ଭୁୁବନେଶ୍ୱର: ମୃତ ଭଉଣୀ ଆକାଉଣ୍ଟରୁ ଟଙ୍କା ଉଠାଇବା ପାଇଁ ଲୋକଟି ବାରମ୍ବାର ବ୍ୟାଙ୍କକୁ ଦୌଡ଼ିଥିଲେ । ମାତ୍ର ସେଠିକା ବାବୁ ମାନେ ଏହି ଅପାଠୁଆ ଅସହାୟ ଆଦିବାସୀ ଲୋକର ବିନତୀ ଶୁଣିଲେ ବି ନାହିଁ । ଭଉଣୀର ଡେଥ୍ ସାର୍ଟିଫିକେଟ୍ କେଉଁଠୁ କେମିତି ଆଣିବେ କେହି କହିଲେ ନାହିଁ । ଯାହା ନାଁରେ ଖାତା ଅଛି ସେ ହିଁ ଟଙ୍କା ଉଠାଇ ପାରିବ ବୋଲି ତାଙ୍କ କାନରେ ପଡ଼ିଲା । ସେଠାରୁ ସିଧା ଆସିଲେ ଘର ପଛପଟେ ମୃତ ଭଉଣୀର କବର ଜାଗାକୁ । ଖୋଳି ବାହାର କଲେ ଭଉଣୀର କଙ୍କାଳ । ସେହି କଙ୍କାଳକୁ ବସ୍ତାରେ ବାନ୍ଧି କାନ୍ଧରେ ପକାଇଲେ । ଚାଲିଲେ ୩ କିଲୋମିଟର ଦୂର ବ୍ୟାଙ୍କକୁ । ବାରଣ୍ଡାରେ କଙ୍କାଳକୁ ଥୋଇ ବ୍ୟାଙ୍କବାଲାଙ୍କୁ ଡାକିଲେ । ତାଙ୍କ ଭଉଣୀ ବୋଲି ଚିହ୍ନାଇ ଟଙ୍କା ମାଗିଲେ ।
ଏ ହେଉଛି ଡିଜିଟାଲ୍ ଇଣ୍ଡିଆର କାହାଣୀ । ଲୋକଙ୍କ ମୁଖ୍ୟମନ୍ତ୍ରୀଙ୍କ ଜିଲ୍ଲାର କାହାଣୀ । ନିଜର ଅଧିକାର ମାଗୁଥିବା ଜଣେ ଅପାଠୁଆ ଆଦିବାସୀର କାହାଣୀ । ବିକଶିତ ଓଡ଼ିଶା ଏବଂ ବିକ୍ଷିପ୍ତ ଭାରତ ଆଡ଼କୁ ଅଗ୍ରସର ହେଉଥିବା ସମୟର ନିଚ୍ଛକ ସତ କାହାଣୀ ।
କେନ୍ଦୁଝର ଜିଲ୍ଲା ପାଟଣା ବ୍ଲକ୍ ଡିଆନାଳୀ ଗ୍ରାମର ନିରୀହ ଆଦିବାସୀ ଜିତୁ ମୁଣ୍ଡା । ତାଙ୍କ ଭଉଣୀ ଭଉଣୀ କଲରା ମୁଣ୍ଡା । ଯାଜପୁର ଜିଲ୍ଲାରେ ବିବାହ କରିଥିବା କଲରାଙ୍କର ସ୍ୱାମୀ ଏବଂ ଏକମାତ୍ର ସନ୍ତାନଙ୍କ ପୂର୍ବରୁ ମୃତ୍ୟୁବରଣ କରିଥିଲେ । ତେଣୁ ଡିଆନାଳୀରେ ଭାଇ ଜିତୁଙ୍କ ପାଖରେ ରହି ମୂଲ ଲାଗି ପେଟ ପୋଷୁଥିଲେ । କିଛି ମାସ ତଳେ ଏକ ବଳଦ ବିକ୍ରି କରି ପାଇଥିବା ୧୯ ହଜାର ୩୦୦ ଟଙ୍କା ସେ ସ୍ଥାନୀୟ ମଲ୍ଲୀପଶିସ୍ଥିତ ଓଡ଼ିଶା ଗ୍ରାମୀଣ ବ୍ୟାଙ୍କରେ ଆକାଉଣ୍ଟ ଖୋଲି ଜମା କରିଥିଲେ । ଦୁଇ ମାସ ତଳେ ଭଉଣୀ କଲରାଙ୍କ ରୋଗରେ ମୃତ୍ୟୁ ହୋଇଥିଲା । ଭଉଣୀଙ୍କ ବ୍ୟାଙ୍କ ଆକାଉଣ୍ଟରେ ଥିବା ଟଙ୍କା ଉଠାଇବା ପାଇଁ ଜିତୁ ବାରମ୍ବାର ବ୍ୟାଙ୍କକୁ ଦୌଡ଼ିଥିଲେ । ମାତ୍ର ବ୍ୟାଙ୍କ କର୍ମଚାରୀ ତାଙ୍କୁ ସହଯୋଗ କରି ନ ଥିଲେ । ଆକାଉଣ୍ଟ ଯାହାର, ସେ ଆସିଲେ ଟଙ୍କା ଦିଆଯିବ ବୋଲି ନିୟମ ବତାଇଥିଲେ ।
