ଭୁବନେଶ୍ୱର: ଏଠି ସରକାରରେ ମା’ ବାପା ନାହାନ୍ତି । କିଛି କାମ ହଉନି । ପ୍ରଶାସନ ପଙ୍ଗୁ ହୋଇଯାଇଛି । ମନ୍ତ୍ରୀମାନେ ଦୁର୍ନୀତିରେ ବୁଡ଼ିଛନ୍ତି । ଚାରିଆଡ଼େ ସରକାରଙ୍କ ନିନ୍ଦା, ଅପବାଦ । ଲୋକଙ୍କୁ ସାମନା କରିବାକୁ ଆଉ ସାହାସ ନାହିଁ । ଏମିତି ଚାଲିଲେ ପଞ୍ଚାୟତ ନିର୍ବାଚନରେ ସଫା ହୋଇଯିବା ଥୟ । ଆମକୁ ଭଗବାନ ବି ବଞ୍ଚାଇ ପାରିବେନି ।
ଗତକାଲି ବିଜେପି ବିଧାୟକ ଦଳ ବୈଠକରେ ଏମିତି ଭାବେ ନିଜର ଉଦବେଗ ଝାଡ଼ିଥିଲେ ଅନେକ ସଦସ୍ୟ । ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ରାଜ୍ୟ ସଭାପତି ମନମୋହନ ସାମଲଙ୍କୁ ପ୍ରାୟ ଦୁଇଘଣ୍ଟା କାଳ ପ୍ରଶ୍ନବାଣରେ ଧୋଇଥିଲେ ।
ବିଧାନସଭାର ୫୪ ନଂ ପ୍ରକୋଷ୍ଠରେ ମନମୋହନଙ୍କ ଅଧ୍ୟକ୍ଷତାରେ ବିଧାନସଭା ରଣନୀତି ବୈଠକ ବସିଥିଲା । ବିରୋଧୀ ଦଳକୁ କେମିତି ମୁକାବିଲା କରାଯିବ ତାହାର ଏକ ଖସଡ଼ା ପଢ଼ାଯାଇ ଔପଚାରିକତା ପୂରଣ କରାଯାଇଥିଲା । ମାତ୍ର ଅସଲ ଆଲୋଚନା ହୋଇଥିଲା ସରକାରରେ ଚାଲିଥିବା ଅରାଜକତା, ଦୁର୍ନୀତି, ଭ୍ରଷ୍ଟାଚାର ବିରୋଧରେ ।
ବିଶ୍ୱସ୍ତ ସୂଚନା ଅନୁଯାୟୀ, ସରକାରୀ ଦଳର ଅନେକ ସଦସ୍ୟ ନିଜ ନିଜ ଅଞ୍ଚଳର ବିଭିନ୍ନ ପ୍ରସଙ୍ଗ ଉଲ୍ଲେଖ କରି ସରକାରଙ୍କ ଅପାରଗତା ଆଡ଼କୁ ଅଙ୍ଗୁଳି ଉଠାଇଥିଲେ । ଗଭର୍ଣ୍ଣାସ୍ କୋଲାପ୍ସ ହୋଇଯାଇଥିବା ପ୍ରାୟ ସମସ୍ତଙ୍କର ଅଭିଯୋଗ ଥିଲା । ଟିଟିଲାଗଡ଼ ବିଧାୟକ ନବୀନ ଜୈନ, କଣ୍ଟାବାଂଝୀ ବିଧାୟକ ଲକ୍ଷ୍ମଣ ବାଗ ପ୍ରମୁଖ ସରକାରଙ୍କ କାର୍ଯ୍ୟକଳାପକୁ ନେଇ ଭୀଷଣ ଗାଳି କରିଥିଲେ । ପଶ୍ଚିମ ଓଡ଼ିଶା ଏବଂ ଦକ୍ଷିଣ ଓଡ଼ିଶାର ଅଧିକାଂଶ ବିଧାୟକ ସରକାରଙ୍କ କାର୍ଯ୍ୟଧାରାରେ ଅସନ୍ତୋଷ ପ୍ରକାଶ କରିବା ସହ ଆଗାମୀ ପଞ୍ଚାୟତ ନିର୍ବାଚନ ପାଇଁ ପ୍ରମାଦ ଗଣିଥିଲେ । ଖୋଦ୍ ରାଜଧାନୀରେ ଶାସକ ଦଳର ଛତ୍ରଛାୟାରେ ମାଫିଆ ମାନଙ୍କ ଦୌରାତ୍ମ୍ୟକୁ ନେଇ କିଛି ବିଧାୟକ ଉଦବେଗ ପ୍ରକାଶ କରିଥିଲେ । ଏମିତି ଚାଲିଲେ ଆଗମୀ ପଞ୍ଚାୟତ ନିର୍ବାଚନରେ ସଫା ହୋଇଯିବା ବୋଲି ଆଶଙ୍କା କରିଥିଲେ ।
ପୂର୍ତ୍ତମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଉପରେ ବିଧାୟକମାନେ ବେଶୀ ରାଗ ଝାଡ଼ିଥିଲେ । ପୂର୍ତ୍ତ ବିଭାଗକୁ ସେ ବରବାଦ କରିଦେଲେଣି ଏବଂ ବିଭାଗ ଯାବତୀୟ କେଳେଙ୍କାରୀର ଗନ୍ତାଘର ହୋଇଛି ବୋଲି ସେମାନେ ଅଭିଯୋଗ କରିଥିଲେ । ଟେଣ୍ଡର ହୋଇ ଗୋଟେ କାମ ହେଲା ପରେ ତାହା ଅଧାରୁ ବାତିଲ ହେବା ଏବଂ ନୂଆ ଲୋକଙ୍କୁ ସେହି ଟେଣ୍ଡର ଧରାଇବାର ବିଚିତ୍ର ଧାରା ଆରମ୍ଭ ହୋଇଛି । ଏଥିରେ କିକ୍ ବ୍ୟାକ୍ ଚାଲିଥିବା କହି କିଛି ବିଧାୟକ ପ୍ରବଳ ବର୍ଷିଥିଲେ । ଏହାଦ୍ୱାରା ସେମାନେ ଲୋକଙ୍କ ଆକ୍ରୋଶର ଶିକାର ହେଉଛନ୍ତି ।
ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ମନ୍ତ୍ରୀ ସୂରଜ ସୂର୍ଯ୍ୟବଂଶୀ ଏବଂ ନିତ୍ୟାନନ୍ଦ ଗଣ୍ଡଙ୍କୁ ମଧ୍ୟ ପ୍ରବଳ ଗାଳି ପଡ଼ିଥିଲା । ପିଲାଙ୍କ ପାଠ୍ୟପୁସ୍ତକ ତ୍ରୁଟି ଭଳି ଅକ୍ଷମଣୀୟ ଅପରାଧର ମୁଖ୍ୟ କାର୍ପଟଦାର ନିତ୍ୟାନନ୍ଦ ଗଣ୍ଡଙ୍କୁ ସରକାର ସୁରକ୍ଷା ଦେବାକୁ ଅଧିକାଂଶ ବିଧାୟକ ନାପସନ୍ଦ କରିଥିଲେ । ଏମଏମଡିଆରକୁ ସମର୍ଥନ ନେଇ ଅନେକ ବିଧାୟକ ନାକ ଟେକିଥିଲେ ।
ଶାସକ ଦଳର ବିିଧାୟକମାନେ ସେମାନଙ୍କ ଅସନ୍ତୋଷ ଓ ରାଗ ଝାଡୁଥିଲା ବେଳେ ମୋହନ-ମନମୋହନ ଯୋଡିଙ୍କ ମୁହଁ ବିଷର୍ଣ୍ଣ ହୋଇଯାଇଥିବା ବିଧାୟକଙ୍କ ସୂତ୍ରରୁ ଜଣାପଡ଼ିଛି । ବିରୋଧୀ ଦଳକୁ ସାମନା କରିବାକୁ ବିଧାୟକମାନେ ପ୍ରସ୍ତୁତ ହେବାକୁ ଉଭୟ ପରାମର୍ଶ ଦେଇ ବିଧାୟକମାନଙ୍କ ଅସନ୍ତୋଷକୁ ବାଆଁରେଇବାକୁ ଚେଷ୍ଟା କରିଥିଲେ । ବିଧାୟକମାନଙ୍କର ପ୍ରଶ୍ନର ଜବାବ ଦେବାକୁ ସେମାନେ ସକ୍ଷମ ହୋଇ ନ ଥିଲେ ବୋଲି ଉପକୂଳ ଅଞ୍ଚଳର ଜଣେ ବିଧାୟକଙ୍କ ସୂତ୍ରରୁ ଜଣାପଡ଼ିଛି ।
ଉକ୍ତ ବୈଠକରେ ଦୁଇ ଉପମୁଖ୍ୟମନ୍ତ୍ରୀ, ସମସ୍ତ ମନ୍ତ୍ରୀ ଓ ବିଧାୟକଙ୍କ ସମେତ ଦଳର ପ୍ରଭାରୀ ବିଜୟ ପାଲ ସିଂହ ତୋମାର, ଦଳର ସାଧାରଣ ସମ୍ପାଦକ(ସଂଗଠନ) ମାନସ ମହାନ୍ତି ଉପସ୍ଥିତ ଥିଲେ ।
ସୂଚନାଥାଉକି, ନିକଟରେ ଦଳର ବ୍ରହ୍ମପୁର ସାଂସଦ ଡ. ପ୍ରଦୀପ ପାଣିଗ୍ରାହୀ, ବଲାଙ୍ଗୀର ସାଂସଦ ସଙ୍ଗୀତା ସିଂହଦେଓ ଏବଂ ନବରଙ୍ଗପୁର ବଳଭଦ୍ର ମାଝୀ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ସରକାରଙ୍କ ନିକମାପଣିଆ ପଦାକୁ ଆଣିଥିଲେ । ନିଜ ନିଜ ଅଞ୍ଚଳରେ ବିକାଶମୂଳକ କାର୍ଯ୍ୟ ଧିମା ହୋଇଯାଇଥିବା ନେଇ ଅସନ୍ତୋଷ ପ୍ରକାଶ କରି ବିଭାଗୀୟ ମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ ।
ଏହା ପରେ ଦଳର ଚିକିଟି ବିଧାୟକ ମନୋରଞ୍ଜନ ଦ୍ୟାନସାମନ୍ତରାୟ ଏବଂ ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକ ନିଜ ଅଞ୍ଚଳର ସମସ୍ୟା ନେଇ ରାଜ୍ୟ ସରକାରଙ୍କ ପାଖରୁ ନିରାଶ ହେଲା ପରେ ସିଧା ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁଙ୍କୁ ଚିଠି ଲେଖିଥିଲେ । ନିଜ ସରକାରଙ୍କ ଉପରୁ ଦଳୀୟ ବିଧାୟକଙ୍କ ଭରସା ତୁଟିବାର ଏହାଠାରୁ ବଡ଼ ଉଦାହରଣ କିଛି ନ ଥାଇପାରେ ବୋଲି ଚର୍ଚ୍ଚା ହେଉଛି ।
