛି ।

ମିଳିଥିବା ସୂଚନା ଅନୁଯାୟୀ, ଖୋର୍ଦ୍ଧା ଜିଲ୍ଲା ବେଗୁନିଆ ନିର୍ବାଚନମଣ୍ଡଳୀର ଗଡ଼ମାଣତୀର ପଞ୍ଚାୟତରେ ଆବାସ ଦୁର୍ନୀତି ହୋଇଥିବା ନେଇ କିଛି ଦିନ ତଳେ ଅଭିଯୋଗ ବାଢ଼ିଥିଲେ ସାଂସଦ ଅପରାଜିତା ଷଡ଼ଙ୍ଗୀ । ଆଜିକାଲି ସାଂସଦଙ୍କର ଖାସ୍ ଲୋକ ପାଲଟିଥିବା ସେହି ଗାଁର ରାମଚଣ୍ଡୀ ମହାବିଦ୍ୟାଳୟରେ କାର୍ଯ୍ୟରତ ଚତୁର୍ଥ ଶ୍ରେଣୀ କର୍ମଚାରୀ ଶିଶିର ମଙ୍ଗରାଜଙ୍କ ଇସାରାରେ ସାଂସଦ ଏହି ଅଭିଯୋଗ ଆଣିଥିଲେ । ଶିଶିର ନିଜେ ଏହି ଜାଲରେ ପଡ଼ିଯିବେ ବୋଲି ବୋଧହୁଏ ସେତେବେଳେ ଭାବି ନ ଥିଲେ ।

ସାଂସଦ ଏ ସମ୍ପର୍କରେ ଜିଲ୍ଲାପାଳଙ୍କଠାରୁ ମନ୍ତ୍ରୀ ପର୍ଯ୍ୟନ୍ତ ଜଣାଇବା ପରେ ରାଜ୍ୟ ସରକାରଙ୍କ ପକ୍ଷରୁ ୪ ଜଣ ବରିଷ୍ଠ ଅଧିକାରୀ ଗଡ଼ମାଣତୀର ଯାଇ ଅଭିଯୋଗର ତଦନ୍ତ କରିଥିଲେ । ତଦନ୍ତ ବେଳେ ଆବାସ କେଳେଙ୍କାରୀର ମୁଖ୍ୟ ମାଷ୍ଟରମାଇଣ୍ଡ ଶିଶିର ମଙ୍ଗରାଜ ବୋଲି ଧରାପଡ଼ିଲା । ଶିଶିରଙ୍କ ସମେତ ୩ ଜଣଙ୍କ ନାଁରେ ଥାନାରେ ଏତଲା ଦିଆଗଲା । ଏହି ଏତଲା ଆଧାରରେ ପୁଲିସ ଶିଶିରଙ୍କୁ ଗିରଫ କରି ଜେଲ୍ ପଠାଇଲା । ଗତକାଲି ଖୋର୍ଦ୍ଧା କୋର୍ଟ ତାଙ୍କ ଜାମିନ୍ ଆବେଦନକୁ ଖାରଜ କରିଦେଇଛନ୍ତି ।

ଗିରଫ ମୁଖ୍ୟ ଖଳନାୟକ ଶିଶିର ମଙ୍ଗରାଜ ଗାଁ କଲେଜର ଚତୁର୍ଥ ଶ୍ରେଣୀ କର୍ମଚାରୀ ହୋଇଥିଲେ ବି କରିତକର୍ମା ଲୋକଟିଏ । ଆଗରୁ ବିଜେଡ଼ିରେ କେବଳ ସକ୍ରିୟ ନ ଥିଲେ । ତତ୍କାଳୀନ ବିଧାୟକ ପ୍ରଶାନ୍ତ ନନ୍ଦଙ୍କର ଖାସ୍ ଲୋକ ଥିଲେ । ଗତ ନିର୍ବାଚନରେ ପ୍ରଶାନ୍ତ ନନ୍ଦଙ୍କ ପୁଅ ଋଷଭି ବିଜେଡ଼ି ଟିକେଟ ନ ପାଇ ବିଜେପିକୁ ପଳାଇ ପ୍ରାର୍ଥୀ ହୋଇଥିଲେ । ଶିଶିର ମଧ୍ୟ ବିଜେପି ଦଳରେ ନିଜକୁ ସାମିଲ କରି ଋଷଭିଙ୍କ ପାଖେ ପାଖେ ରହିଲେ । ଅପରାଜିତା ବିଜେପିର ସାଂସଦ ପ୍ରାର୍ଥୀ ହୋଇଥିବାରୁ ତାଙ୍କ ସହ ସମ୍ପର୍କ ନିବିଡ଼ କଲେ । ଅପରାଜିତା ସାଂସଦ ହେବା ପରେ ତାଙ୍କ ପାଖ ଛାଡ଼ିଲେନି ଶିଶିର । ଅଞ୍ଚଳରେ ସାଂସଦଙ୍କର ବିଭିନ୍ନ କାର୍ଯ୍ୟକ୍ରମରେ ସେ ଥିଲେ ମୁଖ୍ୟ ପୁରୋଧା ।( ସବା ଉପର ଫଟୋରେ ସାଂସଦଙ୍କ ବାମପାଶ୍ୱର୍ରେ ନୀଳ ସାର୍ଟ ପିନ୍ଧିଥିବା ବ୍ୟକ୍ତି) ।

