ଭୁବନେଶ୍ୱର: ପ୍ରଣବ ପ୍ରକାଶ ଓରଫ୍ ବବି ଦାସ ଜଣେ ଦକ୍ଷ ସଂଗଠକ । ତାଙ୍କର ଦକ୍ଷତା ଓ ଜୋସ୍ ଅତୀତରେ ନବୀନ ପଟ୍ଟନାୟକଙ୍କୁ ଆକର୍ଷିତ କରିବାରୁ ସେ ତାଙ୍କୁ ଦଳର ସାଂଗଠନିକ ଦାୟିତ୍ୱ ଦେଇଥିଲେ । ସେହି ଦାୟିତ୍ୱ ତୁଲାଇବା ପାଇଁ ବବି କଠିନ ପରିଶ୍ରମ କରିଥିଲେ । ତେବେ ନିର୍ବାଚନରେ ବିଜେଡିର ବିପର୍ଯ୍ୟୟ ତାଙ୍କର ସ୍ଥିତିକୁ ଦୋହଲାଇଦେଲା । ନିଜସ୍ୱ ପରାଜୟର ଗ୍ଲାନି ସାଙ୍ଗକୁ ଦଳ ପରାଜୟର ଦୋଷରେ ତାଙ୍କର ଆତ୍ମବିଶ୍ୱାସ ଚହଲିଗଲା । ତେଣୁ ନିର୍ବାଚନ ପରଠାରୁ ବିଜେଡି ଫ୍ରଣ୍ଟଲାଇନ୍ ରେ ବବିଙ୍କୁ ଆଉ ବିଶେଷ ଦେଖିବାକୁ ମିଳିଲାନି । ଦଳର ବିଭିନ୍ନ କମିଟିରେ ମଧ୍ୟ ତାଙ୍କର ନାଁ ରହିଲା ନାହିଁ । ତାଙ୍କର ଏଭଳି ଅନୁପସ୍ଥିତିକୁ ନେଇ ବଜାରରେ ବୁଲିଲା ଅନାବନା କାହାଣୀ । ମାତ୍ର ତାହା ସମ୍ଭବତଃ ଭୁଲ୍ ପ୍ରମାଣିତ ହେବାକୁ ଯାଉଛି । ବିଜେଡି ମଇଦାନକୁ ପୂରା ଜୋସ୍ ରେ ଫେରୁଛନ୍ତି ବବି ।
ଗତକାଲି ସାରା ରାଜ୍ୟରେ ବିଜେଡିର ଜନ ସମ୍ପର୍କ ପଦଯାତ୍ରା ଆରମ୍ଭ ହୋଇଛି । ଯାଜପୁର ନିର୍ବାଚନମଣ୍ଡଳୀର କୁଆଁସ ମଙ୍ଗଳାପୀଠରେ ଆୟୋଜିତ ଏହି କାର୍ଯ୍ୟକ୍ରମରେ ଯୋଗଦେଇଥିଲେ ବବି । ତାଙ୍କ ଭାଷଣରେ ଥିଲା ପ୍ରବଳ ଜୋସ୍ । କହିଥିଲେ, ବିଜେପି ଏବଂ ଗଣମାଧ୍ୟମର ଚକ୍ରାନ୍ତରେ ଯାଜପୁରର ବିକାଶ ବନ୍ଦ ହେବ ନାହିଁ । ଆମର ବିକାଶର ଡିଣ୍ଡିମ ପିଟାଯାଏ ନାହିଁ । ଆମର କାମ ଉପରେ ଗୁରୁତ୍ୱ ଦିଆଯାଏ । ଆଜି ଆପଣମାନଙ୍କୁ ଏତେ ସଂଖ୍ୟାରେ ଦେଖି ମୋର ଶହେ ସିଂହର ବଳ ଆସିଛି । ସୁଯୋଗ ମିଳିଲେ ମା’ ବିରଜାଙ୍କ ଆଶୀର୍ବାଦରୁ ମୁଁ ପୁଣିଥରେ ଲଢ଼ିବାକୁ ପ୍ରସ୍ତୁତ ।
ରାଜ୍ୟର ବିଜେପି ସରକାରଙ୍କୁ ଖୋଲା ଆହ୍ୱାନ ଦେଇଥିଲେ ବବି । ଯଦି ଦୁର୍ନୀତି କରିଛି, ବାନ୍ଧୁନ କାହିଁକି ବୋଲି ପ୍ରଶ୍ନ କରିଥିଲେ । ମୋତେ ଜେଲ୍ ରେ ପୂରାଅ କି ଫାଶୀ ଦିଅ, ହେଲେ ଯାଜପୁର ବିକାଶରେ ବାଧା ଦିଅନି । ଅଶୋକ ଦାସଙ୍କ ପୁଅ ଭାବେ ମୋର ଜେଲ୍ ଯିବାକୁ ଭୟ ନାହିଁ । ମତେ ବାନ୍ଧି ଜେଲ୍ ରେ ପୂରେଇଲେ ମୁଁ ସେଥିପାଇଁ ପ୍ରସ୍ତୁତ ଅଛି । କିନ୍ତୁ ମତେ ନବୀନ ପଟ୍ଟନାୟକଙ୍କଠାରୁ କେହି ଦୂରେଇ ପାରିବେ ନାହିଁ ବୋଲି ବବି କହିଥିଲେ ।
