ଭୁବନେଶ୍ୱର: ଆଗକୁ ବିହାର ନିର୍ବାଚନ । ଏହାର ଫଳାଫଳ ମୋଦୀ ସରକାରଙ୍କ ଭବିଷ୍ୟତ ନିର୍ଦ୍ଧାରଣ କରିବାକୁ ଯାଉଥିଲା ବେଳେ ଓଡ଼ିଆ ପୁଅ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ମିଳିଛି ଏହି ବଡ଼ ଦାୟିତ୍ୱ । ବିହାର ବିଧାନସଭା ନିର୍ବାଚନ ପ୍ରଭାରୀ ଭାବେ ସେ ନିଯୁକ୍ତି ପାଇଛନ୍ତି । ତାଙ୍କୁ ସହାୟତା କରିବେ ସିଆର ପଟେଲ ଓ କେଶବ ମୌର୍ଯ୍ୟା । ଏହି ଦୁଇଜଣ ସହପ୍ରଭାରୀ ଭାବେ କାର୍ଯ୍ୟ କରିବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ୍ ଶାହାଙ୍କ ସହ ଆଲୋଚନା ପରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା ଏହି ନିଯୁକ୍ତି ଦେଇଛନ୍ତି ।
ମୋଦୀ ସରକାରରେ ଜଣେ ଟାଣୁଆ ଏବଂ ଦକ୍ଷ ମନ୍ତ୍ରୀ ଭାବେ ଧର୍ମେନ୍ଦ୍ର ପ୍ରଧାନ ତାଙ୍କ ସ୍ଥିତି ବଜାୟ ରଖିଥିଲା ବେଳେ ଜଣେ ଦୃଢ଼ ସଂଗଠକ ଭାବେ ମଧ୍ୟ ତାଙ୍କର ସ୍ୱତନ୍ତ୍ର ପରିଚୟ ରହିଛି । ବଡ଼ ରାଜ୍ୟର ନିର୍ବାଚନ ପରିଚାଳନାରେ ସେ ସିଦ୍ଧହସ୍ତ । ଯାହା ବାରମ୍ବାର ପ୍ରମାଣିତ ହୋଇଛି । ତୃଣମୂଳସ୍ତରରୁ ସଂଗଠନ ପରିଚାଳନାରେ ତାଙ୍କର ବିଶେଷ ଦକ୍ଷତା ଦଳ ପାଇଁ ଉପଯୋଗୀ ହୋଇ ଆସୁଛି ।
ନିକଟରେ ହରିୟାଣା ନିର୍ବାଚନ ଗୁରୁଦାୟିତ୍ୱକୁ ଧର୍ମେନ୍ଦ୍ର ସୂଚାରୁ ରୂପେ ସମ୍ଭାଳିଥିଲେ । ତାଙ୍କରି ରଣନୀତି ଯୋଗୁଁ କଂଗ୍ରେସ ସେଠାରେ ଧୂଳି ଚାଟିଥିଲା । ତାହା ପୂର୍ବରୁ ଉତ୍ତର ପ୍ରଦେଶ ନିର୍ବାଚନ ପ୍ରଭାରୀ ଭାବେ ତାଙ୍କର କାର୍ଯ୍ୟ ଅତୀବ ପ୍ରଶଂସନୀୟ ଥିଲା । ମଧ୍ୟପ୍ରଦେଶ, କର୍ଣ୍ଣାଟକ ନିର୍ବାଚନ ପ୍ରଚାରରେ ତାଙ୍କର ବଡ଼ ଭୂମିକା ଥିଲା ।
ଆଗାମୀ ନଭେମ୍ବର ମାସରେ ହେବାକୁ ଥିବା ବିହାର ବିଧାନସଭା ନିର୍ବାଚନ ପରିଚାଳନାର ଗୁରୁଦାୟିତ୍ୱ ଦେଇ କେନ୍ଦ୍ରୀୟ ନେତୃତ୍ୱ ଧର୍ମେନ୍ଦ୍ରଙ୍କ ଉପରେ ଭରସା ଅତୁଟ ରଖିଛନ୍ତି । ଏହାପୂର୍ବରୁ ୨୦୧୦ ଏବଂ ୨୦୧୫ ମସିହା ବିହାର ବିଧାନସଭା ନିର୍ବାଚନା ପରିଚାଳନା ଦାୟିତ୍ୱ ମଧ୍ୟ ସେ ତୁଲାଇଥିଲେ ।
ଆସନ୍ତା ବର୍ଷରେ ହେବାକୁ ଥିବା ତାମିଲନାଡୁ ଏବଂ ପଶ୍ଚିମବଙ୍ଗ ବିଧାନସଭା ନିର୍ବାଚନ ପାଇଁ ମଧ୍ୟ ପ୍ରଭାରୀ ନିଯୁକ୍ତି ହୋଇଛନ୍ତି । କେନ୍ଦ୍ରାପଡ଼ା ସାଂସଦ ତଥା ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କୁ ତାମିଲନାଡୁ ନିର୍ବାଚନ ପ୍ରଭାରୀ ଏବଂ ଭୂପେନ୍ଦ୍ର ଯାଦବଙ୍କୁ ପଶ୍ଚିମବଙ୍ଗ ନିର୍ବାଚନ ପ୍ରଭାରୀ ଦାୟିତ୍ୱ ମିଳିଛି । ବୈଜୟନ୍ତ ପୂର୍ବରୁ ଦିଲ୍ଲୀ, ଆସାମ ଏବଂ ୟୁପି ବିଧାନସଭା ନିର୍ବାଚନ ପ୍ରଭାରୀ ଭାବେ କାର୍ଯ୍ୟ କରିଥିଲେ ।