ଶିଶିର ଜଣେ ବଦନାମୀ ବ୍ୟକ୍ତି ହୋଇଥିଲେ ବି ସାଂସଦ ତାଙ୍କୁ ପାଖେ ପାଖେ ରଖିବା କଥାକୁ ଅଞ୍ଚଳବାସୀ ଗ୍ରହଣ କରୁ ନ ଥିଲେ । ଗଡ଼ମାଣତୀର ଗ୍ରାମବାସୀମାନଙ୍କ ଅଭିଯୋଗ ଅନୁଯାୟୀ, ଶିଶିର ମଙ୍ଗରାଜଙ୍କର ଅପରାଧ ଇତିହାସ ବେଶ୍ ଲମ୍ବା । ଅତୀତରେ ଜଣେ ମହିଳାଙ୍କୁ ଦୁଷ୍କର୍ମ କରି ସେ ଜେଲ୍ ଯାଇଥିଲେ । ୨୦୦୩ ମସିହାରେ ପୁରୀ ଗ୍ରାମ୍ୟ ବ୍ୟାଙ୍କ ମ୍ୟାନେଜର ଲକ୍ଷ୍ମୀଧର ବେହେରାଙ୍କୁ ହାତ କରି ବ୍ୟାଙ୍କ ଦୁର୍ନୀତିରେ ଜେଲ୍ ଯାଇଥିଲେ । ପଡୋଶୀ କପିଳେଶ୍ୱର ଗ୍ରାମର ଜନୈକ ବ୍ୟକ୍ତିଙ୍କ ନାଁରେ ନିଜ ଜମିର ଜାଲିଆତି ପଟ୍ଟା କରି ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ହାତେଇଛନ୍ତି । ଗ୍ରାମ ପଞ୍ଚାୟତର ଭିଏଲଡବ୍ଲୁଙ୍କୁ ଧମକ ଦେଇ ଜୋର ଜବରଦସ୍ତ ପ୍ରଧାନମନ୍ତ୍ରୀ ଆବାସ ଯୋଜନାର କାର୍ଯ୍ୟାଦେଶ ନିଜେ ଲେଖାଇ ହିତାଧିକାରୀମାନଙ୍କୁ ପ୍ରଦାନ କରି ଟଙ୍କା ଆଦାୟ କରି ଆସୁଥିବା ଭଳି ଗୁରୁତର ଅଭିଯୋଗ ଆଣିଛନ୍ତି ଗ୍ରାମବାସୀ ।

ଆବାସ କେଳେଙ୍କାରୀର ମୁଖ୍ୟ ଅଭିଯୁକ୍ତ ଭାବେ ଶିଶିର ମଙ୍ଗରାଜ ଗିରଫ ହୋଇଥିବାରୁ ତାଙ୍କର ରାଜନୈତିକ ବସ୍ ସାଂସଦ ଅପରାଜିତାଙ୍କ ମୁହଁ କଳା ପଡ଼ିଯାଇଥିବା କିଛି ଗ୍ରାମବାସୀ କହିଛନ୍ତି । ନିଜ ଜାଲରେ ନିଜେ ପଡ଼ିଯିବେ ବୋଲି ସାଂସଦ ଭାବି ନ ଥିଲେ । ଶିଶିର କଳଙ୍କରୁ ନିଜକୁ ମୁକୁଳେଇ ସ୍ୱଚ୍ଛତାର ବାହାବା ନେବାକୁ ଆଜି ଲୋକସଭାରେ ଏହି ପ୍ରସଙ୍ଗ ଉଠାଇଥିବା ଚର୍ଚ୍ଚା ହେଉଛି ।