ଭୁବନେଶ୍ୱର: ଆଜି ବିଜେଡିରେ ମିଶିଛନ୍ତି କଂଗ୍ରେସ ଓ ବିଜେପିର ଜଣେ ଲେଖାଏଁ ପୂର୍ବତନ ବିଧାୟକ ଏବଂ ଜଣେ ଏବେକାର ବିଧାୟକ । ସେମାନେ ହେଉଛନ୍ତି ଚିରଞ୍ଜୀବ ବିଶ୍ୱାଳ, ବୃନ୍ଦାବନ ମାଝୀ ଏବଂ ସୁକାନ୍ତ ନାୟକ । ଶଙ୍ଖ ଭବନଠାରେ ଆୟୋଜିତ ପୃଥକ ମିଶ୍ରଣ ପର୍ଯ୍ୟାୟରେ ୩ ଜଣ ଯାକ ବିଧିବଦ୍ଧ ଭାବେ ଶଙ୍ଖ ଧରିଛନ୍ତି । ନବୀନ ପଟ୍ଟନାୟକଙ୍କ ଆଦର୍ଶ ତଥା ଲୋକାଭିମୁଖୀ କାର୍ଯ୍ୟକ୍ରମରେ ଆକୃଷ୍ଟ ହୋଇ ସେମାନେ ବିଜେଡିରେ ମିଶିଥିବା କହିଛନ୍ତି ।
ଏକଦା କଂଗ୍ରେସର ଅତି ପ୍ରଭାବଶାଳୀ ନେତା ତଥା ପୂର୍ବତନ ଉପମୁଖ୍ୟମନ୍ତ୍ରୀ ବସନ୍ତ ବିଶ୍ୱାଳଙ୍କ ପୁଅ ହେଉଛନ୍ତି ଚିରଞ୍ଜୀବୀ । ୨୦୦୪ ରୁ ୨୦୦୯ ସେ ତିର୍ତ୍ତୋଲରୁ ବିଧାୟକ ଥିଲେ । ୨୦୧୪ ରୁ ୨୦୧୯ ଜଗତସିଂହପୁରରୁ ବିଧାୟକ ଥିଲେ । ପିସିସିର ଉପସଭାପତି ଦାୟିତ୍ୱରେ ମଧ୍ୟ ଥିଲେ । ତେବେ ଦଳ ବିରୋଧୀ କାର୍ଯ୍ୟ ଅଭିଯୋଗରେ ଗତବର୍ଷ ସେ କଂଗ୍ରେସରୁ ନିଲମ୍ବିତ ହୋଇଥିଲେ । ଏଇ କିଛି ମାସ ତଳେ ତାଙ୍କ ଉପରୁ ନିଲମ୍ବନ ହଟଇଥିଲା । ତେବେ ନିଲମ୍ବନ ହଟିବା ପରେ ମଧ୍ୟ ଦଳୀୟ କାର୍ଯ୍ୟକ୍ରମରୁ ନିଜକୁ ଦୂରେଇ ରଖିଥିଲେ । କଂଗ୍ରେସରୁ ତାଙ୍କ ମନ ଛିଡ଼ିଗଲା । ଗତକାଲି ସେ କଂଗ୍ରେସରୁ ଇସ୍ତଫା ଦେଇଥିଲେ ।
ଆଜି ବିଜେଡିରେ ମୋର ଜନ୍ମଦିନ ବୋଲି ଚିରଞ୍ଜୀବୀ ପ୍ରତିକ୍ରିୟା ଦେଇଛନ୍ତି । କୌଣସି ସ୍ୱାର୍ଥ ନେଇ ଏଠାକୁ ଆସିନି । ଓଡ଼ିଶା ଭଳି ଏକ ପଛୁଆ ରାଜ୍ୟକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆକୁ ନେଇଛନ୍ତି । ତାଙ୍କର ସ୍ୱଚ୍ଛ ଭାବମୂର୍ତ୍ତି , ଦୃଢ଼ ନେତୃତ୍ୱ ଏବଂ ଆଦର୍ଶରେ ଅନୁପ୍ରାଣିତ ହୋଇ ମୁଁ ବିଜେଡିକୁ ଆସିଲି ବୋଲି କହିଛନ୍ତି ।
ଏହି ମିଶ୍ରଣ ପର୍ବରେ ରାଜ୍ୟସଭା ସାଂସଦ ମାନସ ମଙ୍ଗରାଜ, ଡ. ସସ୍ମିତ୍ ପାତ୍ର ପ୍ରମୁଖ ଉପସ୍ଥିତ ଥିଲେ ।
ସେହିଭଳି ନୀଳଗିରିର ବିଜେପି ବିଧାୟକ ସୁକାନ୍ତ କୁମାର ନାୟକ ଆଜି ଘରବାହୁଡ଼ା ହୋଇଛନ୍ତି । ଗତକାଲି ସେ ବିଜେପିରୁ ଇସ୍ତଫା ଦେଇଥିଲେ । ଶ୍ରୀ ନାୟକ ସରକାରୀ ଚାକିରି ଛାଡ଼ି ବିଜେଡିରେ ନିଜର ରାଜ୍ୟନୈତିକ କ୍ୟାରିୟର୍ ଆରମ୍ଭ କରିଥିଲେ । ୨୦୧୪ରେ ବିଜେଡି ଟିକେଟରେ ବିଧାୟକ ହୋଇଥିଲେ । ୨୦୧୯ ରେ ବିଜେଡି ଟିକେଟ ନ ମିଳିବାରୁ ସେ ବିଜେପିକୁ ଚାଲି ଯାଇଥିଲେ ଏବଂ ବିଜେପି ଟିକେଟରେ ବିଧାୟକ ହୋଇଥିଲେ । ଏବେ ବିଜେପିରେ ନିଜକୁ ଅଲୋଡ଼ା ମନେ କରି ବିଜେଡିକୁ ଫେରି ଆସିଛନ୍ତି ।
କୁଚିଣ୍ଡାର ପୂର୍ବତନ ବିଧାୟକ ବୃନ୍ଦାବନ ମାଝୀ ବିଜେପି ଛାଡ଼ି ଆଜି ବିଜେଡିରେ ଯୋଗଦେଇଛନ୍ତି । ନବୀନ ବାବୁଙ୍କ ଆଦର୍ଶରେ ଅନୁପ୍ରାଣିତ ହୋଇଥିବା ସେ କହିଛନ୍ତି ।