ଭୁବନେଶ୍ୱର: ଆସନ୍ତାକାଲି ହେବାକୁ ଯାଉଥିବା ଉପରାଷ୍ଟ୍ରପତି ନିର୍ବାଚନରେ ବିଜେଡି ଭୋଟ ଦେବ ନାହିଁ । ଏନଡିଏ ଏବଂ ଇଣ୍ଡି ମେଣ୍ଟଠାରୁ ସମଦୂରତ୍ୱ ନୀତି ଆଧାରରେ ଭୋଟଦାନରୁ ବିରତ ରହିବ ବୋଲି ଘୋଷଣା କରାଯାଇଛି । ଦିଲ୍ଲୀ ଗସ୍ତରେ ଥିବା ଦଳର ସୁପ୍ରିମୋ ନବୀନ ପଟ୍ଟନାୟକଙ୍କ ଏହି ନିଷ୍ପତ୍ତିକୁ ଭିଡିଓ ବାର୍ତ୍ତାରେ ଜଣାଇଛନ୍ତି ବିଜେଡି ସଂସଦୀୟ ଦଳ ନେତା ଡ. ସସ୍ମିତ୍ ପାତ୍ର । ଦଳର ବରିଷ୍ଠ ନେତୃବୃନ୍ଦ, ରାଜନୈତିକ ବ୍ୟାପାର କମିଟିର ସଦସ୍ୟଗଣ ଏବଂ ଦଳୀୟ ସାଂସଦମାନଙ୍କ ସହ ଆଲୋଚନା କରି ନବୀନ ବାବୁ କୁଆଡ଼େ ଏହି ନିଷ୍ପତ୍ତି ନେଇଛନ୍ତି । ଓଡ଼ିଶା ଏବଂ ସାଢ଼େ ଚାରି କୋଟି ଓଡ଼ିଆଙ୍କ ବିକାଶ ପାଇଁ ବିଜେଡିର କାର୍ଯ୍ୟ ଜାରି ରହିବ ବୋଲି କୁହାଯାଇଛି ।
ତେବେ ସମଦୂରତ୍ୱ ନାଁରେ ବିଜେଡିର ଏହି ନିଷ୍ପତ୍ତି ପଛରେ ବିଜେପି ପ୍ରେମ ଲୁଚି ନାହିଁ । ବିଜେପିକୁ ଏହା ପରୋକ୍ଷ ସମର୍ଥନ ବୋଲି ଖୋଦ୍ କେନ୍ଦ୍ରମନ୍ତ୍ରୀ ଜୁଏଲ୍ ଓରାମ୍ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ସେହିଭଳି ପିସିସି ସଭାପତି ଭକ୍ତ ଚରଣ ଦାସ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ ବିରୋଧୀ ଦଳ ନେତା ଭାବରେ ନବୀନ ବାବୁ ଦୁର୍ବଳ ହୋଇପଡ଼ିଛନ୍ତି । ସମ ଦୂରତା ଭଳି ସହଜିଆ ଶବ୍ଦ କହି ବିରୋଧୀ ଭୂମିକାରୁ ଦଳକୁ ନିବୃତ୍ତ କରିଛନ୍ତି । ଉପରାଷ୍ଟ୍ରପତି ନିର୍ବାଚନ ଭୋଟିଂରୁ ବିଜେଡି ବିରତ ରହି ପରୋକ୍ଷରେ ବିଜେପିକୁ ସମର୍ଥନ କରିଛି ବୋଲି ସେ କହିଛନ୍ତି ।
