ସରକାରଙ୍କୁ ମନେଇବାରେ ଫେଲ୍ ମାରିଲା ‘ସର୍କାର’ !

ଭୁବନେଶ୍ୱର: ଡିଏନ୍ ଗ୍ରୁପ୍ ଅଧ୍ୟକ୍ଷ ଜଗଦୀଶ ପ୍ରସାଦ ନାୟକ ଗଣମାଧ୍ୟମ ଜଗତରେ ପ୍ରବେଶ କରିଛନ୍ତି । ତାଙ୍କ ମାଲିକାନାରେ ‘ସର୍କାର’ ନାମରେ ଏକ ଦୈନିକ ସମ୍ବାଦପତ୍ର ଏବଂ ଡିଜିଟାଲ୍ ମିଡିଆର ଆଜି ଶୁଭାରମ୍ଭ ହୋଇଛି । କଳିଙ୍ଗ ବିହାରସ୍ଥିତ ଡିଏନ ରେଗାଲିଆ ମଲ୍ ଠାରେ ଥିବା ହୋଟେଲ୍ ଭିଭାନ୍ତାରେ ଏଥିପାଇଁ ଆଡ଼ମ୍ବରପୂର୍ଣ୍ଣ ଉତ୍ସବ ଆୟୋଜିତ ହୋଇଥିଲେ ମଧ୍ୟ କେବଳ ପ୍ରଭୁ ଚାୱଲାଙ୍କ ବ୍ୟତୀତ ପୂର୍ବ ସ୍ଥିରୀକୃତ ଅନ୍ୟ ଅତିଥିମାନେ ଆସି ନ ଥିଲେ । ଶେଷ ମୁହୂର୍ତ୍ତରେ କୌଣସି କାରଣରୁ ସେମାନେ କାର୍ଯ୍ୟକ୍ରମରୁ ଦୂରେଇ ଯାଇଥିଲେ । ସେମାନଙ୍କ ଅନୁପସ୍ଥିତିରେ ଇଷ୍ଟର୍ଣ୍ଣ ମିଡିଆ ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ ଏବଂ ପୂର୍ବତନ ମୁଖ୍ୟ ଶାସନ ସଚିବ ବିଜୟ କୁମାର ପଟ୍ଟନାୟକ ଅତିଥି ହୋଇ କାମ ଚଳେଇଥିଲେ ।

‘ସର୍କାର’ର ଲୋକାର୍ପଣ କାର୍ଯ୍ୟକ୍ରମରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ମୁଖ୍ୟ ଅତିଥି ଭାବେ ଯୋଗଦେବାର ଥିଲା । ମୁଖ୍ୟ ଉଦଘାଟକ ଭାବେ ମନମୋହନ ସାମଲ, ମୁଖ୍ୟବକ୍ତା ଭାବେ ପୃଥ୍ୱୀରାଜ ହରିଚନ୍ଦନ, ସମ୍ମାନିତ ଅତିଥି ଭାବେ କୃଷ୍ଣଚନ୍ଦ୍ର ମହାପାତ୍ର ଏବଂ ସ୍ୱତନ୍ତ୍ର ନିମନ୍ତ୍ରିତ ଅତିଥି ଭାବେ ପ୍ରଭୁ ଦୟାଲ୍ ଚାୱଲା ଯୋଗଦେବେ ବୋଲି ନିମନ୍ତ୍ରଣପତ୍ର ଛପାଯାଇଥିଲା । ଏଥିରେ ଯୋଗଦାନ କରି ସମାରୋହକୁ ସାଫଲ୍ୟ ମଣ୍ଡିତ କରିବା ପାଇଁ ‘ସର୍କାର’ ର ପ୍ରତିଷ୍ଠାତା ସମ୍ପାଦକ ଜଗଦୀଶ ପ୍ରସାଦ ନାୟକ ଅତିଥିମାନଙ୍କୁ ନିମନ୍ତ୍ରଣ କରିଥିଲେ ।

ଦୁଇଦିନ ହେଲା ଏହି ନିମନ୍ତ୍ରଣପତ୍ର ସୋସିଆଲ୍ ମିଡିଆରେ ଖୁବ୍ ଜୋର୍ ରେ ବୁଲୁଥିଲା । ଡିଏନ୍ ମାଲିକଙ୍କ ଖବରକାଗଜ ଶୁଭାରମ୍ଭରେ ବିଜେପି ରାଜ୍ୟ ସଭାପତିଙ୍କ ସମେତ ଉପମୁଖ୍ୟମନ୍ତ୍ରୀ ଏବଂ ଅନ୍ୟ ଦୁଇ ମନ୍ତ୍ରୀଙ୍କର ଯୋଗଦାନକୁ ନେଇ ନାନା ଚର୍ଚ୍ଚା ଲାଗି ରହିଲା । ଏହି ଖବରକାଗଜ ପଛରେ ରାଜ୍ୟ ସରକାରଙ୍କ ଆଶୀର୍ବାଦ ଥିବା ସମସ୍ତେ ଧରିନେଲେ । ଖାଲି ସେତିକି ନୁହେଁ, ଏଥିରେ ବିଜେପିର ଗୋଷ୍ଠୀ ସମୀକରଣର ମଧ୍ୟ ଆଲୋଚନା ହେଲା ।

