ଭୁବନେଶ୍ୱର: ଅଗଷ୍ଟ ୨ ରେ ଦିଲ୍ଲୀ ଏମସ୍ ରେ ଆଖି ବୁଜିଥିଲେ ବଳଙ୍ଗା ପୀଡ଼ିତା । ତାଙ୍କ ମୃତ୍ୟୁର ୧୫ ଦିନ ପରେ ଏକ ଭିଡିଓ ଭାଇରାଲ୍ ହୋଇଥିଲା । ଏମ୍ସରେ ଚିକିତ୍ସିତ ହେଉଥିବା ବେଳେ ସେ କାହାରିକୁ ବୟାନ ଦେବା ବେଳର ଦୃଶ୍ୟ ଥିଲା । ସେଥିରେ କହିଥିଲେ, ମୁହଁରେ ରୁମାଲ୍ ଭିଡ଼ିଥିବା ତିନି ଜଣ ଦୁର୍ବୃତ୍ତ ମଟରସାଇକେଲରେ ଆସି ତାଙ୍କ ଉପରେ କିରୋସିନୀ ଢ଼ାଳି ଜାଳି ଦେଇଥିଲେ ।
ଏହି ବୟାନ ସେ ଭୁବନେଶ୍ୱର ନା ଦିଲ୍ଲୀ ଏମ୍ସରେ ଦେଇଥିଲେ ତାହା ଜଣାପଡ଼ି ନ ଥିଲା ।
ସୋସିଆଲ୍ ମିଡିଆରେ ତାହା ଭାଇରାଲ୍ ହେଲା ପରେ ସାରା ରାଜ୍ୟରେ ଆଲୋଡ଼ନ ସୃଷ୍ଟି ହୋଇଥିଲା । ସରକାରଙ୍କ ଉପରେ ବିରୋଧୀ ଦଳ ଝାମ୍ପି ପଡ଼ିଥିଲେ । ଅପରାଧୀଙ୍କୁ ଘଣ୍ଟ ଘୋଡ଼ାଇବା ପାଇଁ ସରକାର ମାମଲାକୁ ଆତ୍ମାହୁତିର ରୂପ ଦେବାକୁ ଉଦ୍ୟମ କରୁଛନ୍ତି ବୋଲି ସେମାନେ ଅଭିଯୋଗ କରିଥିଲେ ।
ସରକାର ଅକଳରେ ପଡୁଥିବା ବେଳେ ପୁରୀ ଏସପି ଗଣମାଧ୍ୟମକୁ ଆସି ଭିଡିଓର ସତ୍ୟାସତ୍ୟ ଯାଞ୍ଚ ହେବ ବୋଲି କହିଥିଲେ । ମାତ୍ର ଦୁଇ ଦିନ ପରେ ମାମଲା ଚୁପ୍ ପଡ଼ିଯିବାରୁ ପୁଲିସ ଯାଞ୍ଚରୁ କ’ଣ ମିଳିଲା କେହି ଜାଣିପାରିଲେ ନାହିଁ । ଯଦି ଭିଡିଓଟି ଫେକ୍ ଥିଲା ତେବେ ତାହାର ଜନ୍ମଦାତାଙ୍କ ନାଁ ବାହାରିଲାନି କି ପୁଲିସ କାର୍ଯ୍ୟାନୁଷ୍ଠାନ ଜଣାପଡ଼ିଲାନି । ଲୋକଙ୍କ ସ୍ମରଣ ଶକ୍ତି କମ୍ ହୋଇଥିବାରୁ କାହାରି ପାଇଁ କିଛି ଅସୁବିଧା ହେଲାନି ।
ଶେଷରେ ଏହି ମାମଲାରେ ଆଜି ପୂର୍ଣ୍ଣଚ୍ଛେଦ ପକାଇଛନ୍ତି ଗୃହ ବିଭାଗ ଦାୟିତ୍ୱରେ ଥିବା ଖୋଦ୍ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ବିଧାୟକ ଅନନ୍ତ ନାରାୟଣ ଜେନାଙ୍କ ପ୍ରଶ୍ନର ଉତ୍ତରରେ ସେ କହିଛନ୍ତି ଯେ ପୁରୀ ବଳଙ୍ଗା ପୀଡ଼ିତା ନିଜେ ନିଜ ଉପରେ କିରୋସିନୀ ଢ଼ାଳି ନିଆଁ ଲଗାଇଥିଲେ । ଦିଲ୍ଲୀ ଏମ୍ସରେ ଚିକିତ୍ସା ବେଳେ ମୃତ୍ୟୁକାଳୀନ ଜମାନବନ୍ଦୀରେ ଏହା କହିଥିଲେ । ଦିଲ୍ଲୀ କୋର୍ଟ ଏବଂ ଏମ୍ସ ଡାକ୍ତରଙ୍କ ଦ୍ୱାରା ବୟାନ ରେକର୍ଡ ବେଳେ ପୀଡ଼ିତା ଏହା କହିଥିଲେ ବୋଲି ମୁଖ୍ୟମନ୍ତ୍ରୀ ଜଣାଇଛନ୍ତି ।
ତେବେ କେଉଁ କାରଣରୁ ପୀଡ଼ିତା ଆତ୍ମାହୁତି ଦେଲେ ତାହା ମୁଖ୍ୟମନ୍ତ୍ରୀଙ୍କ ଉତ୍ତରରେ ଆସିନାହିଁ ।
