ଭୁବନେଶ୍ୱର: ରାଜ୍ୟର ୧ ନମ୍ବର ଖବରକାଗଜ ‘ସମ୍ବାଦ’ରେ ଚାକିରି କରୁଥିବା କର୍ମଚାରୀଙ୍କ ନାଁରେ ଜାଲିଆତି କରି ବ୍ୟାଙ୍କରୁ ଋଣ ଉଠାଯାଏ । ଏହି ଋଣ ଟଙ୍କା ଯାଏ ମାଲିକଙ୍କ ପାଖକୁ । ଋଣ ଆବେଦନ ଫର୍ମରେ ଦସ୍ତଖତ କରିବାକୁ ଅମଙ୍ଗ ହେଲେ ଚାକିରିରୁ ତଡ଼ା ଖାଇବାକୁ ପଡ଼େ । ପ୍ରାୟ ୩୦୦ କର୍ମଚାରୀଙ୍କ ନାଁରେ ୫୦ କୋଟିରୁ ଅଧିକ ଟଙ୍କା ବ୍ୟାଙ୍କ ଋଣ ହୋଇଛି ।
ଏହି ସଙ୍ଗୀନ ଅଭିଯୋଗ ଆଜି ଇଓଡବ୍ଲୁକୁ ଆଣିଛନ୍ତି ‘ସମ୍ବାଦ’ର ଜଣେ ପୂର୍ବତନ କର୍ମଚାରୀ(ଜିଲ୍ଲା ପ୍ରତିନିଧି) । ତାଙ୍କ ତରଫରୁ ଓକିଲ ଦିବ୍ୟଜ୍ୟୋତି ଦାସ ଇଓଡବ୍ଲୁରେ ଲିଖିତ ଅଭିଯୋଗ ଦାଖଲ କରିଛନ୍ତି । ଏଥିରେ ଅଭିଯୋଗକାରୀ ସାମ୍ବାଦିକ ‘ସମ୍ବାଦ’ ବା ଇଷ୍ଟର୍ଣ୍ଣ ମିଡିଆ ପ୍ରାଇଭେଟ ଲିମିଟେଡ ମାଲିକ ସୌମ୍ୟରଂଜନ ପଟ୍ଟନାୟକଙ୍କ କଳା କାରନାମା ଖୋଲିଛନ୍ତି । ସୌମ୍ୟଙ୍କ ନିର୍ଦ୍ଦେଶରେ ମାନବ ସମ୍ବଳ ବିଭାଗ ଏବଂ ବିତ୍ତ ବିଭାଗ ଏହି ଫ୍ରଡ୍ କାରବାର ବର୍ଷ ବର୍ଷ ଧରି କରୁଥିଲେ । ବ୍ୟାଙ୍କ କର୍ତ୍ତୃପକ୍ଷଙ୍କ ସହ ସଲାସୁତୁରାରେ କର୍ମଚାରୀଙ୍କୁ ଶୋଷଣ କରୁଥିବା ସଂସ୍ଥା ଏବଂ ସଂପୃକ୍ତ ବ୍ୟାଙ୍କ ବିରୋଧରେ ବିହିତ କାର୍ଯ୍ୟାନୁଷ୍ଠାନ ପାଇଁ ସେ ଦାବି କରିଛନ୍ତି ।
ଅଭିଯୋଗକାରୀଜଣଙ୍କ ସମ୍ବାଦରେ ୧୨ ହଜାର ୬୦୦ ଟଙ୍କାରେ ଚାକିରି କରିଥିଲେ । ତେବେ ତାଙ୍କ ଦରମାକୁ ତିନିଗୁଣା ଦର୍ଶାଇ ପ୍ରସ୍ତୁତ ଏକ ଜାଲ୍ ଦରମା ସାର୍ଟିଫିକେଟ୍ ଜରିଆରେ ବ୍ୟାଙ୍କରୁ ଲକ୍ଷ ଲକ୍ଷ ଟଙ୍କା ଋଣ ଉଠାଯାଇଥିଲା । ଖାଲି ତାଙ୍କର ନୁହେଁ, ସମ୍ବାଦରେ ଚାକିରି କରୁଥିବା ପ୍ରାୟ ସମସ୍ତଙ୍କୁ ବ୍ୟାଙ୍କ ଋଣ ପାଇଁ ବାଧ୍ୟ କରାଯାଏ । ଯିଏ କାଗଜରେ ଦସ୍ତଖତ କରିବାକୁ ମନା କରନ୍ତି ତାଙ୍କୁ ମାନବ ସମ୍ବଳ ବିଭାଗର ମୁଖ୍ୟ ବୈଜୟନ୍ତୀ କର ଚାକିରି ଚାଲିଯିବାର ଧମକ ଦିଅନ୍ତି ବୋଲି ସେ ଅଭିଯୋଗ କରିଛନ୍ତି ।