ବିଶ୍ୱସ୍ତ ସୂତ୍ରର ଖବର ଅନୁଯାୟୀ, ଏହିସବୁ ଚର୍ଚ୍ଚା ଆଲୋଚନାକୁ ନେଇ ରାଜ୍ୟ ବିଜେପିରେ ଚାପା ଗୁଞ୍ଜରଣ ସୃଷ୍ଟି ହୋଇଥିଲା । ରାଜ୍ୟ ସରକାର ଏଥିରେ ବଦନାମ ହେବେ ବୋଲି ବହୁ ନେତା ଆଶଙ୍କା ପ୍ରକାଶ କରିଥିଲେ । ପୂର୍ବ ସରକାରଙ୍କ ଅତି ନିକଟତର ଥିବା ଏହି ବିଶିଷ୍ଟ ଉଦ୍ୟୋଗୀଙ୍କୁ ବିଜେପି ସରକାରଙ୍କ ସହ ନୂଆ ବନ୍ଧନରେ ବାନ୍ଧିବାକୁ ଜନୈକ ସାଂସଦଙ୍କର ମଧ୍ୟସ୍ଥି ଭୂମିକାକୁ ଦଳର ବରିଷ୍ଠ ନେତାମାନେ ସମାଲୋଚନା କରିଥିଲେ । ଦଳୀୟ ନେତାଙ୍କ ଏହି ପ୍ରତିକ୍ରିୟା ଖୋଦ୍ ମୁଖ୍ୟମନ୍ତ୍ରୀ ମୋହନ ମାଝୀଙ୍କ କାନରେ ବି ପଡ଼ିଥିଲା ବୋଲି କୁହାଯାଉଛି ।

ଯାହା ବି ହେଉ, ‘ସର୍କାର’ ଖବର କାଗଜର ଶୁଭ ଉନ୍ମୋଚନ ଉତ୍ସବରୁ ଶେଷ ମୁହୂର୍ତ୍ତରେ ଦୂରେଇ ଯାଇଥିଲେ ମନମୋହନ ସାମଲ, ପ୍ରଭାତୀ ପରିଡ଼ା, ପୃଥ୍ୱୀରାଜ ହରିଚନ୍ଦନ ଏବଂ କୃଷ୍ଣଚନ୍ଦ୍ର ମହାପାତ୍ର । ସେମାନେ କାର୍ଯ୍ୟକ୍ରମରେ ଯୋଗଦେବେ ନାହିଁ ବୋଲି ଦୁଇ ଘଣ୍ଟା ପୂର୍ବରୁ ଜଣାଇ ଦିଆଗଲା । ସେମାନଙ୍କୁ ମନାଇବାକୁ ନୂଆ ଖବରକାଗଜ ସଂସ୍ଥା ପକ୍ଷରୁ ବହୁ ଉଦ୍ୟମ ହୋଇଥିଲା । ମାତ୍ର ତାହା ଫେଲ୍ ମାରିଥିଲା । ଶେଷରେ ପ୍ରଭୁ ଚାୱଲାଙ୍କ ସହ କାର୍ଯ୍ୟକ୍ରମରେ ଅତିଥି ଭାବେ ଯୋଗଦେବାକୁ ସୌମ୍ୟ ରଂଜନ ପଟ୍ଟନାୟକ ଏବଂ ବିଜୟ ପଟ୍ଟନାୟକଙ୍କୁ ରାଜି କରାଯାଇଥିଲା ।

ବିଜୟ ପଟ୍ଟନାୟକ ତାଙ୍କ ଭାଷଣରେ ‘ସର୍କାର’ ଖବରକାଗଜରୁ ବାପା ମାଆ ପରିଚୟ ହଟାଇ ବିଶ୍ୱସନୀୟତା ରଖିବାକୁ ପରାମର୍ଶ ଦେଇଥିବା ବେଳେ ସୌମ୍ୟ ପଟ୍ଟନାୟକ, ଜଗଦୀଶ ନାୟକଙ୍କୁ ‘ସର୍କାର’ ଖବରକାଗଜର ଧର୍ମବାପା ବୋଲି କହିଥିଲେ । ସେ ତାଙ୍କ ଭାଷଣରେ ଏୟା ବି କହିଥିଲେ ଯେ ସମ୍ବାଦପତ୍ର କେବେ ବି ନିରପେକ୍ଷ ନୁହେଁ । ହେଲେ ପକ୍ଷ ରଖିବାକୁ ଦମ୍ ରହିବା ଦରକାର । ଏକ ଖବରକାଗଜକୁ ବଞ୍ଚେଇ ବଢ଼େଇବା ବହୁତ କଠିନ କାମ ବୋଲି ସେ କହିଥିଲେ ।