ଭୁୁବନେଶ୍ୱର: ଏମଏମଡିଆର ସଂଶୋଧନ ଆକ୍ଟ ବିରୋଧରେ ବିଜେଡି ଆନ୍ଦୋଳନାତ୍ମକ ପନ୍ଥା ଅପଣାଇଛି । ଶଙ୍ଖଭବନରେ ସାମ୍ବାଦିକ ସମ୍ମିଳନୀରେ କେବଳ ସୀମିତ ନ ରହି ରାଜରାସ୍ତାକୁ ଓହ୍ଲାଇବ । ଆଜି ଦଳ ପକ୍ଷରୁ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଘୋଷଣା କରାଯାଇଛି । ଆସନ୍ତା ୯ ତାରିଖରେ ଲୋକଭବନ ଆଗରେ ପ୍ରଥମେ ଗଣଧାରଣା ଦିଆଯିବ । ଏହାପରେ ରାଜ୍ୟବ୍ୟାପୀ ଆନ୍ଦୋଳନ ହେବ ।
ଆଜି ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଦଳର ବରିଷ୍ଠ ନେତା ଦେବୀ ପ୍ରସାଦ ମିଶ୍ର, ଅତନୁ ସବ୍ୟସାଚୀ ନାୟକ, ସଞ୍ଜୟ ଦାସବର୍ମା ଏବଂ ଅଶୋକ ପଣ୍ଡା ଆନେ୍ଦାଳନ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଛନ୍ତି । ଦଳର ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ନିଆଯାଇଥିବା ନିଷ୍ପତ୍ତି ଅନୁଯାୟୀ, ଏମଏମଡିଆର ସଂଶୋଧନ ଆକ୍ଟକୁ ପ୍ରତ୍ୟାହାର ଦାବି ନେଇ ବିଜେଡି ତରଫରୁ ଆସନ୍ତା ୯ ତାରିଖରେ ଲୋକଭବନ ସମ୍ମୁଖରେ ଗଣଧାରଣା ଦିଆଯିବ । ପରେ ଦଳର ପ୍ରତିନିଧିମଣ୍ଡଳୀ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ରାଜ୍ୟପାଳଙ୍କୁ ଏକ ସ୍ମାରପତ୍ର ପ୍ରଦାନ କରିବେ ।
ଏମଏମଡିଆର ସଂଶୋଧନ ଆକ୍ଟକୁ ପ୍ରଥମରୁ ବିରୋଧ କରୁଛନ୍ତି ନବୀନ ପଟ୍ଟନାୟକ । ଓଡ଼ିଶାର ଏହା ସ୍ୱାର୍ଥ ବିରୋଧୀ ବୋଲି ସେ ବୁଝାଇ ସାରିଛନ୍ତି । ଏହି ଆକ୍ଟ ଯୋଗୁଁ ଓଡ଼ିଶାର ବକେୟା ପ୍ରାପ୍ୟ ବାବଦକୁ ୧ ଲକ୍ଷ କୋଟି ଟଙ୍କା ଓ ବାର୍ଷିକ ରାଜସ୍ୱ ବାବଦକୁ ପ୍ରାୟ ୧୨ ହଜାର କୋଟି ଟଙ୍କା ହରାଇବ । ଏକତରଫା ଭାବେ କେନ୍ଦ୍ର ସରକାରଙ୍କ ଦ୍ୱାରା ନିଆଯାଇଥିବା ଏହି ନିଷ୍ପତ୍ତି ଦେଶର ସଂଘୀୟ ବ୍ୟବସ୍ଥା ଉପରେ ଆକ୍ରମଣ । ଏହି ପ୍ରସଙ୍ଗରେ ବିସ୍ତୃତ ଆଲୋଚନା ପାଇଁ ବିଧାନସଭାର ଏକ ସ୍ୱତନ୍ତ୍ର ଅଧିବେଶନ ଡାକିବା ପାଇଁ ରାଜ୍ୟପାଳଙ୍କୁ ଅନୁରୋଧ କରାଯିବ । ସମ୍ବିଧାନର ଧାରା ୨୪୪(୧)ର ସିଡ୍ୟୁଲ୍ ୫ ଅନୁଯାୟୀ ରାଜ୍ୟର ଜନଜାତିମାନଙ୍କର ସ୍ୱାର୍ଥରକ୍ଷା ପାଇଁ ଦାୟିତ୍ୱ ଥିବାରୁ ରାଜ୍ୟପାଳଙ୍କ ହସ୍ତକ୍ଷେପ ଲୋଡ଼ାଯିବ । ଆଗାମୀ ଦିନରେ ଏମଏମଡିଆର ସଂଶୋଧନ ଆକ୍ଟର ପ୍ରତ୍ୟାହାର ଦାବି ନେଇ ବିଜେଡି ପକ୍ଷରୁ ରାଜ୍ୟବ୍ୟାପୀ ବିଭିନ୍ନ ଆନ୍ଦୋଳନାତ୍ମକ କାର୍ଯ୍ୟକ୍ରମ ହାତକୁ ନିଆଯିବ ବୋଲି ବରିଷ୍ଠ ନେତାମାନେ କହିଛନ୍ତି ।
ସେହିଭଳି ଏମଏମଡିଆର ବିରୋଧରେ ସୁପ୍ରିମକୋର୍ଟରେ ଅପିଲ୍ କରିବାକୁ କଂଗ୍ରେସ ନିଷ୍ପତ୍ତି ନେଇଛି । ପିସିସି ସଭାପତି ଭକ୍ତ ଚରଣ ଦାସ ଆଜି ଏହି ସୂଚନା ଦେଇଛନ୍ତି । ଏମଏମଡିଆର ସଂଶୋଧନ ପ୍ରତ୍ୟାହାର ନ ହେଲା ପର୍ଯ୍ୟନ୍ତ ଦଳର ଆନ୍ଦୋଳନ ଜାରି ରହିବ ବୋଲି ସେ କହିଛନ୍ତି ।
ସେପଟେ ବିଜେପି କିନ୍ତୁ ଏମଏମଡିଆର ସଂଶୋଧନ ସମର୍ଥନରେ ଶତମୁଖ ହୋଇଛି । କଟକରେ ଅନୁଷ୍ଠିତ ଦୁଇଦିନିଆ ରାଜ୍ୟ କାର୍ଯ୍ୟକାରିଣୀ ବୈଠକରେ ଏହାକୁ ସ୍ୱାଗତ କରାଯାଇଛି । ଓଡ଼ିଶାର ହିତ ପାଇଁ ଏହା ଉଦ୍ଦିଷ୍ଟ ବୋଲି କୁହାଯାଇଛି । ବିଜେଡି ଓ କଂଗ୍ରେସ ଏମଏମଡିଆର ସଂଶୋଧନକୁ ବିରୋଧ କରି ଭ୍ରମାତ୍ମକ ତଥ୍ୟ ଦେଉଛନ୍ତି ବୋଲି ସମାଲୋଚନା କରାଯାଇଛି ।
