ଭୁବନେଶ୍ୱର: ଓଡ଼ିଶା ବିଧାନସଭାର ବାଚସ୍ପତି ହେଲେ ବିକ୍ରମ କେଶରୀ ଆରୁଖ । ଆଜି ବିଧାନସଭାର ସ୍ୱତନ୍ତ୍ର ଅଧିବେଶନରେ ସେ ନିର୍ଦ୍ୱନ୍ଦରେ ନିର୍ବାଚିତ ହୋଇଛନ୍ତି । ସୂର୍ଯ୍ୟ ନାରାୟଣ ପାତ୍ରଙ୍କ ଇସ୍ତଫା ଯୋଗୁଁ ଖାଲି ପଡିଥିବା ଏହି ସର୍ବୋଚ୍ଚ ପଦବୀ ଲାଗି ଗତ ୧୦ ତାରିଖରେ ସେ ପ୍ରାର୍ଥୀପତ୍ର ଦାଖଲ କରିଥିଲେ । ଭଞ୍ଜନଗର ଆସନରୁ କ୍ରମାଗତ ୬ ଥର ବିଧାନସଭାକୁ ନିର୍ବାଚିତ ହୋଇଥିବା ଶ୍ରୀ ଆରୁଖ ୨୦୦୮ ମସିହାରେ ବିଧାନସଭାର ମୁଖ୍ୟ ସଚେତକ ଏବଂ ତିନି ତିନି ଥର ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ପଦ ସମ୍ଭାଳିଛନ୍ତି ।
ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ, ଦିନ ୧୦.୩୦ ରେ ବିଧାନସଭାର ସ୍ୱତନ୍ତ୍ର ଅଧିବେଶନ ଆରମ୍ଭ ହୋଇଥିଲା । ଉପବାଚସ୍ପତି ରଜନୀକାନ୍ତ ସିଂହଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା । ବାଚସ୍ପତି ପଦ ଲାଗି ଶ୍ରୀ ଆରୁଖଙ୍କ ଛଡ଼ା ଅନ୍ୟ କେହି ପ୍ରାର୍ଥୀପତ୍ର ଦାଖଲ କରି ନ ଥିବାରୁ ବିଧି ଅନୁଯାୟୀ ଗୃହର ନେତା ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ନାଁରେ ଏକ ପ୍ରସ୍ତାବ ଆଗତ କରିଥିଲେ । ସଂସଦୀୟ ବ୍ୟାପାର ମନ୍ତ୍ରୀ ନିରଞ୍ଜନ ପୂଜାରୀ ଏହାକୁ ସମର୍ଥନ କରିଥିଲେ । ତାହାପରେ ବାଚନିକ ଭୋଟରେ ଗୃହର ସବୁ ସଦସ୍ୟ ଏହାକୁ ସମର୍ଥନ କରିଥିଲେ । ଉପବାଚସ୍ପତି ଶ୍ରୀ ସିଂହ ଶ୍ରୀ ଆରୁଖଙ୍କୁ ସର୍ବସମ୍ମତି କ୍ରମେ ବାଚସ୍ପତି ନିର୍ବାଚିତ ହୋଇଥିବା ଘୋଷଣା କରିଥିଲେ ।
ଏହାପରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ, ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ, କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଏବଂ ଅନ୍ୟମାନେ ନବ ନିର୍ବାଚିତ ବାଚସ୍ପତିଙ୍କୁ ତାଙ୍କର ଆସନ ପର୍ଯ୍ୟନ୍ତ ପାଛୋଟି ନେଇଥିଲେ ।
ମୁଖ୍ୟମନ୍ତ୍ରୀ ତାଙ୍କ ଅଭିଭାଷଣରେ ନବ ନିର୍ବାଚିତ ବାଚସ୍ପତି ଶ୍ରୀ ଆରୁଖଙ୍କୁ ଅଭିନନ୍ଦନ ଜଣାଇବା ସହ ଗୃହର ସବୁ ସଦସ୍ୟଙ୍କୁ ଧନ୍ୟବାଦ ଅର୍ପଣ କରିଥିଲେ । ଗୃହର ପଦମର୍ଯ୍ୟାଦା ଓ ଗାରିମା ବଜାୟ ରଖିବା ପାଇଁ ତାଙ୍କର ଶୁଭ କାମନା କରିଥିଲେ ।
ବିରୋଧୀ ଦଳ ମୁଖ୍ୟ ସଚେତକ ଶ୍ରୀ ମାଝୀ ଶ୍ରୀ ଆରୁଖଙ୍କୁ ଅଭିନନ୍ଦନ ଜଣାଇଥିଲେ । ଗୃହ ପରିଚାଳନାରେ ତାଙ୍କଠାରୁ ନିରପେକ୍ଷତା ଆଶା କରିଥିଲେ ।
କଂଗ୍ରେସ ବିଧାୟକ ଦଳ ନେତା ଶ୍ରୀ ମିଶ୍ର ନବ ନିର୍ବାଚିତ ବାଚସ୍ପତିଙ୍କୁ ଅଭିନନ୍ଦନ ଜଣାଇବା ସହ ତାଙ୍କଠାରୁ ନିରପେକ୍ଷତା ଆଶା କରିଥିଲେ । ସଂଖ୍ୟା ଦୃଷ୍ଟିରୁ ସରକାରୀ ଦଳ ସୁଦୃଢ଼ ଥିବାରୁ ଏକଛତ୍ରବାଦ ଏଡାଇବା ପାଇଁ ବିରୋଧୀ ଦଳକୁ ବେଶୀ ଗୁରୁତ୍ୱ ଦେବାକୁ ସେ ପରାମର୍ଶ ଦେଇଥିଲେ । ବାଚସ୍ପତି ନିର୍ବାଚନ ପୂର୍ବରୁ ବିରୋଧୀ ଦଳକୁ ବିଶ୍ୱାସକୁ ନେଇଥିଲେ ଭଲ ହୋଇଥାନ୍ତା ବୋଲି ସେ କହିଥିଲେ । ତେବେ ବାଚସ୍ପତିଙ୍କୁ ସହଯୋଗ ଜାରି ରହିବ ଏବଂ ବାଚସ୍ପତି ସେମାନଙ୍କୁ ବିଶ୍ୱାସକୁ ନେବେ ବୋଲି ଶ୍ରୀ ମିଶ୍ର ଆଶା ରଖିଥିଲେ ।
ବାଚସ୍ପତି ଶ୍ରୀ ଆରୁଖ ତାଙ୍କ ବକ୍ତବ୍ୟରେ ଗୃହର ସବୁ ସଦସ୍ୟଙ୍କୁ ଧନ୍ୟବାଦ ଏବଂ କୃତଜ୍ଞତା ଜଣାଇଥିଲେ । ଗଣତନ୍ତ୍ରର ପଦମର୍ଯ୍ୟାଦା ଅକ୍ଷୂର୍ଣ୍ଣ ରଖିବା ପାଇଁ ସେ କାମ କରିବାକୁ ପ୍ରତିଶ୍ରୁତି ଦେବା ସହ ସମସ୍ତଙ୍କ ସହଯୋଗ କାମନା କରିଥିଲେ ।
୨୦ ମିନିଟ୍ ରେ ବାଚସ୍ପତି ନିର୍ବାଚନ ପ୍ରକ୍ରିୟା ଶେଷ ହୋଇଥିଲା ଏବଂ ବାଚସ୍ପତି ଗୃହକୁ ମୁଲତବୀ ଘୋଷଣା କରିଥିଲେ ।
