ଭୁବନେଶ୍ୱର: ଜଣେ ଯୁବତୀଙ୍କ ଏତାଲା ଆଧାରରେ ବିଏମସି କର୍ପୋରେଟର ଅମରେଶ(ବାଇଁଆ) ଜେନା ଗିରଫ ହୋଇଛନ୍ତି । ବାଲେଶ୍ୱର ଜିଲ୍ଲା ନୀଳଗିରିର ବରହମପୁର ଥାନା ଅଞ୍ଚଳରୁ କମିସନରେଟ୍ ପୁଲିସ ଆଜି ତାଙ୍କୁ ଗିରଫ କରିଛି । ଭୁବନେଶ୍ୱର ପୋକସୋ କୋର୍ଟର ସ୍ୱତନ୍ତ୍ର ବିଚାରପତି ତାଙ୍କ ଜାମିନ୍ ଆବେଦନ ନାମଞ୍ଜୁର କରିବା ପରେ ଝାରପଡ଼ା ଜେଲ୍ ଯାଇଛନ୍ତି ।
ଗତ ଗୁରୁବାର ଦିନ ଲକ୍ଷ୍ମୀସାଗର ଥାନାରେ ଜଣେ ଯୁବତୀ ଏକ ସଙ୍ଗୀନ ଅଭିଯୋଗ ଆଣିଥିଲେ । କର୍ପୋରେଟର ଅମରେଶ ଜେନା ବିବାହର ପ୍ରତିଶ୍ରୁତି ଦେଇ ତାଙ୍କ ସହ ଶାରୀରିକ ସମ୍ପର୍କ ରଖିବା, ଗର୍ଭନଷ୍ଟ ପାଇଁ ବାଧ୍ୟ କରିବା ଏବଂ ହତ୍ୟା ଧମକର ଅଭିଯୋଗ କରିଥିଲେ । ୨୦୨୩ ମସିହାରେ ସେ ନାବାଳିକା ଥିଲା ବେଳୁ ଅମରେଶ ତାଙ୍କ ସହ ସମ୍ପର୍କ ରଖିଥିଲେ ବୋଲି ଏତଲାରେ ଦର୍ଶାଇଥିଲେ । ପୁଲିସ ତାଙ୍କ ଏତଲାକୁ ଗ୍ରହଣ କରି କେସ୍ ନଂ-୩୯୪ରେ ବିଏନଏସ୍ ଦଫା ୬୪(୨)(ଏମ), ୮୯, ୨୯୬, ୩୫୧(୨) ଓ ପୋକସୋ ଆକ୍ଟ-୨୦୧୨ର ଧାରାର ୬ରେ ମାମଲା ରୁଜୁ କରିଥିଲା ।
ଏହି ମାମଲାରେ ଲକ୍ଷ୍ମୀସାଗର ଥାନା ପୁଲିସ ୩ ଦିନ ହେଲା ବାଇଁଆଙ୍କୁ ଖୋଜୁଥିଲା । ସେ ଫେରାର ହୋଇଯାଇଥିବା ପୁଲିସ ଜଣାଇବା ସହ ତାଙ୍କୁ ଫେରାର ହେବାରେ ସହଯୋଗ କରିଥିବା ୫ ସହଯୋଗୀଙ୍କୁ ଗତକାଲି ଗିରଫ କରି କୋର୍ଟ ଚାଲାଣ କରିଥିଲା । ସେପଟେ ବାଇଁଆଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଥିଲା । ଆଜି ବାଲେଶ୍ୱର ଜିଲ୍ଲା ନୀଳଗିରିର ବରହମପୁର ଥାନା ଅଞ୍ଚଳର କଳାକାତ ଗାଁରୁ ପୁଲିସ ତାଙ୍କୁ ଗିରଫ କରିଥିଲା ।
ତାଙ୍କ ବିରୋଧରେ ଆସିଥିବା ଅଭିଯୋଗ ସମ୍ପୂର୍ଣ୍ଣ ମିଛ ବୋଲି କୋର୍ଟ ଚାଲାଣ ବେଳେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି ବାଇଁଆ । ସେ ସିଧାସଳଖ ଅର୍ଚ୍ଚନା ନାଗ ନାଁ ନେଇଛନ୍ତି ଏବଂ ସେ ହିଁ ତାଙ୍କୁ ଫସାଇ ଦେଇଛି ବୋଲି କହିଛନ୍ତି ।
ସେହିଭଳି ବାଇଁଆଙ୍କ ବିରୋଧରେ ଯୁବତୀ ଆଣିଥିବା ଅଭିଯୋଗକୁ ସମ୍ପୂର୍ଣ୍ଣ ମିଛ କହି ତାଙ୍କ ସମର୍ଥନରେ ବାହାରିଛନ୍ତି ସମର୍ଥକ । ସେ ରାଜନୈତିକ ଷଡ଼ଯନ୍ତ୍ରର ଶିକାର ହୋଇଛନ୍ତି ବୋଲି ପତ୍ନୀ ଶ୍ରୀମତୀ ବନଜା ଜେନା ଗଣମାଧ୍ୟମକୁ କହିଛନ୍ତି । ପୁଲିସ ପାଖରେ ସେ ଆତ୍ମସମର୍ପଣ କରିଛନ୍ତି ବୋଲି କହିବା ସହ ଇତିଶ ପ୍ରଧାନ ଏବଂ ଅର୍ଚ୍ଚନା ନାଗ ବିରୋଧରେ ସେମାନଙ୍କ ଅଭିଯୋଗ ଉପରେ ପୁଲିସ କାହିଁକି କାର୍ଯ୍ୟାନୁଷ୍ଠାନ ନେଲା ନାହିଁ ବୋଲି ପ୍ରଶ୍ନ କରିଛନ୍ତି । ସ୍ୱାମୀଙ୍କ ପାଇଁ ନ୍ୟାୟ ଭିକ୍ଷା କରି ସେ କୋର୍ଟର ଦ୍ୱାରସ୍ଥ ହେବେ ବୋଲି କହିଛନ୍ତି ।
ତେବେ ଅର୍ଚ୍ଚନା ନାଗ ତାଙ୍କ ପ୍ରତିକ୍ରିୟାରେ ପୀଡ଼ିତାଙ୍କୁ ଚିହ୍ନି ନାହାନ୍ତି ବୋଲି ସଫେଇ ଦେଇଛନ୍ତି । ଅମରେଶ ତାଙ୍କ କର୍ମଫଳ ଭୋଗୁଛନ୍ତି ବୋଲି ସେ ପାଲଟା କହିଛନ୍ତି ।
ଅନ୍ୟପକ୍ଷରେ ବାଇଁଆଙ୍କୁ ପୁଲିସ ଗିରଫ କରିବା ଖବର ଆସିବା ପରେ ପରେ ବିଜୁ ଜନତା ଦଳ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ତାଙ୍କୁ ଦଳରୁ ନିଲମ୍ବିତ କରାଯାଇଛି ।
