ଭୁବନେଶ୍ୱର: ଆରମ୍ଭ ହୋଇଛି ବିଧାନସଭାର ବଜେଟ୍ ଅଧିବେଶନ । ରାଜ୍ୟପାଳ ଡ. ହରିବାବୁ କମ୍ଭମପତିଙ୍କ ଅଭିଭାଷଣରୁ ଆରମ୍ଭ ହୋଇଥିଲା ବିଧାନସଭା । ଏହାପରେ ଗୃହର ଦିବଙ୍ଗତ ସଦସ୍ୟ/ସଦସ୍ୟା ସ୍ୱର୍ଗତଃ କାହ୍ନୁଚରଣ ଲେଙ୍କା, ସ୍ୱର୍ଗତଃ ଅକ୍ଷୟ କୁମାର ଆଚାର୍ଯ୍ୟ, ସ୍ୱର୍ଗତଃ କୁଳମଣି ରାଉତ, ସ୍ୱର୍ଗତଃ ସଞ୍ଚିତା ମହାନ୍ତି ଏବଂ ସ୍ୱର୍ଗତଃ ରାସେଶ୍ୱରୀ ପାଣିଗ୍ରାହୀଙ୍କ ସ୍ମୁତି ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା । ଗୃହର ନେତା ତଥା ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦ୍ୱାରା ଆଗତ ଶୋକପ୍ରସ୍ତାବ ଉପରେ ଆଲୋଚନା ହୋଇଥିଲା । ବାଚସ୍ପତି ଶ୍ରୀମତୀ ସୁରମା ପାଢ଼ୀଙ୍କ ସମେତ ସବୁ ଦଳର ନେତା ଶ୍ରଦ୍ଧାଞ୍ଜଳି ଅର୍ପଣ କରିବା ପରେ ଏହା ଗୃହରେ ପାରିତ ହୋଇଥିଲା ।
ସନା, ଅରବିନ୍ଦଙ୍କ ଆସନ ବଦଳିଲା
ବିଜେଡିରୁ ନିଲମ୍ବିତ ଦୁଇ ବିଧାୟକ ସନତାନ ମହାକୁଡ଼ ଏବଂ ଅରବିନ୍ଦ ମହାପାତ୍ରଙ୍କର ବିଧାନସଭା ବସିବା ଆସନ ବଦଳି ଯାଇଛି । ଚମ୍ପୁଆ ବିଧାୟକ ଶ୍ରୀ ମହାକୁଡ଼ ପୂର୍ବରୁ F14 ଆସନରେ ବସୁଥିଲେ । ଏବେ ତାଙ୍କୁ F21 ଆସନ ଦିଆଯାଇଛି । ସେହି ଆସନରେ ପୂର୍ବରୁ ମାଧବ ଧଡ଼ା ବସୁଥିଲେ । ସେ ସନା ମହାକୁଡଙ୍କ ଜାଗାକୁ ଆସିଛନ୍ତି । ସେହିଭଳି ପାଟକୁରା ବିଧାୟକ ଶ୍ରୀ ମହାପାତ୍ର ପୂର୍ବରୁ G19 ଆସନରେ ବସୁଥିଲେ । ଏବେ ତାଙ୍କୁ F19 ଆସନ ଦିଆଯାଇଛି । ସେହି ଆସନରେ ପୂର୍ବରୁ ସୁନୀଲ ମହାନ୍ତି ବସୁଥିଲେ । ସେ ଅରବିନ୍ଦଙ୍କ ଜାଗାକୁ ଆସିଛନ୍ତି । ଏଭଳି ଭାବେ ସନାତନ ମହାକୁଡ଼ ଓ ମାଧବ ଧଡ଼ାଙ୍କ ମଧ୍ୟରେ ଆସନ ଅଦଳ ବଦଳ ହୋଇଥିଲା ବେଳେ ଅରବିନ୍ଦ ମହାପାତ୍ର ଏବଂ ସୁନୀଲ ମହାନ୍ତିଙ୍କ ମଧ୍ୟରେ ଆସନ ଅଦଳ ବଦଳ ହୋଇଛି । ବିଧାନସଭାରେ ଆସନ ବଦଳିବା ସହ ବିଜେଡିରୁ ନିଲମ୍ବିତ ଏହି ଦୁଇ ବିଧାୟକଙ୍କୁ ଆଜି ଭିନ୍ନ ଭୂମିକାରେ ଦେଖିବାକୁ ମିଳିଥିଲା । ରାଜ୍ୟପାଳଙ୍କ ଅଭିଭାଷଣକୁ ବିରୋଧ କରି ବିଜେଡି ଓ କଂଗ୍ରେସ କକ୍ଷ…
ଭାଷଣ ଲମ୍ବା, କାମ କମ୍
ରାଜ୍ୟପାଳଙ୍କ ଅଭିଭାଷଣରେ ରାଜ୍ୟ ସରକାରଙ୍କ ଗୋଲାପି ଚିତ୍ର । ଏହାର ପ୍ରତିବାଦରେ ବିରୋଧୀ ଦଳର ସଦସ୍ୟମାନେ କକ୍ଷତ୍ୟାଗ କରିଥିଲେ । ବିରୋଧୀ ଦଳ ନେତା ନବୀନ ପଟ୍ଟନାୟକ ତାଙ୍କ ପ୍ରତିକ୍ରିୟାରେ କହିଥିଲେ, ରାଜ୍ୟପାଳଙ୍କ ବାର୍ତ୍ତା ଭାଷଣରେ ଲମ୍ବା ଥିଲା, ହେଲେ କାମରେ କମ୍ ଥିଲା । ମୁଁ ସବୁ ସମୟରେ କହିଛି ଯେ ଏହି ସରକାରରେ ଆଇନ ଶୃଙ୍ଖଳା ପରିସ୍ଥିତି ଦୁର୍ବିସହ ଅଛି । ଅନ୍ୟ କୌଣସି ରାଜ୍ୟରୁ ଏପରି ହିଂସା ଖବର ଆସୁନି ଯେପରି ଓଡ଼ିଶାରୁ ଆସୁଛି ।