ଏହି କାରବାର କିଭଳି ଚାଲେ ତାହା ଇଓଡବ୍ଲୁକୁ ବିସ୍ତୃତ ଭାବେ ଜଣାଇଛନ୍ତି ଅଭିଯୋଗକାରୀ । ଚାକିରିରେ ଯୋଗ ଦେଉଥିବା କର୍ମଚାରୀଙ୍କର ପ୍ରଥମେ ଫ୍କେ ସାଲାରି ସାର୍ଟିଫିକେଟ୍ ପ୍ରସ୍ତୁତ କରାଯାଏ । ପ୍ରକୃତ ଦରମାଠାରୁ ତିନିଗୁଣା ଦରମା ପାଉଥିବା ସେଥିରେ ଦର୍ଶା ଯାଉଥିଲା । ମାଲିକ ସୌମ୍ୟ ପଟ୍ଟନାୟକଙ୍କ ନିର୍ଦ୍ଦେଶରେ ଏହି କାରବାରର ମୁଖ୍ୟ ନିର୍ବାହୀ ହେଉଛନ୍ତି ମାନବ ସମ୍ବଳ ବିଭାଗ ମୁଖ୍ୟ ବୈଜୟନ୍ତୀ କର । କର୍ମଚାରୀଙ୍କ ନାଁରେ ପ୍ରସ୍ତୁତ ଏହି ଫେକ୍ ସାର୍ଟିଫିକେଟ୍ କୁ ମଧୁଚନ୍ଦ୍ରିକାରେ ଥିବା ବ୍ୟାଙ୍କରେ ଡିପୋଜିଟ୍ କରାଯାଉଥିଲା । ଆଉ ବ୍ୟାଙ୍କ ଅନାୟାସରେ ଋଣ ଦେଉଥିଲା ।
ମୁଣ୍ଡ ପିଛା ଏହି ଋଣ ପରିମାଣ ୫ ଲକ୍ଷ କିମ୍ବା ଅଧିକ ଥିଲା । ଏହି କାରବାରରେ ବ୍ୟାଙ୍କ ମ୍ୟାନେଜରଙ୍କୁ ଲାଞ୍ଚ ଦେଇ ପକେଟରେ ରଖାଯାଏ । କର୍ମଚାରୀଙ୍କ ନାଁରେ ଆସୁଥିବା ଏହି ଋଣକୁ ମାଲିକ ସୌମ୍ୟ ପଟ୍ଟନାୟକ ହଡ଼ପ କରୁଥିବା ଅଭିଯୋଗରେ କୁହାଯାଇଛି ।
ସମ୍ବାଦର ୮ଟି ଯାକ ସଂସ୍କରଣର କର୍ମଚାରୀ ଏହି କାରବାରୁ ଛାଡ଼ ପାଇନାହାନ୍ତି । ଭୁବନେଶ୍ୱରସ୍ଥିତ ଓଡିଶା ଗ୍ରାମ୍ୟ ବ୍ୟାଙ୍କ, ଷ୍ଟେଟ୍ ବ୍ୟାଙ୍କ ଅଫ ଇଣ୍ଡିଆ ଶାଖାଠାରୁ ଆରମ୍ଭ କରି କଟକ, ବ୍ରହ୍ମପୁର, ଜୟପୁର ବ୍ୟାଙ୍କରୁ ଆସୁଥିଲା ଋଣ ଟଙ୍କା । କର୍ମଚାରୀ ଥରେ ଜାଲରେ ପଡ଼ିଲେ ସେଥିରୁ ମୁକୁଳିବା କଷ୍ଟ ଥିଲା । କାରଣ ଅନ୍ୟତ୍ର ଚାକିରି ପାଇଲେ ବି ‘ସମ୍ବାଦ’ ଋଣ ନ ସୁଝିବାର ବ୍ୟାଙ୍କ ନୋଟିସ୍ ମିଳୁଥିଲା ।
ତେବେ ଏହି ସଙ୍ଗୀନ ଅଭିଯୋଗ ସଂକ୍ରାନ୍ତରେ ସେ ଅବଗତ ନାହାନ୍ତି ବୋଲି କହିଛନ୍ତି ସୌମ୍ୟ ପଟ୍ଟନାୟକ । ଅବଗତ ହେଲା ପରେ ପ୍ରତିକ୍ରିୟା ରଖିବେ ବୋଲି କହିଛନ୍ତି ।
ସୂଚନାଯୋଗ୍ୟ, ଆଜି ସକାଳେ ସୌମ୍ୟବାବୁଙ୍କ ସମୁଦି ତଥା ଜେଡ୍ ୱାନ୍ ବିଲଡର ସଂସ୍ଥା ମାଲିକ ତପନ ମହାନ୍ତି ଇଓଡବ୍ଲୁ ଅଫିସରେ ହାଜର ହୋଇଥିଲେ । ଦୀର୍ଘ ୩ ଘଣ୍ଟା କାଳ ତାଙ୍କୁ ଅଧିକାରୀମାନେ ଜେରା କରିଥିଲେ । ତାଙ୍କ ବିରୋଧରେ ମଧ୍ୟ ଗୁରୁତର ଠକେଇ ଅଭିଯୋଗ ଆସିଛି ।
