ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ସ୍ମାରକପତ୍ର
ଭୁବନେଶ୍ୱର: ଏମଏମଡିଆର ସଂଶୋଧନ ବିରୋଧରେ ରାସ୍ତାକୁ ଓହ୍ଲାଇଛି ବିଜେଡି । ସଂଶୋଧିତ ଆଇନ ପ୍ରତ୍ୟାହାର ଦାବିରେ ଦଳ ପକ୍ଷରୁ ଲୋକ ଭବନ ସମ୍ମୁଖରେ ଆଜି ବିକ୍ଷୋଭ ପ୍ରଦର୍ଶନ କରାଯାଇଥିଲା । ଆଇନ ପ୍ରତ୍ୟାହାର ନ ହେଲା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ସରକାରଙ୍କୁ ଚେତାବନୀ ଦିଆଯାଇଛି । ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ରାଜ୍ୟପାଳଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଥିଲା ।
ସଂଶୋଧିତ ଏମଏମଡିଆର ଆଇନକୁ ବିଜେଡି ପ୍ରଥମରୁ ବିରୋଧ କରି ଆସୁଛି । ମାତ୍ର ବିରୋଧ ଶଙ୍ଖଭବନ ସାମ୍ବାଦିକ ସମ୍ମିଳନୀରେ ସୀମିତ ଥିଲା । ଆଜି ପ୍ରଥମ ଥର ରାଜରାସ୍ତାକୁ ଓହ୍ଲାଇ ଏହାକୁ ବିରୋଧ କରିଥିଲା । ପ୍ରତିବାଦ ଶୋଭାଯାତ୍ରାରେ ଯାଇ ଲୋକ ଭବନ ସାମ୍ନାରେ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଦଳର ବରିଷ୍ଠ ନେତା, କାର୍ଯ୍ୟକର୍ତ୍ତା, ବିଧାୟକ ଏବଂ ସାଂସଦମାନେ ସାମିଲ ହୋଇଥିଲେ । ସେଠାରେ ଅନୁଷ୍ଠିତ ପ୍ରତିବାଦ ସଭାରେ ଏମଏମଡିଆର ସଂଶୋଧନ ଆଇନକୁ ନେତାମାନେ ତୀବ୍ର ବିରୋଧ କରିଥିଲେ । ଓଡ଼ିଶାର ଖଣିଜ ସମ୍ପଦ ଉପରେ କେନ୍ଦ୍ରର ମାଲିକାନାକୁ ବରଦାସ୍ତ କରାଯିବ ନାହିଁ । ଓଡ଼ିଶାର ସମ୍ପତ୍ତି କେନ୍ଦ୍ର ହାତକୁ ଟେକିବାକୁ ଦିଆଯିବ ନାହିଁ ବୋଲି ଚେତାବନୀ ଦେଇଥିଲେ ।