ଉପରାଷ୍ଟ୍ରପତି ନିର୍ବାଚନରେ ସଂଖ୍ୟା ଦୃଷ୍ଟିରୁ ଏନଡିଏ ପ୍ରାର୍ଥୀଙ୍କର ବିଜୟ ସୁନିଶ୍ଚିତ । ବିଜେପି ନେତୃତ୍ୱାଧୀନ ଏନଡିଏକୁ ବିଜେଡିର ୭ ରାଜ୍ୟସଭା ସାଂସଦଙ୍କ ଭୋଟ ଜମାରୁ ଫରକ୍ ପକାଇବାର ନାହିଁ । ମାତ୍ର ରାଜ୍ୟରେ ଏକ ସଶକ୍ତ ବିରୋଧୀ ଦଳ ଭାବେ ନିଜର ସ୍ଥିତି ଜାହିର କରିବା ସହ ଜାତୀୟ ରାଜନୀତିରେ ସ୍ଥିତିରକ୍ଷା ପାଇଁ ବିଜେଡି ପାଇଁ ଏହାର ଯଥେଷ୍ଟ ଗୁରୁତ୍ୱ ରହିଛି । ଏବେକାର ବିଜେପି ଶାସିତ ଓଡ଼ିଶାରେ ମୁଖ୍ୟ ବିରୋଧୀ ଦଳ ବିଜେଡି ହୋଇଥିବାରୁ ସ୍ୱାଭାବିକ ଭାବେ ଏନଡିଏ ବିରୋଧୀ ଆଭିମୁଖ୍ୟ ରହିବା କଥା । ଏହା ଦଳକୁ ସଂଗଠିତ କରି ରଖିବା ସହ ସହ ବିଜେଡି ନେତା ଓ କର୍ମୀଙ୍କ ମନରେ ଉତ୍ସାହ ବଢ଼ାଇବାରେ ସହାୟକ ହୁଅନ୍ତା । ସର୍ବୋପରି ଲୋକଙ୍କ ଆଗରେ ସେମାନଙ୍କୁ ମୁହଁଲଜ୍ଜାରୁ ରକ୍ଷା କରନ୍ତା ।
ମାତ୍ର ନିର୍ବାଚନ ପରାଜୟ ପରଠାରୁ ବିଜେଡିର ଅବସ୍ଥା ଦୁର୍ବଳ ହେଉଥିବା ଏବଂ ଦଳର ନେତା ଓ କର୍ମୀମାନେ ବିଜେପି ସହ ମଧୁର ସମ୍ପର୍କର ଅପବାଦ ବୋହୁଥିବା ବେଳେ ଉପରାଷ୍ଟ୍ରପତି ନିର୍ବାଚନରୁ ବିଜେଡିର ବିରତି ଘୋଷଣା ଦଳ ପାଇଁ ଆହୁରି କ୍ଷତିକାରକ ହେବ ବୋଲି ରାଜନୈତିକ ବିଶାରଦମାନେ ମତ ଦେଇଛନ୍ତି ।
ସେମାନଙ୍କ କହିବାନୁଯାୟୀ, ଏନଡିଏ ଉପରାଷ୍ଟ୍ରପତି ପ୍ରାର୍ଥୀଙ୍କ ବିଜୟ ସୁନିଶ୍ଚିତ ପରିପ୍ରେକ୍ଷୀରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଚତୁରତାର ସହ ସମଦୂରତା କାର୍ଡ ଖେଳିଛନ୍ତି । ବିଜେପି ସହ ମଧୁର ସମ୍ପର୍କକୁ ଅତୁଟ ରଖିବା ଏବଂ ନେତୃତ୍ୱକୁ ଖୁସିରେ ରଖିବା ପାଇଁ ନବୀନଙ୍କର ଏହା ଚାଲ୍ ବୋଲି ସମସ୍ତେ ବୁଝିଗଲେଣି । ଏଭଳି ଦୃଶ୍ୟପଟରେ ବିଜେଡି ନେତା ଓ କର୍ମୀମାନେ ରାଜ୍ୟର ବିଜେପି ସରକାରଙ୍କ ବିରୋଧରେ କିପରି ଲଢ଼େଇ କରିବେ ବୋଲି ସେମାନେ ପ୍ରଶ୍ନ କରିଛନ୍ତି ।
