ଭୁବନେଶ୍ୱର: ତୃତୀୟ ଥର ପାଇଁ ନରେନ୍ଦ୍ର ମୋଦୀଙ୍କୁ ପ୍ରଧାନମନ୍ତ୍ରୀ କରିବାକୁ ପଡ଼ିବ । ଏଥିପାଇଁ ବିଜେପି ଆଗରେ ଅନେକ ଚାଲେଂଜ୍ ଅଛି । ମାତ୍ର କୌଣସି ସୁଯୋଗକୁ ହାତଛଡ଼ା କରିବାକୁ ଦିଆଯିବ ନାହିଁ । ଆଗାମୀ ନିର୍ବାଚନକୁ କର ବ। ମର ପରିସ୍ଥିତି ବୋଲି ଗ୍ରହଣ କରି ଆଗକୁ ବଢ଼ିବାକୁ ପଡ଼ିବ । ପୂର୍ବ ଓ ଉତ୍ତର-ପୂର୍ବାଞ୍ଚଳର ୧୨ଟି ରାଜ୍ୟର ଦଳୀୟ ପଦାଧିକାରୀମାନଙ୍କୁ ନେଇ ଆସାମର ଗୌହାଟୀଠାରେ ଆଜି ଅନୁଷ୍ଠିତ ବୈଠକରେ ସ୍ପଷ୍ଟ ଭାବେ ଏହି ବାର୍ତ୍ତା ଦିଆଯାଇଛି ।
ଦିନ ତମାମ ବୈଠକରେ ଫୋକସ୍ ପଏଣ୍ଟ ଥିଲା ଲୋକସଭା ଆସନ । ଏହାକୁ ନେଇ ହିସାବନିକାଶ କରାଯାଇଛି । ପୂର୍ବ ଓ ଉତ୍ତର-ପୂର୍ବାଞ୍ଚଳର ୧୨ଟି ରାଜ୍ୟରେ ମୋଟ ୧୪୨ ଟି ଲୋକସଭା ଆସନ ଅଛି । ୨୦୧୯ ନିର୍ବାଚନରେ ବିଜେପିକୁ ସେଥିରୁ ୬୮ ଟି ଆସନ ମିଳିଥିଲା । ଏଥର ଅତି କମ୍ ରେ ୧୦୦କୁ ବୃଦ୍ଧି ପାଇଁ ଆଜିର ବୈଠକରେ ରଣନୀତି ପ୍ରସ୍ତୁତ କରାଯାଇଛି । ଓଡ଼ିଶାରୁ ଅନୁ୍ୟନ ୧୪ ଟି ଆସନ ଟାର୍ଗେଟ୍ କରାଯାଇଥିବା ବିଶେଷ ସୂତ୍ରରୁ ଜଣାପଡ଼ିଛି ।
୨୦୧୯ରେ ଓଡ଼ିଶାରୁ ବିଜେପି ୮ଟି ଲୋକସଭା ଆସନ ହାସଲ କରିଥିଲା । ସେଗୁଡ଼ିକ ହେଲା- ଭୁବନେଶ୍ୱର, ବାଲେଶ୍ୱର, ମୟୁରଭଞ୍ଜ, ସମ୍ବଲପୁର, ବଲାଙ୍ଗୀର, ବରଗଡ଼, କଳାହାଣ୍ଡି ଏବଂ ସୁନ୍ଦରଗଡ଼ । ଏଗୁଡ଼ିକୁ ମିଶାଇ ପୁରୀ, ଭଦ୍ରକ, ନବରଙ୍ଗପୁର, ବ୍ରହ୍ମପୁର, କେନ୍ଦୁଝର ଓ ଢ଼େଙ୍କାନାଳ ଆସନକୁ ଏଥର ଫୋକସ୍ କରାଯାଇଛି । ଅର୍ଥାତ୍ ଦଳ ୧୪ଟି ଲୋକସଭା ଆସନ ପାଇବାକୁ ହେଲେ ଏହି ୬ଟି ଆସନରେ ବିଜୟୀ ହେବା ସହ ପୂର୍ବ ୮ଟି ରେ ପୁନଃ ବିଜୟ ସୁନିଶ୍ଚିତ କରିବାକୁ ପଡ଼ିବ ।
