ଭୁୁବନେଶ୍ୱର: ଏଥର ଓଡ଼ିଶାରେ କିଏ ସରକାର ଗଢ଼ିବ? ଷଷ୍ଠ ଥର ପାଇଁ ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ନା ମୁଖ୍ୟମନ୍ତ୍ରୀ ଚେହେରା ବିହୁନେ ବିଜେପି?୨୦୧୯ ଭଳି ଏଥର ମଧ୍ୟ ଉଭୟ ବିଜେଡି ଓ ବିଜେଡି, ରାଜ୍ୟରେ ସରକାର ଗଢ଼ିବା ପାଇଁ ବେଟ୍ ମରାମରି ହେଲେଣି । ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବି ଏଥିରୁ ବାଦ୍ ପଡ଼ିନାହାନ୍ତି ।
ଆଜି ବ୍ରହ୍ମପୁରରେ ଜନସଭାକୁ ସମ୍ବୋଧିତ କରି ଶ୍ରୀ ମୋଦୀ କର୍ମୀମାନଙ୍କୁ ଉତ୍ସାହିତ କରିବାକୁ ବିଭିନ୍ନ କଥା ଶୁଣାଇଥିଲେ । ଓଡ଼ିଶାରେ ପ୍ରଥମ ଥର ପାଇଁ ବିଜେପି କ୍ଷମତାକୁ ଆସି ଡବଲ ଇଞ୍ଜିନ୍ ସରକାର ଗଢ଼ିବ ବୋଲି ସେ ଦୃଢ଼ତାର ସହ କହିଥିଲେ । ଏପରିକି, ମୁଖ୍ୟମନ୍ତ୍ରୀ ଚୟନ ଓ ଶପଥ ଗ୍ରହଣ ସମାରୋହର କାର୍ଯ୍ୟସୂଚୀ ମଧ୍ୟ ଘୋଷଣା କରିଥିଲେ । ଜୁନ୍ ୪ ତାରିଖରେ ବିଜେଡି ସରକାର ଏକ୍ସପାୟାର୍ଡ କରିବ । ଜୁନ୍ ୬ ରେ ବିଜେପି ତା’ର ମୁଖ୍ୟମନ୍ତ୍ରୀଙ୍କ ନାଁ ଘୋଷଣା କରିବ ଏବଂ ଜୁନ୍ ୧୦ରେ ଶପଥ ଗହଣ ସମାରୋହ ହେବ ବୋଲି ପ୍ରଧାନମନ୍ତ୍ରୀ କହିଥିଲେ । ବିଜେପି ସରକାରଙ୍କ ଶପଥ ଗ୍ରହଣ ସମାରୋହରେ ଯୋଗଦେବା ପାଇଁ ବିଜେଡିକୁ ନିମନ୍ତ୍ରଣ ଦେବାକୁ ଆସିଛି ବୋଲି ପ୍ରଧାନମନ୍ତ୍ରୀ ମୋଦୀ କଟାକ୍ଷ କରିଥିଲେ ।
ସେପଟେ କଳାହାଣ୍ଡି ଗସ୍ତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଯାଇଥିବା ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ ଏହାର ଦୃଢ଼ ଜବାବ ଦେଇଛନ୍ତି । ଓଡ଼ିଶାରେ ବିଜେପି ସରକାର ଗଠନ ଦାବିକୁ ନେଇ ସେ କଟାକ୍ଷ କରିବା ସହ ବିଜେଡି ହିଁ ଏକମାତ୍ର ଦଳ ଯେ କି ଲୋକଙ୍କ ଆଶା ଓ ଆକାଂକ୍ଷାକୁ ପୂରଣ କରିବାକୁ ଦିନରାତି ଖଟୁଛି । ଓଡ଼ିଶାବାସୀଙ୍କ ଆଶୀର୍ବାଦରେ ରାଜ୍ୟରେ ଷଷ୍ଟ ଥର ପାଇଁ ନବୀନ ପଟ୍ଟନାୟକଙ୍କ ନେତୃତ୍ୱରେ ସରକାର ଗଠନ କରିବାକୁ ଯାଉଛି । ଆସନ୍ତା ଜୁନ୍ ୯ ତାରିଖ ସାଢ଼େ ୧୧ ରୁ ୧ଟା ମଧ୍ୟରେ ନୂଆ ସରକାରର ଶପଥ ଗ୍ରହଣ ହେବ ବୋଲି ଶ୍ରୀ ପାଣ୍ଡିଆନ୍ କହିଛନ୍ତି ।
ପ୍ରଧାନମନ୍ତ୍ରୀଙ୍କ ମନ୍ତବ୍ୟ ଉପରେ ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରତିକ୍ରିୟା ରଖିଛନ୍ତି । କଳାହାଣ୍ଡି ଗସ୍ତରୁ ହେଲିକପ୍ଟରରେ ଫେରିବା ବାଟରେ ଶ୍ରୀ ପାଣ୍ଡିଆନ୍ ମୁଖ୍ୟମନ୍ତ୍ରୀଙ୍କୁ ଏହା ଅବଗତ କରିଥିଲେ । ବିଜେପି ଏଥର ସରକାର ଗଠନ କରିବେ ବୋଲି ଦାବି କରୁଥିବା ପାଣ୍ଡିଆନ୍ କହିଥିଲେ । ଏହାର ଉତ୍ତରରେ ମୁଖ୍ୟମନ୍ତ୍ରୀ ତାତ୍ସଲ୍ୟ କରି କହିଥିଲେ ଯେ ବହୁତ ଦିନ ହେଲା ବିଜେପି ଦିନରେ ସ୍ୱପ୍ନ ଦେଖିଛନ୍ତି ।
ସୂଚନାଥାଉକି, ୨୦୧୯ ନିର୍ବାଚନରେ ମଧ୍ୟ ଅନୁରୂପ ଅବସ୍ଥା ଦେଖିବାକୁ ମିଳିଥିଲା । ରାଜ୍ୟରେ ବିଜେପି ସରକାରର ଶପଥ ଉତ୍ସବରେ ଯୋଗଦେବାକୁ ସେ ନିର୍ବାଚନ ପ୍ରଚାର ଭାଷଣ ବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଛିଗୁଲେଇଥିଲେ । ହେଲେ ଫଳାଫଳ ଆସିଲା ବେଳେ ବିଜେପି ମାତ୍ର ୨୩ ଟି ଆସନ ପାଇଲା । ବିଜେଡି ୧୧୩ ଟି ଆସନ ପାଇଁ ସରକାର ଗଠନ କଲା ।
