ଭୁବନେଶ୍ୱର: ଗୋଟେ ଅଗ୍ରଣୀ ଗଣମାଧ୍ୟମ ସଂସ୍ଥା(ଟିଭି ମିଡିଆ ହାଉସ୍)ରେ ଏକ ଅଭାବନୀୟ ଘଟଣା ଘଟିଛି । ଇଣ୍ଟର୍ଣ୍ଣସିପ୍ କରୁଥିବା ଜଣେ ଯୁବତୀ କାଷ୍ଟିଂ କାଉଚ୍ ର ଶିକାର ହୋଇଛନ୍ତି । ସଂସ୍ଥାର ଜଣେ ବରିଷ୍ଠ କର୍ମଚାରୀ ତାଙ୍କୁ ଚାକିରି ନିୟମିତ କରାଇବାର ପ୍ରଲୋଭନ ଦେଇ ପ୍ରେମ ଜାଲରେ ଫସାଇବାକୁ ଚେଷ୍ଟା କରିଥିଲେ । ମାତ୍ର ବିଫଳ ହେବାରୁ ମାନସିକ ନିର୍ଯ୍ୟାତନା ଦେଇ ଆସୁଥିଲେ । ଏଥିରେ ଅତିଷ୍ଠ ହୋଇ ଯୁବତୀଜଣଙ୍କ କର୍ତ୍ତୃପକ୍ଷଙ୍କୁ ଅଭିଯୋଗ କରିବା ପରେ ସଂସ୍ଥାରେ ହଲଚଲ ହୋଇଛି । ମାମଲା ବାହାରକୁ ପ୍ରଘଟ ନ ହେବା ପାଇଁ ଯଥେଷ୍ଟ ସତର୍କତା ଅବଲମ୍ବନ କରାଯାଇଥିଲେ ମଧ୍ୟ ଏହା କିନ୍ତୁ ପଦାକୁ ଚାଲି ଆସିଛି ।
ସାମ୍ବାଦିକତାରେ ପାଦ ଥାପୁଥିବା ଯୁବତୀଜଣଙ୍କ ସଂପୃକ୍ତ ଗଣମାଧ୍ୟମରେ ଇଣ୍ଟର୍ଣ୍ଣସିପ୍ କରୁଥିଲେ । ଭଲ କାମ କରି ନିୟମିତ ଚାକିରି ଆଶାରେ ଥିବା ସଂପୃକ୍ତ ଯୁବତୀଙ୍କ ଉପରେ ଜଣେ ଉପରିସ୍ଥ କର୍ମଚାରୀଙ୍କ ଲୋଲୁପ ଦୃଷ୍ଟି ପଡ଼ିଥିଲା । ସେ ତାଙ୍କୁ ନିୟମିତ ଚାକିରି କରାଇବାରେ ସାହାଯ୍ୟ କରିବାର ପ୍ରଲୋଭନ ଦେଇ ପ୍ରେମ ଜାଲରେ ଫସାଇବାକୁ ଉଦ୍ୟମ କରିଥିଲେ । ହ୍ୱାଟସ୍ ଆପ୍ ରେ ଚାଟିଂ କରି ବାରମ୍ବାର ପ୍ରେମ ନିବେଦନ କରିଥିଲେ । ମାତ୍ର ସଂପୃକ୍ତ ଯୁବତୀ ଏହାକୁ ପ୍ରତ୍ୟାଖାନ କରିବା ପରେ ତାଙ୍କୁ ଭୀଷଣ ମାନସିକ ନିର୍ଯ୍ୟାତନା ଦେଇଥିଲେ । କର୍ତ୍ତୃପକ୍ଷଙ୍କ କାନକୁ କଥା ଆସିଥିଲେ ମଧ୍ୟ କେହି ଗୁରୁତ୍ୱ ଦେଇ ନ ଥିଲେ । ତେବେ ସଂପୃକ୍ତ ବରିଷ୍ଠ କର୍ମଚାରୀଙ୍କ ମାନସିକ ନିର୍ଯ୍ୟାତନାରେ ଅତିଷ୍ଠ ହୋଇ ଯୁବତୀଜଣଙ୍କ ଶେଷରେ କର୍ତ୍ତୃପକ୍ଷଙ୍କୁ ଲିଖିତ ଅଭିଯୋଗ କରିଥିଲେ । ପ୍ରମାଣସ୍ୱରୂପ ହ୍ୱାଟସ୍ ଆପରେ ଆସିଥିବା ସବୁ ମେସେଜ୍ ର ସ୍କ୍ରିନ୍ ସଟ୍ ବି ସଂଲଗ୍ନ କରିଥିଲେ ।
କହି ଦଉଥାଏ ପରକୁ..ସେହି ବଦନାମ ଭୟରେ କର୍ତ୍ତୃପକ୍ଷଙ୍କର ନିଦ ହଜିଯାଇଥିଲା । ଅଭିଯୁକ୍ତଙ୍କୁ ପନ୍ଦର ଦିନ ପାଇଁ ନିଲମ୍ବିତ କରି ଅଭିଯୋଗକାରିଣୀଙ୍କୁ ଶାନ୍ତ୍ୱନା ଦିଆଯାଇଥିବା ବେଳେ ମାମଲା ବାହାରେ ପ୍ରଘଟ ନ ହେବା ଉପରେ ସର୍ବାଧିକ ଗୁରୁତ୍ୱ ଦିଆଯାଇଛି । କାରଣ ବିପଦ ଆସିଲେ ପରିବାର ନେଇ ଆସେ । ଅତୀତକୁ ଚାହିଁଦେଲେ କଥା ସରିଯିବ । ସେହି ଆଶଙ୍କାରେ କର୍ତ୍ତୃପକ୍ଷ ଚିନ୍ତାରେ ପଡ଼ିବା ସ୍ୱାଭାବିକ ।
(କୌଣସି ସଂସ୍ଥାକୁ ବଦନାମ କରିବା ଆମର ଉଦ୍ଦେଶ୍ୟ ନୁହେଁ । କାରଣ ଗୋଟେ ସଂସ୍ଥା ଗଢ଼ି ତାକୁ ସଫଳ କରାଇବା ପଛରେ ବହୁତ ସାଧନ ଓ ପରିଶ୍ରମ ରହିଥାଏ । ତେଣୁ ଆମେ ଘଟଣା ଘଟିଥିବା ସଂସ୍ଥାର ନାଁ ଲେଖିବାକୁ ଉଚିତ୍ ମନେ କରିନାହୁଁ । ଆମ ବିଚାରରେ କାହାର ବ୍ୟକ୍ତିଗତ ଭୁଲ୍ ଭଟକା ପାଇଁ ଗୋଟେ ସଂସ୍ଥାକୁ ବଦନାମ କରିବା ଠିକ୍ ନୁହେଁ ।)
ଏଭଳି ସଂବେଦନଶୀଳ ଘଟଣାକୁ ଯଥେଷ୍ଟ ଗୁରୁତ୍ବ ଦିଆଯାଇ ସଂପୃକ୍ତ ଅଭିଯୁକ୍ତଙ୍କୁ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉ।