ପ୍ରତିବାଦ ତୀବ୍ର

ଭୁବନେଶ୍ୱର: ପ୍ରବାଦ ପୁରୁଷ ସ୍ୱର୍ଗତ ବିଜୁ ପଟ୍ଟନାୟକଙ୍କୁ ଆମେରିକା ସିଆଇଏ ଏଜେଣ୍ଟ କହିଥିବା ବିଜେପି ସାଂସଦ ନିଶିକାନ୍ତ ଦୁବେଙ୍କ ମନ୍ତବ୍ୟକୁ ଚାରିଆଡୁ ନିନ୍ଦା ଏବଂ ପ୍ରତିବାଦ ଜାରି ରହିଛି । ଆଜି ବିଧାନସଭାରେ ବିଜେଡି ଓ କଂଗ୍ରେସ ସଭ୍ୟମାନେ ପ୍ରବଳ ହୋ ହଲ୍ଲା ଓ ପ୍ରତିବାଦ କରିବାରୁ ଗୃହ ଚାଲି ପାରି ନ ଥିଲା । ସେପଟେ ଦୁବେଙ୍କଠାରୁ କ୍ଷମା ଦାବି କରି ରାଜ୍ୟସଭାରେ ବିଜେଡି ସାଂସଦମାନେ ପ୍ରତିବାଦ ଜାରି ରଖିଥିଲା ବେଳେ ବିଜୁ ବାବୁଙ୍କ ପ୍ରତି ଅସମ୍ମାନକୁ ନେଇ ବିଜେପି ଉପରେ ପ୍ରବଳ ବର୍ଷିଛନ୍ତି ଆମ୍ ଆଦମୀ ପାର୍ଟି ସାଂସଦ ସଞ୍ଜୟ ସିଂ । ବିଜୁ ବାବୁଙ୍କ ଭଳି ଭାରତୀୟ ରାଜନୀତିରେ ଜଣେ ଅତ୍ୟନ୍ତ ସାହାସୀ ନେତାଙ୍କୁ ସିଆଇଏ ଏଜେଣ୍ଟ କହି ଗଭୀର ଅପମାନିତ କରାଯାଇଛି । ଦେଶବାସୀ ଏହାକୁ କେବେ ବି କ୍ଷମା କରିବେନି ବୋଲି ସେ ଚେତାବନୀ ଦେଇଛନ୍ତି ।

ଆଜି ବିଧାନସଭାର ପ୍ରଶ୍ନକାଳ ଆରମ୍ଭ ହେବା ମାତ୍ରେ ବିଜେଡି ଏବଂ କଂଗ୍ରେସ ସଦସ୍ୟମାନେ ନିଜ ଆସନରୁ ଉଠି ହୋ ହଲ୍ଲା କରିଥିଲେ । ନାରାବାଜି କରି ଗୃହର ମଧ୍ୟ ଭାଗକୁ ମାଡ଼ି ଆସିଥିଲେ । ବିଜୁ ବାବୁଙ୍କୁ ଅପମାନ ଚଳିବ ନାହିଁ ବୋଲି ସ୍ଲୋଗାନ ଦେବା ସହ ଓଡ଼ିଆ ଅସ୍ମିତା କୁଆଡ଼େ ଗଲା ବୋଲି ସରକାରଙ୍କଠାରୁ ଜବାବ ମାଗିଥିଲେ । ବିଜୁ ବାବୁଙ୍କୁ ଅସମ୍ମାନ କରାଯାଇଥିବାରୁ ଗୃହରେ ଏକ ନିନ୍ଦା ପ୍ରସ୍ତାବ ଗ୍ରହଣ ପାଇଁ ସେମାନେ ବାଚସ୍ପତିଙ୍କ ନିକଟରେ ଅଡ଼ି ବସିଥିଲେ । ଫଳରେ ବାଚସ୍ପତି ଗୃହକୁ ସାଢ଼େ ୧୧ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ । ଶୂନ୍ୟକାଳରେ ବିଜେଡି ବିଧାୟକମାନେ ଏହି ପ୍ରସଙ୍ଗରେ ନିନ୍ଦା ପ୍ରସ୍ତାବ ଆଣିଥିଲେ ମଧ୍ୟ ବାଚସ୍ପତି ଏହାକୁ ଅନୁମତି ଦେଇ ନ ଥିଲେ ।

ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି ଯେ ସାଂସଦ ନିଶିକାନ୍ତ ଦୁବେ ଓଡ଼ିଶାର ବିଶିଷ୍ଟ ଜନନାୟକ ସ୍ୱର୍ଗତ ବିଜୁ ପଟ୍ଟନାୟକଙ୍କ ବିରୋଧରେ ଯେଉଁ ନକରାତ୍ମକ ଟିପ୍ପଣୀ ଦେଇଛନ୍ତି ତାହା ସରକାରଙ୍କ ସଂଜ୍ଞାନକୁ ଆସିଛି । ସାଂସଦ ଶ୍ରୀ ଦୁବେଙ୍କର ଏହି ମନ୍ତବ୍ୟ ସମ୍ପୂର୍ଣ୍ଣ ରୂପେ ତାଙ୍କର ବ୍ୟକ୍ତିଗତ ମତ । ଏହା ଏକ ଅପରିଣାମଦର୍ଶୀ ମନ୍ତବ୍ୟ ଯାହା କୌଣସି ମତେ ଗ୍ରହଣୀୟ ନୁହେଁ । ଏହି ମନ୍ତବ୍ୟ ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ସମସ୍ତଙ୍କୁ ଗଭୀର ଭାବରେ ବ୍ୟଥିତ କରିଛି । ଏଭଳି ମନ୍ତବ୍ୟଉପରେ କେହି ଯେଭଳି ପ୍ରତିମନ୍ତବ୍ୟ ନ ଦେବେ ଏବଂ ଏ ଅଗ୍ରହଣୀୟ କଥା ଯେଭଳି ପୁନରାବୃତ୍ତି ନ ହେବ ସେଥିପାଇଁ ସମସ୍ତଙ୍କୁ ନିବେଦନ କରିଥିଲେ ।

ବିଜେଡି ଏବଂ କଂଗ୍ରେସର ସଦସ୍ୟମାନେ ନିଶିକାନ୍ତ ଦୁବେଙ୍କ ମନ୍ତବ୍ୟର କଡ଼ା ନିନ୍ଦା କରିବା ସହ ବିଜୁ ବାବୁଙ୍କୁ ଅସମ୍ମାନ କରିବାରେ ଡବଲ ଇଞ୍ଜନ ସରକାରଙ୍କୁ ମଧ୍ୟ ଟାର୍ଗେଟ୍ କରିଥିଲେ । ବିଜୁବାବୁଙ୍କ ପ୍ରତି ଅପମାନକୁ ନେଇ ରାଜ୍ୟ ସରକାର କାହିଁକି ନିରବ ବୋଲି ବିଜେଡି ବିଧାୟକ ସାରଦା ଜେନା ପ୍ରଶ୍ନ କରିଛନ୍ତି । ଏହା ଓଡ଼ିଆ ଅସ୍ମିତାକୁ ପ୍ରହାର ବୋଲି ସେ କହିଛନ୍ତି । ଗୌତମବୁଦ୍ଧ ଦାସ କହିଛନ୍ତି, ବିଜୁ ବାବୁଙ୍କ ଅପମାନ ଓଡ଼ିଶାକୁ ଅପମାନ । ପ୍ରତ୍ୟେକ ଓଡ଼ିଆ ଏଥିରେ ମର୍ମାହତ ଓ ବ୍ୟଥିତ ହୋଇଛନ୍ତି । ସ୍ୱାଧୀନତା ସଂଗ୍ରାମର ବରପୁତ୍ରମାନଙ୍କୁ ବିଜେପି ଅସମ୍ମାନ କରିବା ଜାରି ରଖିଛନ୍ତି । ଓଡ଼ିଶାର ବିଜେପି ନେତାମାନେ ବିଜୁ ବାବୁଙ୍କୁ ଅସମ୍ମାନ କରିବାକୁ ପଛାଇ ନାହାନ୍ତି ବୋଲି ସେ କହିଛନ୍ତି । ଓଡ଼ିଆ ଅସ୍ମିତା ଆଜି ସଙ୍କଟରେ ବୋଲି ଧ୍ରୁବ ସାହୁ କହିଛନ୍ତି ।

ବିଜୁ ବାବୁ ଓଡ଼ିଶାର ପ୍ରବାଦ ପୁରୁଷ । ତାଙ୍କର ଦେହାନ୍ତ ପରେ ତାଙ୍କୁ ନେଇ ରାଜନୀତି କରାଯିବା ଅତି ଘୃଣ୍ୟ କାର୍ଯ୍ୟ । ଜଣେ ଦିବଙ୍ଗତ ମହାନ୍ ନେତାଙ୍କୁ ବିଜେପି ସମ୍ମାନ ଦେବା ଉଚିତ୍ ବୋଲି କଂଗ୍ରେସ ବିଧାୟକ ଅଶୋକ ଦାସ କହିଛନ୍ତି । ବିଜୁ ବାବୁ ଓଡ଼ିଶାର ଅଭିମାନ, ଗର୍ବ ଓ ଗୌରବ ବୋଲି ବିଜେପି ବିଧାୟକ ଟଙ୍କଧର ତ୍ରିପାଠୀ କହିଛନ୍ତି ।

ବରିଷ୍ଠ ନେତା ବିଜୟ ମହାପାତ୍ର ଏହାକୁ କଡ଼ା ଭାଷାରେ ନିନ୍ଦା କରିଛନ୍ତି । ନିଶିକାନ୍ତ ଦୁବେଙ୍କ ମାନସିକ ଚିକିତ୍ସା ଦରକାର ବୋଲି ନବୀନ ପଟ୍ଟନାୟକ ଯାହା କହିଛନ୍ତି ତାହା ଠିକ୍ ବୋଲି ବିଜୟ ମହିଛନ୍ତି । ଜଣେ ଦାୟିତ୍ୱବାନ ସାଂସଦଙ୍କଠାରୁ ଏଭଳି ମିଥ୍ୟା, ଅମୂଳକ ମନ୍ତବ୍ୟ ଆଶା କରାଯାଏନି । ବିଜୁ ବାବୁୂଙ୍କ ସମ୍ପର୍କରେ ସମ୍ୟକ ଜ୍ଞାନ ନ ଥିବା ବ୍ୟକ୍ତି ଏଭଳି କହିପାରନ୍ତି । ବିଜୁ ବାବୁଙ୍କୁ ଅପମାନିତ କରିଥିବାରୁ ଓଡ଼ିଶାବାସୀଙ୍କ ଆଗରେ ତୁରନ୍ତ କ୍ଷମା ପ୍ରାର୍ଥନା କରିବାକୁ ସେ ଦାବି କରିଛନ୍ତି ।

ପଶ୍ଚିମବଙ୍ଗର ଲୋକସଭା ସାଂସଦ ଶ୍ରୀମତୀ ମହୁଆ ମୈତ୍ର ଆଜି ଏକ ଟ୍ୱିଟ୍(ଏକ୍ସ) ପୋଷ୍ଟରେ ଏହାକୁ ନିନ୍ଦା କରିଛନ୍ତି । ବିଜୁ ବାବୁଙ୍କୁ ସିଆଇଏ ଏଜେଣ୍ଟ କହିବା ଅତ୍ୟନ୍ତ ନିନ୍ଦନୀୟ । ବିଜେପି ସହିତ ବନ୍ଧୁତା କଲେ କେବେ ବି ଭଲ ଫଳ ମିଳେନି । ନବୀନ ପଟ୍ଟନାୟକ ଏହି କଥାକୁ ଠିକ୍ ସମୟରେ ବୁଝିପାରିଛନ୍ତି । ଏହି ଘୃଣା ପ୍ରଚାରକାରୀଙ୍କୁ ଉଚିତ ଜବାବ ଦେଇଥିବାରୁ ସେଥିପାଇଁ ଧନ୍ୟବାଦ । ବିଜୁ ବାବୁଙ୍କୁ ସିଆଇଏ ଏଜେଣ୍ଟ କହିବା ପରେ ଏମାନେ ଆଉ କେଉଁ ସୀମା ପାର୍ କରିବେ ବୋଲି ମହୁଆ ପ୍ରଶ୍ନ କରିଛନ୍ତି ।

ବିଜୁ ପଟ୍ଟନାୟକଙ୍କ ପ୍ରତି ଅପମାନକୁ ସହ୍ୟ କରିନାହାନ୍ତି ନେତାଜୀଙ୍କ ପରିବାର । ସୁଭାଷ ଚନ୍ଦ୍ର ବୋଷଙ୍କ ନାତି ଚନ୍ଦ୍ର କୁମାର ବୋଷ ସୋସିଆଲ ମିଡିଆରେ କଡ଼ା ଭାଷାରେ ଏହାକୁ ନିନ୍ଦା କରିଛନ୍ତି । ସେ ଲେଖିଛନ୍ତି, ବିଜୁ ବାବୁ ଆମ ପରିବାରର ବହୁତ ନିକଟତର ଥିଲେ । ବାପା ଅମୀୟ ନାଥ ବୋଷଙ୍କ ସହ ବିଜୁ ବାବୁଙ୍କ ଘନିଷ୍ଠ ସମ୍ପର୍କ ଥିଲା । ନିଶିକାନ୍ତ ଦୁବେଙ୍କୁ ଲକ୍ଷ୍ୟ କରି ସେ କହିଛନ୍ତି ଯେ ଅଳ୍ୱ ବିଦ୍ୟା ଭୟଙ୍କରୀ । ନିଜ ମାଲିକଙ୍କୁ ଖୁସି କରିବାକୁ ଭୟଙ୍କର ମିଥ୍ୟା ବିବୃତ୍ତି ଦେବା ବନ୍ଦ କରିବା ଉଚିତ ।