ତେବେ ଓଡ଼ିଶାରେ ଏବେକାର ସ୍ଥିତିରେ ଲୋକସଭା ଆସନର ଆକଳନ ଏକ ଜଟିଳ ପାଠ ବୋଲି କୁହାଯାଉଛି । କାରଣ, ଏଇ ୪ ବର୍ଷରେ ବିଜେପିର ନିଜସ୍ୱ ବଳ ବଢ଼ିପାରିନାହିଁ । ସାଂଗଠନିକ ସ୍ଥିତି ଯଥା ପୂର୍ବଂ ତଥା ପରଂ ରହିଛି । ଅନ୍ୟପକ୍ଷରେ ନବୀନ ପଟ୍ଟନାୟକ ଓ ବିଜେଡ଼ିର ଲୋକପ୍ରିୟତା ସେମିତି ଅତୁଟ ରହିଛି । ସରକାର ବିରୋଧୀ ଜନମତ ସୃଷ୍ଟି କରିବାରେ ବିଜେପି ସଫଳ ହୋଇନାହିଁ । ଆଗାମୀ ନିର୍ବାଚନକୁ ମାତ୍ର କେଇ ମାସ ବାକି ଥିଲା ବେଳେ ଓଡ଼ିଶାର ସ୍ଥିତିକୁ ବିଜେପି ଯେ ବଦଳେଇଦେବ ତାହା ବିଶ୍ୱାସ ହେଉନି । ସୁତରାଂ ପୂର୍ବପରି ମୋଦୀ ହାୱାକୁ ବିଜେପି ଭରସା କରିବ । ମାତ୍ର ଆଗାମୀ ନିର୍ବାଚନ ବେଳକୁ ମୋଦୀ ହାୱା ରହିବ ନା ନାହିଁ ତାହା ବଡ଼ ପ୍ରଶ୍ନ । ଅନ୍ୟ ରାଜ୍ୟ ଭଳି ଓଡ଼ିଶାରେ ମଧ୍ୟ ଲୋକସଭା ଆସନର ଏହା ଭବିଷ୍ୟତ ନିର୍ଣ୍ଣୟ କରିବ ।
ଓଡ଼ିଶାର ବିଜେପି ନେତାମାନେ ଛାତି ପିଟି ଉପରକୁ ଦମ୍ଭ ଦେଖାଉଥିଲେ ମଧ୍ୟ ଏହା ହିଁ ବାସ୍ତବତା ବୋଲି ରାଜନୈତିକ ସମୀକ୍ଷକମାନେ ମତ ଦେଇଛନ୍ତି । ଏହି ବାସ୍ତବତାକୁ ବୁଝିଥିବାରୁ ବିଧାନସଭା ଟାର୍ଗେଟ୍ ୧୨୦ରୁ ୮୦କୁ ଖସାଇଦେଲେଣି । ଓଡ଼ିଶାରେ ବିଜେପିର ଅସଜଡ଼ା ଅବସ୍ଥାକୁ ନେଇ ହାଇକମାଣ୍ଡ ବି ବିବ୍ରତ ରହିଛନ୍ତି । ତେଣୁ ଲୋକସଭା କ୍ଷେତ୍ରରେ ଅଧିକ ଆସନ ଆଶା କରିବା ସହଜ ବ୍ୟାପାର ନୁହେଁ ।
ଇତିମଧ୍ୟରେ ଓଡ଼ିଶା ବିଜେପି ପାଇଁ ଆଉ ଏକ ବଡ଼ ସମସ୍ୟା ଛିଡ଼ା ହୋଇଛି । ଅଧିକାଂଶ ବିଜେପି ସାଂସଦ ପୁନର୍ବାର ଲୋକସଭା ନିର୍ବାଚନ ଲଢ଼ିବାକୁ ଚାହୁଁନାହାନ୍ତି । କିଛି ସାଂସଦ ଆସନ ବଦଳାଇବାକୁ ଚାହୁଁଛନ୍ତି । ସାଂସଦମାନଙ୍କର ଏଭଳି ବୀତସ୍ଫୃହତା ପଛରେ କାରଣ ସ୍ପଷ୍ଟ ଜଣାପଡ଼ି ନ ଥିଲେ ମଧ୍ୟ ନିଜସ୍ୱ ଶକ୍ତି ଅଭାବରୁ ପରାଜୟ ଭୟରେ ଥିବା କୁହାଯାଉଛି । କିଛି ସାଂସଦ ବିଧାନସଭା ଲଢ଼ିବାକୁ ଆଗ୍ରହ ରଖିଥିବା ଜଣାପଡ଼ିଛି । ଆଗାମୀ ଦିନରେ ଦଳ ଏହାକୁ କିଭଳି ସମ୍ଭାଳିବ ତାହା ଦେଖିବାର କଥା ।
