ଭୁବନେଶ୍ୱର: ବିଜେଡି-ବିଜେପି ମେଣ୍ଟ ପ୍ରଶ୍ନରେ ରାଜ୍ୟ ବିଜେପିର ନିର୍ବାଚନ ପ୍ରଭାରୀ ବିଜୟପାଲ୍ ସିଂହ ତୋମାର ଆଜି ଛେପ ଢ଼ୋକି ପକାଇଛନ୍ତି । କହିଛନ୍ତି, ନା ନା ମୁଁ ଏ ବିଷୟରେ କିଛି କହିପାରିବିନି । ଏହା କେନ୍ଦ୍ରର ନିଷ୍ପତ୍ତି । କେନ୍ଦ୍ର ଯାହା ନିଷ୍ପତ୍ତି ନେବ ଆମେ ତାହାକୁ ସ୍ୱୀକାର କରିବୁ ।
ଦୁଇଦିନ ତଳେ ଶ୍ରୀ ତୋମାର ବେଶ୍ ଦାମ୍ଭିକତାର ସହ ଏହି ପ୍ରଶ୍ନର ସାମନା କରିଥିଲେ । ଗଣମାଧ୍ୟମକୁ ବାଇଟ୍ ଦେଇ କହିଥିଲେ ଯେ ଓଡ଼ିଶାରେ ବିଜେଡି-ବିଜେପି ମେଣ୍ଟର ପ୍ରଶ୍ନ ନାହିଁ । ବିଜେପି ଏଠି ଏକାକୀ ଲଢ଼ିବ ବୋଲି ସେ ସ୍ପଷ୍ଟ କହିଥିଲେ । ଖାଲି ସେତିକି ନୁହେଁ, ବିଧାନସଭାରେ ବିଜେପି ୮୦ ରୁ ଅଧିକ ଆସନ ଏବଂ ଲୋକସଭାରେ ୧୫ ରୁ ଅଧିକ ଆସନ ଜିତିବ ବୋଲି ଦମ୍ଭ ଦେଖାଇଥିଲେ ।
ମାତ୍ର ଆଜି ତୋମାରଙ୍କ ମୁହଁରେ ସେହି ଦମ୍ଭ ଦେଖିବାକୁ ମିଳିନାହିଁ । ଭୁବନେଶ୍ୱର ବିମାନବନ୍ଦରରେ ସାମ୍ବାଦିକମାନେ ତାଙ୍କୁ ଏହି ବିଷୟରେ ପୁଣି ପ୍ରଶ୍ନ କରିବାରୁ ସେ ଥତମତ ହୋଇଯାଇଥିଲେ । ମେଣ୍ଟ ହେବ କି ନାହିଁ କହିପାରିବେନି ବୋଲି ସ୍ପଷ୍ଟ ଉତ୍ତର ଦେଇଥିଲେ । ଏହା କେନ୍ଦ୍ରର ବିଷୟ ଏବଂ କେନ୍ଦ୍ର ଯାହା ନିଷ୍ପତ୍ତି ନେବ, ତାହାକୁ ସ୍ୱୀକାର କରିବୁ ବୋଲି ନରମ ଗଳାରେ କହିଥିଲେ । ଅବଶ୍ୟ ନିଜ ବୟାନରେ ଆଉ ଦୁଇପଦ ଯୋଡ଼ି ପ୍ରସଙ୍ଗକୁ ବାଲାନ୍ସ କରିବାକୁ ଉଦ୍ୟମ କରିଥିଲେ ତୋମାର । କହିଥିଲେ, ସବୁ ଆସନରେ ଲଢ଼ିବାକୁ ବିଜେପି ପ୍ରସ୍ତୁତ ଅଛି । ସେଥିପାଇଁ ଆମର କାର୍ଯ୍ୟକ୍ରମ ଜାରି ରହିଛି ।
ସୂଚନାଥାଉକି, ବିଜେଡି-ବିଜେପି ମେଣ୍ଟ ସମ୍ଭାବନାକୁ ନେଇ ସବୁ ମହଲରେ ଚର୍ଚ୍ଚା ହେଉଛି । ମାତ୍ର ଏହାର ସତ୍ୟତା କାହାରିକୁ ଜଣାନାହିଁ । ଉଭୟ ଦଳର ଆଗଧାଡ଼ିର ନେତାଙ୍କ ପାଖରେ ମଧ୍ୟ ଏହାର ସମ୍ୟକ ସୂଚନା ନାହିଁ । ବିଜେଡି ନେତାମାନେ ଏହି ପ୍ରସଙ୍ଗରେ ଗଣମାଧ୍ୟମରେ ବୟାନବାଜିରୁ ଦୂରେଇ ରହିଥିଲା ବେଳେ ରାଜ୍ୟ ବିଜେପି ସଭାପତି ମନମୋହନ ସାମଲ ବିଜେପି ଏକାକୀ ଲଢ଼ିବ ବୋଲି କହି ଆସୁଛନ୍ତି । ରାଜ୍ୟ ବିଜେପିର ଦିଲ୍ଲୀ ମଙ୍ଗ ଧରିଥିବା ସୁନୀଲ ବଂଶଲ ମଧ୍ୟ ବିଜେପି ଏଠି ଏକାକୀ ଲଢ଼ିବ ବୋଲି ପୂର୍ବରୁ ଘୋଷଣା କରିଛନ୍ତି । ବିଜୟପାଲ୍ ସିଂହ ତୋମାର ବି ସେୟା କହୁଥିଲେ । ମାତ୍ର ଆଜି ଏହା କେନ୍ଦ୍ରର ନିଷ୍ପତ୍ତି କହି ଛେପ ଢ଼ୋକିବା ଘଟଣା ଖୋଦ୍ ରାଜ୍ୟ ବିଜେପି ନେତାଙ୍କୁ ଅଡୁଆରେ ପକାଇଛି ।