ସୋମବାର ଦିନ ୧୧ଟା ଟାଣ ଖରାରେ ଜିତୁ ଚାଲି ଚାଲି ବ୍ୟାଙ୍କକୁ ପୁଣି ଥରେ ଯାଇଥିଲେ । ସମାନ କଥା ଶୁଣିଲା ପରେ ସିଧା ଗାଁ ଶ୍ମଶାନକୁ ଫେରି ଆସିଥିଲେ । ଭଉଣୀକୁ ପୋତିଥିବା ଜାଗାକୁ ଖୋଳି କଙ୍କାଳ ବାହାର କଲେ । ତାକୁ ଏକ ବସ୍ତାରେ ପୂରାଇଥିଲେ । ସେହି ବସ୍ତାକୁ କାନ୍ଧରେ ପକାଇ ୩ କିଲୋମିଟର ଚାଲି ଚାଲି ପୁଣି ବ୍ୟାଙ୍କରେ ପହଞ୍ଚିଥିଲେ । ନରକଙ୍କାଳ ଭର୍ତ୍ତି ବସ୍ତାକୁ ବ୍ୟାଙ୍କ ବାରଣ୍ଡାରେ ରଖିବା ଦେଖି ଉପସ୍ଥିତ ବ୍ୟାଙ୍କ କର୍ମଚାରୀ ଏବଂ ଗ୍ରାହକମାନେ ଭୟରେ ଥରିଥିଲେ । ଖବର ପାଇ ପୁଲିସ ସେଠାରେ ପହଞ୍ଚି ତାଙ୍କୁ ବୁଝାସୁଝା କରିବା ପରେ ଭଉଣୀର କଙ୍କାଳକୁ ନେଇ ଜିତୁ ଗାଁ ଶ୍ମଶାନରେ ପୁଣି ଥରେ ପୋତି ଦେଇଥିଲେ ।
ଏହି ହୃଦୟ ବିଦାରକ, ସମ୍ବେଦନଶୀଳ ଖବର ଜାତୀୟ ଗଣମାଧ୍ୟମରେ ମଧ୍ୟ ଛାଇ ହୋଇଯାଇଛି । ୧୦ ବର୍ଷ ତଳେ କଳାହାଣ୍ଡିର ଦାନା ମାଝୀ ଘଟଣାଠାରୁ ଏହା ଆହୁରି ସମ୍ବେଦନଶୀଳ ପ୍ରସଙ୍ଗ ହୋଇଯାଇଛି । ବ୍ୟାଙ୍କକୁ ପ୍ରମାଣ ଦେବା ପାଇଁ ଜଣେ ଭାଇ ତାଙ୍କର ମୃତ ଭଉଣୀର କଙ୍କାଳକୁ କାନ୍ଧରେ ପକାଇ ଯିବାର ବିକଳ ଦୃଶ୍ୟ ବେଶ୍ ହୃଦୟ ବିଦାରକ । ଯିଏ ଦେଖୁଛନ୍ତି ତାଙ୍କର ଛାତି ଥରିଯାଉଛି । ମାନବିକତା ଦୋହଲିଯାଉଛି । ମଣିଷକୁ ଚଳଉଥିବା ବ୍ୟବସ୍ଥାର ଜଟିଳତା ଏବଂ ବ୍ୟବସ୍ଥାକୁ ନିୟନ୍ତ୍ରଣ କରୁଥିବା ମଣିଷଙ୍କ କ୍ରୁରତା ଆଗରେ ଜଣେ ଅପାଠୁଆ ନିରୀହ ଆଦିବାସୀ ମଣିଷ କେତେ ଅସହାୟ ତାହା ତାଙ୍କ ଫଟୋ ବୟାନ କରୁଛି ।