ଦୁଇଦିନ ତଳେ ନବୀନ ନିବାସରେ ଅନୁଷ୍ଠିତ ବିଜେଡି ରାଜନୈତିକ ବ୍ୟାପାର କମିଟି ବୈଠକରେ ଅଧିକାଂଶ ସଦସ୍ୟ ଏନଡିଏ ବିରୋଧୀ ଆଭିମୁଖ୍ୟ ପ୍ରକଟ କରିଥିଲେ । ଏନଡିଏ ଉପରାଷ୍ଟ୍ରପତି ପ୍ରାର୍ଥୀଙ୍କୁ ସମର୍ଥନ ନ ଦେବାକୁ ଦୃଢ଼ ମତ ରଖିଥିଲେ । ଅବଶ୍ୟ ଏନଡିଏ ପ୍ରତି ନବୀନ ନିବାସର କୋହଳ ମନୋଭାବକୁ ଭଲ ଭାବେ ହୃଦୟଙ୍ଗମ କରିଥିବା ଦୁଇ ତିନି ଜଣ ସଦସ୍ୟ ମୁହଁଲଜ୍ଜା ଢ଼ାଙ୍କିବା ପାଇଁ ଭୋଟ ବିରତି ପ୍ରସ୍ତାବ ଦେଇଥିଲେ । ସେମାନଙ୍କ ଯୁକ୍ତି ଥିଲା ଯେ ଏନଡିଏ ପ୍ରାର୍ଥୀଙ୍କୁ ପ୍ରତ୍ୟକ୍ଷ ସମର୍ଥନ ନ କରି ଭୋଟରୁ ନିବୃତ୍ତ ରହିଲେ ପରା ଦଳର ଇଜ୍ଜତ ବଞ୍ଚିଯିବ । ଶେଷରେ ସେଇ ପ୍ରସ୍ତାବକୁ ରଖିଛନ୍ତି ନବୀନ । ମୋଟାମୋଟି ଭାବେ, ମୁଷ୍ଟିମେୟ ବ୍ୟକ୍ତିଙ୍କ ସ୍ୱାର୍ଥକୁ ଜଗି ଦଳର ସ୍ୱାର୍ଥକୁ ପୁଣି ଥରେ ବଳି ଚଢ଼ାଇଛନ୍ତି ।
ସୂଚନାଥାଉକି, ନିକଟ ଅତୀତରେ ୱକଫ୍ ବିଲ୍ ସମର୍ଥନକୁ ନେଇ ବିଜେଡିରେ କମ୍ପମାନ ହୋଇଥିଲା । ବିଲ୍ କୁ ବିରୋଧ କରାଯିବ ବୋଲି ନବୀନ ବାବୁ ବହୁ ପୂର୍ବରୁ ସ୍ପଷ୍ଟ କରିଥିଲେ ମଧ୍ୟ ଶେଷ ମୁହୂର୍ତ୍ତରେ ବିବେକାନୁମୋଦିତ ଭୋଟ ଆଳରେ ବିଲ୍ କୁ ସମର୍ଥନ କରିବାକୁ ନିଷ୍ପତ୍ତି ହୋଇଥିଲା । ମାତ୍ର ମୁନ୍ନା ଖାନ୍ ଏବଂ ଦେବାଶିଷ ସାମନ୍ତରାୟ ଏହାକୁ ଅମାନ୍ୟ କରିଥିଲେ । ମୁନ୍ନା ଖାନ୍ ବିଲ୍ ବିପକ୍ଷରେ ଭୋଟ ଦେଇଥିଲା ବେଳେ ଦେବାଶିଷ ସାମନ୍ତରାୟ ଭୋଟଦାନରୁ ବିରତ ରହିଥିଲେ । ବାକି ୫ ଜଣ ସାଂସଦ ବିଲ୍ ସପକ୍ଷରେ ଭୋଟ ଦେଇଥିଲେ । ନବୀନ ନିବାସ-ଦିଲ୍ଲୀ ମଧ୍ୟରେ ଏହି ଚତୁର କୋଳାକୋଳି ବିଜେଡି ପାଇଁ ଥିଲା ଦ୍ୱିତୀୟ ବଡ଼ ବିପର୍ଯ୍ୟୟ ।