ଏହି ପରିପ୍ରେକ୍ଷୀରେ ବିଜେଡି ସହ ବିଜେପିର ଗୋପନ ବୁଝାମଣା ପ୍ରସଙ୍ଗ ସାମନାକୁ ଆସୁଛି । ରାଜନୈତିକ ବିଶାରଦମାନଙ୍କ ମତରେ ବିଜେଡି-ବିଜେପି ଭିତିରି ବୁଝାମଣା ନ ରହିଲେ ସବୁ ଅଙ୍କ ଗୋଳମାଳ ହୋଇପାରେ । କାରଣ ଦିଲ୍ଲୀ ରାଜନୀତିରେ ଓଡ଼ିଶାର ଅବଦାନ ଯଥେଷ୍ଟ ଗୁରୁତ୍ୱ ବହନ କରୁଛି । ସେଇ କାରଣରୁ ମୂଲଚାଲ ଆରମ୍ଭ ହୋଇଥିବା ଅସତ୍ୟ ହୋଇ ନ ପାରେ ବୋଲି ସେମାନଙ୍କର ବିଶ୍ୱାସ ।
ସେପଟେ ତୃତୀୟ ଥର ପାଇଁ ମୋଦୀଙ୍କ ନେତୃତ୍ୱରେ ସରକାର ଗଠନ ପାଇଁ ବିଜେପି ସଜବାଜ ହେଉଥିଲା ବେଳେ ବର୍ତ୍ତମାନ ପରିସ୍ଥିତି ଅନୁକୂଳ ନାହିଁ । ଦକ୍ଷିଣ ଭାରତ ହାତଛଡ଼ା ହୋଇଥିବାରୁ ନଭେମ୍ବରରେ ହେବାକୁ ଥିବା ୫ଟି ରାଜ୍ୟର ବିଧାନସଭା ନିର୍ବାଚନ ଫଳାଫଳ ମୋଦୀଙ୍କ ଭବିଷ୍ୟତ ପାଇଁ ଗୁରୁତ୍ୱ ରଖୁଛି । ଜାତୀୟ ଗଣମାଧ୍ୟମରେ ପ୍ରକାଶିତ ବିଭିନ୍ନ ସଂସ୍ଥାର ସର୍ଭେ ରିପୋର୍ଟ ଅନୁଯାୟୀ ଆଗାମୀ ସାଧାରଣ ନିର୍ବାଚନରେ ବିଜେପି ପୂର୍ବଥରଠାରୁ ପ୍ରାୟ ୧୦୦ଟି ଲୋକସଭା ଆସନ ହରାଇପାରେ । ଏହା ବିଜେପି ପାଇଁ ମୁଣ୍ଡବ୍ୟଥା ହୋଇଛି ।
ସୂଚନାଥାଉକି, ପୂର୍ବ ଓ ଉତ୍ତର-ପୂର୍ବାଞ୍ଚଳ ରାଜ୍ୟରେ ମୋଟ ୧୪୨ ଟି ଲୋକସଭା ଆସନ ମଧ୍ୟରୁ ପୂର୍ବାଞ୍ଚଳ ୪ଟି ରାଜ୍ୟରେ ୧୧୭ ଟି ଆସନ ଅଛି । ଉତ୍ତର-ପୂର୍ବ ୮ଟି ରାଜ୍ୟରେ ୨୫ଟି ଲୋକସଭା ଆସନ ଅଛି । ପଶ୍ଚିମବଙ୍ଗରେ ସର୍ବାଧିକ ୪୨ ଆସନ ଥିବା ବେଳେ ବିହାରରେ ୪୦, ଓଡ଼ିଶାରେ ୨୧ ଏବଂ ଝାଡ଼ଖଣ୍ଡରେ ୧୪ ଟି ଲୋକସଭା ଆସନ ଅଛି । ସେହିଭଳି ଆସାମରେ ୧୪ ଆସନ ଥିବା ବେଳେ ଅରୁଣାଚଳ, ମେଘାଳୟ, ମଣିପୁର, ତ୍ରିପୁରାରେ ୨ଟି ଲେଖାଏଁ ଆସନ, ମିଜୋରାମ, ନାଗାଲ୍ୟାଣ୍ଡ ଏବଂ ସିକିମ୍ ରେ ଗୋଟିଏ ଲେଖାଏଁ ଆସନ ଅଛି ।
ଆଜି ପୂର୍ବ ଓ ଉତ୍ତର-ପୂର୍ବାଞ୍ଚଳ ରାଜ୍ୟର ଦଳୀୟ ପଦାଧିକାରୀଙ୍କୁ ନେଇ ଗୌହାଟୀରେ ବୈଠକ ସରିଥିବା ବେଳେ ଆସନ୍ତାକାଲି ନୂଆଦିଲ୍ଲୀରେ ଉତ୍ତର, କେନ୍ଦ୍ର ଏବଂ ପଶ୍ଚିମାଞ୍ଚଳ ରାଜ୍ୟଗୁଡ଼ିକର ପଦାଧିକାରୀ ସମ୍ମିଳନୀ ଅନୁଷ୍ଠିତ ହେବ । ଦକ୍ଷିଣାଞ୍ଚଳ ରାଜ୍ୟଗୁଡ଼ିକର ସମ୍ମିଳନୀ ହାଇଦ୍ରାବାଦରେ ୮ ତାରିଖରେ ଅନୁଷ୍ଠିତ ହେବ ।