ବବିଙ୍କର ଏହି ଭାଷଣ ଓ ଅଙ୍ଗଭଙ୍ଗୀରୁ ଏତିକି ସ୍ପଷ୍ଟ ଯେ ବିଜେଡିରେ ସେ ଅଲୋଡ଼ା ହୋଇନାହାନ୍ତି କି ଅଲୋଡ଼ା ହେବେ । ବରଂ ପ୍ରଚ୍ଛଦପଟରେ ରହି ଦଳୀୟ ସଂଗଠନ ସଜାଡ଼ିବା କାମରେ ସେ ପୁଣି ଲାଗିପଡ଼ିଲେଣି । ବର୍ତ୍ତମାନ ପରିସ୍ଥିତିରେ କୌଣସି ପଦପଦବୀ ନେବାକୁ ସେ ନିଜ ଆଡୁ ଆଗ୍ରହୀ ନ ଥିବା ଜଣାପଡ଼ିଛି । ନିର୍ବାଚନ ପରିଚାଳନାରେ ବିଭ୍ରାଟ ପାଇଁ ଦଳର ଅନେକ ନେତା ତାଙ୍କୁ ଦାୟୀ କରୁଥିବାରୁ ସେହି ଅସନ୍ତୋଷ ନ ଥମିଲା ପର୍ଯ୍ୟନ୍ତ ସେ ବିନା ପଦପଦବୀରେ କାର୍ଯ୍ୟ କରିବାକୁ ଇଚ୍ଛା ପ୍ରକାଶ କରିଥିବା ଦଳୀୟ ମହଲରୁ ଖବର ମିଳିଛି ।
ସୂଚନାଥାଉକି, ପ୍ରଥମଥର ପାଇଁ ନିର୍ବାଚନ ବିପର୍ଯ୍ୟୟର ସାମନା କରିଥିବା ବିଜେଡି ଏବେ କଠିନ ସମୟ ଦେଇ ଗତି କରୁଥିଲେ ମଧ୍ୟ ମୁଖିଆ ନବୀନ ପଟ୍ଟନାୟକ ଦଳୀୟ ନେତା ଓ କର୍ମୀଙ୍କ ଆତ୍ମବଳ ବଜାୟ ରଖିବା ପାଇଁ ଉଦ୍ୟମ କରୁଛନ୍ତି । ବରିଷ୍ଠ ନେତାଙ୍କୁ ଅଣଦେଖା କରି ପୂର୍ବ ଭୁଲ୍ ର ରିପିଟ୍ କରିବାକୁ ଚାହୁଁନାହାନ୍ତି । ବରଂ ପୂର୍ବ ମତାନ୍ତର ଦୂର କରି ସମସ୍ତଙ୍କୁ ଏକଜୁଟ୍ କରି ଆଗକୁ ବଢ଼ିବା ପାଇଁ ଯୋଜନା କରିଛନ୍ତି । ସେହିକ୍ରମରେ ଦେବୀ ମିଶ୍ର, ପ୍ରସନ୍ନ ଆଚାର୍ଯ୍ୟଙ୍କ ଭଳି ବରିଷ୍ଠ ନେତାଙ୍କୁ ସେ ଗୁରୁତ୍ୱ ଦେଇଥିବା ବେଳେ ପ୍ରତାପ ଜେନା, ଅତନୁ ସବ୍ୟସାଚୀ ନାୟକ, ଅରୁଣ ସାହୁ, ସଞ୍ଜୟ ଦାସବର୍ମାଙ୍କ ଭଳି ଦକ୍ଷ ନେତାଙ୍କୁ ଉପଯୋଗ କରୁଛନ୍ତି ।
ପରିବର୍ତ୍ତିତ ପରିସ୍ଥିତିରେ ନବୀନ ବାବୁ ବବିଙ୍କୁ କେଉଁ ଭୂମିକାରେ ଅବତୀର୍ଣ୍ଣ କରାଇବେ ତାହା ଉପରେ ସମସ୍ତଙ୍କ ନଜର ଥିଲା ବେଳେ ଗତକାଲି ଯାଜପୁରରେ ବବିଙ୍କର ଭାଷଣକୁ ନେଇ ରାଜନୈତିକ ହଟଚମଟ ସୃଷ୍ଟି ହୋଇଛି । ସୁଯୋଗ ମିଳିଲେ ମା’ ବିରଜାଙ୍କ ଆଶୀର୍ବାଦରୁ ମୁଁ ପୁଣିଥରେ ଲଢ଼ିବାକୁ ପ୍ରସ୍ତୁତ ବୋଲି ବବିଙ୍କର ମନ୍ତବ୍ୟରୁ ସେ ଯାଜପୁରରୁ ଉପନିର୍ବାଚନ ଲଢ଼ିବା ଏକପ୍ରକାର ନିଶ୍ଚିତ ବୋଲି ଖବର ଖେଳିଗଲା । କାରଣ ବବିଙ୍କ ପାଇଁ ଯାଜପୁର ଆସନକୁ ସୁଜାତା ସାହୁ ଛାଡ଼ିଦେବେ ବୋଲି କିଛି ଦିନ ହେଲା ଚର୍ଚ୍ଚା ହେଉଥିଲା । ଆଉ ଗତକାଲି ବବିଙ୍କ ଭାଷଣ ସେହି ଚର୍ଚ୍ଚାକୁ ଖୋରାକ ଯୋଗାଇଥିଲା ।
ତେବେ ବିଧାୟିକା ଶ୍ରୀମତୀ ସାହୁ ଆଜି ଏହି ଚର୍ଚ୍ଚାକୁ ଖଣ୍ଡନ କରିଛନ୍ତି । ଦଳ ପକ୍ଷରୁ ସେଭଳି କିଛି ନିଷ୍ପତ୍ତି ହୋଇନାହିଁ ବୋଲି ସେ କହିଛନ୍ତି ।
