ଭୁବନେଶ୍ୱର: ବିଜେଡି ଦୁଇଟି ଆସନ ପାଇଁ ରାଜ୍ୟସଭା ପ୍ରାର୍ଥୀ ଘୋଷଣା କରିବା ପରେ ତୃତୀୟ ଆସନ ଘୋଷଣା ନ କରିବା ପଛରେ ବଡ ସସପେନ୍ସ ଥିଲା । ବିଜେଡି ହାତରେ ତୃତୀୟ ଆସନଟି ଥିଲେ ମଧ୍ୟ କ’ଣ ପାଇଁ ପ୍ରାର୍ଥୀ ଘୋଷଣା କଲା ନାହିଁ ଏବଂ ଏଥିରେ କିଛି ବଡ଼ ଖେଳ ଅଛି ବୋଲି ‘ମିଡ ଡେ ଓଡ଼ିଶା’ ପ୍ରଥମେ ଖବର କରିଥିଲା । କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଆଜି ଓଡ଼ିଶା ଆସୁଥିବା ଏବଂ ସ୍ଥାନୀୟ ବିଜେପି ନେତା ଏବଂ ବିଧାୟକମାନଙ୍କୁ ପାର୍ଟି ଅଫିସରେ ହାଜିରା ଦେବାକୁ ଉପରୁ ନିର୍ଦ୍ଦେଶ ଆସିଥିବା ବି ଆମେ ବିଶ୍ୱସ୍ତ ସୂତ୍ରର ସୂଚନା ଆଧାରରେ ଖବର ପ୍ରକାଶ କରିଥିଲୁ । ଏହା ସତ ବୋଲି ଆଜି ପ୍ରମାଣିତ ହୋଇଛି ।
ଅଶ୍ୱିନୀ ବୈଷ୍ଣବଙ୍କୁ ଓଡିଶାରୁ ରାଜ୍ୟସଭା ପ୍ରାର୍ଥୀ ଭାବେ ବିଜେପି ଆଜି ଘୋଷଣା କରିଛି । ଦଳର କେନ୍ଦ୍ରୀୟ ନିର୍ବାଚନ କମିଟି ପକ୍ଷରୁ ଏହାର ବିଜ୍ଞପ୍ତି ପ୍ରକାଶ ପାଇଛି । ୨୦୧୯ ମସିହାରେ ସେ ଓଡ଼ିଶାରୁ ବିଜେପିର ରାଜ୍ୟସଭା ପ୍ରାର୍ଥୀ ହୋଇଥିଲେ ଏବଂ ବିଜେଡି ହାତରେ ଏହି ଆସନଟି ଥିବା ସତ୍ତ୍ୱେ ଅଶ୍ୱିନୀଙ୍କୁ ସମର୍ଥନ କରିବାରୁ ସେ ରାଜ୍ୟସଭା ଯାଇଥିଲେ । ଏବେ ତାହାର ପୁନରୁବୃତ୍ତି ଘଟିବାକୁ ଯାଉଛି । ବିଜେଡି ପକ୍ଷରୁ ବିଧିବଦ୍ଧ ଭାବେ ତାଙ୍କୁ ସମର୍ଥନ ଘୋଷଣା ବାକି ଥିଲେ ମଧ୍ୟ ବିଜେଡି ସମର୍ଥନରେ ସେ ରାଜ୍ୟସଭା ଯିବା ନିଶ୍ଚିତ ହୋଇଯାଇଛି । ଆସନ୍ତାକାଲି ପ୍ରାର୍ଥୀପତ୍ର ଦାଖଲର ଶେଷଦିନରେ ସେ ନାମାଙ୍କନ ପତ୍ର ଦାଖଲ କରିବେ । ପୂର୍ବ କାର୍ଯ୍ୟସୂଚୀ ଅନୁଯାୟୀ ଶ୍ରୀ ବୈଷ୍ଣବ ଆଜି ଭୁବନେଶ୍ୱରରେ ପହଞ୍ଚୁଛନ୍ତି ।
ସୂଚନାଯୋଗ୍ୟ ଯେ ୨୦୧୯ ମସିହାରେ ଓଡ଼ିଶାରୁ ତିନୋଟି ରାଜ୍ୟସଭା ଆସନ ଖାଲି ହୋଇଥିଲା । ଏହି ତିନୋଟି ଯାକ ଆସନ ବିଜେଡି ହାତରେ ଥିଲା । ତେବେ ଜୁନ୍ ୨୧ ତାରିଖ ସଂଧ୍ୟାରେ ମୁଖ୍ୟମନ୍ତ୍ରୀ ତିନୋଟି ଯାକ ରାଜ୍ୟସଭା ଆସନ ପାଇଁ ପ୍ରାର୍ଥୀ ଭାବେ ଅମର ପଟ୍ଟନାୟକ, ସସ୍ମିତ୍ ପାତ୍ର ଏବଂ ଅଶ୍ୱିନୀ ବୈଷ୍ଣବଙ୍କ ନାଁ ଘୋଷଣା କରିଥିଲେ । ସେତେବେଳକୁ ଶ୍ରୀ ବୈଷ୍ଣବ କୌଣସି ଦଳରେ ଯୋଗଦେଇ ନ ଥିଲେ । ତେବେ ମୁଖ୍ୟମନ୍ତ୍ରୀଙ୍କ ପ୍ରାର୍ଥୀ ଘୋଷଣାର ୨୦ ମିନିଟ୍ ପୂର୍ବରୁ ବିଜେପିର ଅଫିସିଆଲ୍ ଟୁଇଟର ହାଣ୍ଡଲ୍ ରେ ବୈଷ୍ଣବଙ୍କୁ ବିଜେପି ପ୍ରାର୍ଥୀ ଭାବେ ଘୋଷଣା କରାସରିଥିଲା । ଫଳରେ ବୈଷ୍ଣବ କାହାର ପ୍ରାର୍ଥୀ ବୋଲି କେହି କିଛି ବୁଝିପାରିଲେ ନାହିଁ । କିଛି ସମୟ ପରେ ମୁଖ୍ୟମନ୍ତ୍ରୀ ପୁଣି ଥରେ ଗଣମାଧ୍ୟମକୁ ଡାକି ଏକ ସ୍ପଷ୍ଟୀକରଣ ଦେଇଥିଲେ ।
କହିଥିଲେ, ଅଶ୍ୱିନୀ ବୈଷ୍ଣବଙ୍କ ପ୍ରାର୍ଥୀତ୍ୱକୁ ବିଜେଡି ସମର୍ଥନ କରୁଛି । ଏ ନେଇ ପ୍ରଧାନମନ୍ତ୍ରୀ ମୋଦୀ ଏବଂ ଗୃହମନ୍ତ୍ରୀ ଶାହଙ୍କ ସହ ସେ କଥା ହୋଇଛନ୍ତି ବୋଲି ମୁଖ୍ୟମନ୍ତ୍ରୀ ଜଣାଇଲା ପରେ ଦ୍ୱନ୍ଦ ଦୂର ହୋଇଥିଲା । ଅର୍ଥାତ୍ ବିଜେଡି ହାତରେ ତିନୋଟି ଯାକ ଆସନ ଥିଲେ ମଧ୍ୟ ଶୀର୍ଷ ନେତୃତ୍ୱସ୍ତରରେ ବୁଝାମଣା ହୋଇ ବିଜେପିକୁ ବିଜେଡି ଗୋଟେ ରାଜ୍ୟସଭା ଆସନ ଛାଡ଼ି ଦେଲା ।
ଯାହାର ଏବେ ପୁନରାବୃତ୍ତି ଘଟିବାକୁ ଯାଉଛି ।