ଏଠି ସରକାରୀ ଯୋଜନାର ପ୍ରଚାର ଓ ପ୍ରସାର ନାଁରେ କୋଟି କୋଟି ଟଙ୍କା ଖର୍ଚ୍ଚରେ ସହର ସାରା ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଫଟୋ ଲଗା ହୋର୍ଡିଂ ଝୁଲୁଛି । ଖବରକାଗଜରେ ଦୈନିକ ଲକ୍ଷ ଲକ୍ଷ ଟଙ୍କାର ବିଜ୍ଞାପନ ବାହାରୁଛି । ମାତ୍ର ସମାଜର ସବା ତଳେ ରହୁଥିବା ମଣିଷ ପାଇଁ ଶିକ୍ଷା, ସଚେତନତାର ଅଭାବ ସମସ୍ତଙ୍କୁ ଉଦବେଳିତ କରିଛି । ସଭ୍ୟ ସମାଜରେ ବ୍ୟବସ୍ଥାର ବିକଳ ଚିତ୍ର ଅଧିକ ବିଚଳିତ କରିଛି ।
ଆହୁରି ଦୁର୍ଭାଗ୍ୟ ଯେ ଘଟଣାର ୨୪ ଘଣ୍ଟା ପରେ ମଧ୍ୟ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ମୁହଁରୁ ଆହା ପଦେ ବାହାରି ନାହିଁ । ସେହି ଜିଲ୍ଲାରୁ ପ୍ରତିନିଧିତ୍ୱ କରୁଥିବା ମୁଖ୍ୟମନ୍ତ୍ରୀ ଆଜି ଦିନ ତମାମ ଜିଲ୍ଲାରେ ରହି ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇଛନ୍ତି । ଜିତୁ ମୁଣ୍ଡା ଖବର ସାରା ଦେଶରେ ଆଲୋଡ଼ନ ସୃଷ୍ଟି କରିଥିଲା ବେଳେ ମୁଖ୍ୟମନ୍ତ୍ରୀ ସମ୍ପୂର୍ଣ୍ଣ ନିରବ ରହିବା ସମସ୍ତଙ୍କୁ ଚକିତ କରିଛି । ଗଣମାଧ୍ୟମରେ ଏହି ଖବରର ଝଡ଼ ବୋହୁଥିଲା ବେଳେ ମୁଖ୍ୟମନ୍ତ୍ରୀ ଜିଲ୍ଲାରେ ଆଡମ୍ବରପୂର୍ଣ୍ଣ ବିଭିନ୍ନ କାର୍ଯ୍ୟକ୍ରମରେ ନିଜକୁ ସାମିଲ ରଖିଛନ୍ତି । ନିଜ ଜିଲ୍ଲାର ନିଜ ସମ୍ପ୍ରଦାୟର ଜଣେ ନିରୀହ ବ୍ୟକ୍ତିଙ୍କ ଅସହାୟତା ତାଙ୍କୁ ବିଚଳିତ କରିନାହିଁ ।
ବାଆଁରେଇଲେ ବ୍ୟାଙ୍କ ମ୍ୟାନେଜର: ଜିତୁ ମୁଣ୍ଡା ବାରମ୍ବାର ବ୍ୟାଙ୍କ ଆସିନାହାନ୍ତି କହି ଘଟଣାର ଗମ୍ଭୀରତାକୁ ବାଆଁରେଇ ଦେଇଛନ୍ତି ମଲ୍ଲୀପଶିସ୍ଥିତ ଓଡ଼ିଶା ଗ୍ରାମୀଣ ବ୍ୟାଙ୍କ ମ୍ୟାଜେନର । ସେ ତାଙ୍କ ସଫେଇରେ କହିଛନ୍ତି ଯେ ସଂପୃକ୍ତ ବ୍ୟକ୍ତି ତାଙ୍କ ଭଉଣୀଙ୍କ ବ୍ୟାଙ୍କ ଆକାଉଣ୍ଟରୁ ଟଙ୍କା ନେବା ପାଇଁ ଥରୁଟିଏ ଆସିଥିଲେ । ବ୍ୟାଙ୍କ ନିୟମ ଅନୁଯାୟୀ ପ୍ରମାଣପତ୍ର ଆଣିବାକୁ ତାଙ୍କୁ କୁହାଯାଇଥିଲା । ମାତ୍ର ସେ ମଦ ପିଇ ନରକଙ୍କାଳ ଧରି ଆସି ପହଞ୍ଚିଥିଲେ । ଏଥିରେ ଆମର କିଛି ଦୋଷ ନାହିଁ ବୋଲି ସେ କହିଛନ୍ତି ।
